|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
ГАЗЛИ —- НУКУС МАГИСТРАЛЬ ГАЗ ҚУВУРИ ҚУРИЛИШИНИ ЖАДАЛЛАШТИРИШ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ўзбекистон Республикаси Ҳукуматининг 1993 йил 3 августдаги 389-сон қарорида назарда тутилган Газли—Нукус магистраль газ қувури қурилишини жадаллаштириш мақсадида Вазирлар Маҳкамаси қарор қилади:
1. «Ўзбекнефтгаз» корпорациясининг Газли—Нукус газ қувури қурилишини амалга ошираётган «Ўзбекнефтгазқурилиш» давлат-акционерлик бирлашмасига субпудратчи сифатида Россия Федерациясининг «Зангас» давлат бирлашмаси ва «ЗНГС—Прометей» акционерлик жамиятини (Москва шаҳри) жалб этиш ҳамда улар билан биргаликда қўшма корхона ташкил этиш тўғрисидаги таклифи қабул қилинсин.
2. Бош вазирнинг ўринбосари Б. С. Ҳамидов, Молия вазирлиги (Боқибоев), Марказий банк (Муллажонов) Газли—Нукус газ қувури қурилиши даврида жалб этилган ташкилотларнинг субҳисоб-китоб счётлари очилишини таъминласинлар ҳамда давлат кредитини қайта тақсимлаш ҳисобига «Ўзбекнефтгазқурилиш» бирлашмасига Газли—Нукус газ қувури қурилиши учун Россия Федерациясидан қурилиш техникасини келтириш учун ҳақ тўлашга 1 млрд сўм ажратсинлар.
3. Ўзбекистон Республикаси Давлат божхона қўмитаси (Абдуғаниев) Ўзбекистон Республикасига қурилиш техникаси, материаллар, асбоб-ускуналар тўсиқсиз ва бож тўламасдан келтирилишини ҳамда қурилиш тугаллангандан кейин вақтинча келтирилган асбоб-ускуналар ва қурилиш техникасининг олиб кетилишини белгиланган тартибда таъминласин.
4. Мелиорация ва сув хўжалиги вазирлиги (Гиниятуллин), «Ўзсувқурилиш» концерни (Ракитин) Газли—Нукус магистраль газ қувури қурилиши трассасида тупроқ ишларининг «Ўзбекнефтгаз-қурилиш» давлат-акционерлик бирлашмаси билан келишилган ҳажмларда ва муддатларда бажарилишини таъминласинлар.
5. «Ўзбектрансқурилиш» давлат уюшмаси (Омельницкий) Урганч ва Нукус шаҳарлари чегарасида газ қувурини Амударёдан ўтказиш иншооти қурилишини «Ўзбекнефтгаз» корпорацияси билан келишилган жадвалга мувофиқ амалга оширсин.
6. Қорақалпоғистон Республикаси Вазирлар Кенгаши, Хоразм вилояти ҳокимлиги Россия Федерациясидан келаётган қурилиш ташкилотларига жойлашиш, бинолар, уй-жой, озиқ-овқат билан таъминлашда ёрдам кўрсатсинлар.
7. «Ўзбекнефтгаз» корпорацияси бир ой муддатда бу ташкилотларни республикада нефть ва газ саноатини ривожлантиришнинг истиқболли режаларини рўёбга чиқариш учун жалб этиш дастурини ишлаб чиқсин.
8. Мазкур қарорнинг бажарилишини назорат қилиш Бош вазирнинг ўринбосари Қ. Ж. Ҳаққулов зиммасига юклатилсин.
Вазирлар Маҳкамасининг Раиси И. КАРИМОВ
Тошкент ш.,
1993 йил 4 ноябрь,
532-сон
