Ҳужжат кучини йўқотган " " 03.11.2022

Ўзбекистон Республикаси Вазирлар Маҳкамасининг

ЎЗБЕКИСТОН РЕСПУБЛИКАСИ ИЧКИ ИШЛАР ВАЗИРЛИГИ АХЛОҚ ТУЗАТИШ-МЕҲНАТ МУАССАСАЛАРИНИНГ ИШЛАБ ЧИҚАРИШ БАЗАСИНИ РИВОЖЛАНТИРИШ ЧОРА-ТАДБИРЛАРИ ТЎҒРИСИДА

LexUZ шарҳи

Мазкур қарор Ўзбекистон Республикаси Вазирлар Маҳкамасининг 2022 йил 2 ноябрдаги 638-сонли «Ички ишлар органлари фаолияти билан боғлиқ миллий қонунчилик базаси комплекс тизимлаштирилиши муносабати билан Ўзбекистон Республикаси Ҳукуматининг айрим қарорларини ўз кучини йўқотган деб ҳисоблаш тўғрисида»ги қарорига асосан ўз кучини йўқотган.

Озодликдан маҳрум этиш жойларида вазиятни барқарорлаштириш, Ўзбекистон Республикаси Ички ишлар вазирлигининг ахлоқ тузатиш-меҳнат муассасалари ишлаб чиқариш базасини ривожлантириш ва ҳукм этилганларни ижтимоий-фойдали меҳнатга жалб этиш мақсадида Вазирлар Маҳкамаси қарор қилади:

1. Ўзбекистон Республикаси истиқболни белгилаш ва статистика давлат қўмитаси 1994 йилнинг IV чорагидан бошлаб вилоятлар ҳокимликларига ва Ўзбекистон Республикаси Ички ишлар вазирлигига ахлоқ тузатиш-меҳнат муассасаларининг ишлаб чиқариш зоналарини лойиҳалаштириш ва қуришга иловага * мувофиқ капитал маблағлар ажратишни белгиланган тартибда назарда тутсин.

* Илова берилмайди.

2. Ўзбекистон Республикаси Молия вазирлиги ҳокимликлар ва Ўзбекистон Республикаси Ички ишлар вазирлигининг буюртномалари бўйича ахлоқ тузатиш-меҳнат муассасалари ишлаб чиқариш зоналарини лойиҳалаштириш ва қуриш учун пул маблағларига бўлган эҳтиёжни белгиланган тартибда таъминласин.

3. Ўзбекистон Республикаси Ички ишлар вазирлиги ахлоқ тузатиш-меҳнат муассасалари қурилиши тугаллангандан кейин озодликдан маҳрум этиш жойлари қўриқланиши ва ҳукм этилганлар устидан назорат амалга оширилиши таъминланиши учун қўшимча равишда ички қўшинлар ходимлари ажратиш тўғрисидаги ҳисоб-китобларни Вазирлар Маҳкамасига тақдим этсин.

4. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар, идоралар, корпорациялар, концернлар, уюшмалар ва уларнинг идоравий бўлинмалари жазони ижро этувчи муассасаларнинг корхоналарига давлат эҳтиёжини қондириш учун маҳсулотлар ва хизматларнинг муайян турларига буюртма берсинлар.

Вазирлар Маҳкамасининг Раиси И. КАРИМОВ

Тошкент ш.,

1994 йил 9 сентябрь,