Ҳужжат кучини йўқотган " " 22.02.2021
Ўзбекистон Республикаси Вазирлар Маҳкамасининг
қарори
ДАВЛАТ ГЕОЛОГИЯ ҚЎМИТАСИ ВА ЯПОНИЯНИНГ МЕТАЛЛ ҚАЗИБ ОЛУВЧИ АГЕНТЛИГИНИНГ БИРГАЛИКДАГИ ГЕОЛОГИЯ-ҚИДИРУВ ИШЛАРИ ТЎҒРИСИДА
 LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Япония Ҳукуматининг беғараз ёрдами доирасида Давлат геология қўмитасининг Япониянинг Металл қазиб олувчи Агентлиги билан биргаликдаги геология-қидирув ишлари самарали ўтказилишини таъминлаш мақсадида Вазирлар Маҳкамаси қарор қилади:
1. Вазирлар Маҳкамасининг «Япониянинг Металл қазиб олувчи Агентлиги билан самарали ҳамкорлик қилишни таъминлашга оид чора-тадбирлар тўғрисида» 1994 йил 16 сентябрдаги 470-сон қарорига мувофиқ, Ўзбекистон Республикаси Давлат геология ва минерал ресурслар қўмитаси томонидан Япония Агентлиги билан биргаликда Марказий Қизилқумда геология-қидирув ишлари ўтказилганлиги, Совутбой кони юқори сатҳларида қидирув ишлари тугалланганлиги ва Булуткон истиқболли майдони баҳоланганлиги маълумот учун қабул қилинсин.
2. Япониянинг Металл қазиб олувчи Агентлиги билан ҳамкорликни янада кенгайтириш мақсадида Япония томонига геологияга оид зарур материалларни тақдим этган ҳолда 1997—1999 йилларда Жанубий Нурота тоғи (Навоий вилояти) ҳудудида биргаликдаги геология-қидирув ишларини ташкил этиш юзасидан Давлат геология қўмитасининг таклифига розилик берилсин.
3. Олтинсой конида ва унга туташ Жанубий Нурота тоғи минтақасига қирувчи ҳудудларда геология-қидирув ишларини ўтказиш учун Япония томонидан ўтказиладиган валюта тушумларининг бир қисми Ўзбекистон Республикаси Марказий банкига мажбурий равишда сотишдан;
кўрсатиб ўтилган лойиҳанинг япониялик қатнашчилари геология тадқиқотлари ўтказиш ҳамда шахсий эҳтиёжлари учун Ўзбекистон Республикасига олиб келадиган асбоб-ускуналар, материаллар, мол-мулклар ва иккита енгил автомобиль учун солиқлар, бож пошлиналари ва йиғимлар тўлашдан озод қилинсин.
4. Ўзбекистон Республикаси Ташқи ишлар вазирлиги Япония гуруҳи аъзоларига консуллик йиғимлари ундирмасдан кўп марталик визалар берилишини таъминласин.
5. Ўзбекистон Республикаси Ички ишлар вазирлиги Давлат геология қўмитасининг буюртманомасига мувофиқ япон мутахассисларига йиғимлар ва давлат пошлинаси ундирмасдан кўп марталик визалар берилишини, уларнинг миллий паспортлари рўйхатдан ўтказилиши ҳамда муддати узайтирилишини таъминласин.
6. Ўзбекистон Республикаси Соғлиқни сақлаш вазирлиги тўлов асосида япон гуруҳи аъзоларига малакали хизмат кўрсатилишини ташкил этишда кўмаклашсин.
7. Мазкур қарорнинг бажарилишини назорат қилиш Бош вазир Ў. Т. Султонов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
1997 йил 24 декабрь,
567-сон