|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
ЯПОНИЯ ҲУКУМАТИНИНГ БЕҒАРАЗ ЁРДАМИДАН САМАРАЛИ ФОЙДАЛАНИШ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Япония Ҳукуматининг қишлоқ хўжалиги техникаси ва асбоб-ускуналари етказиб беришни ташкил этиш учун 500 млн Япония йени миқдоридаги беғараз ёрдамидан самарали фойдаланиш мақсадида Вазирлар Маҳкамаси қарор қилади:
1. Ўзбекистон Республикаси Бош вазирининг ўринбосари Т.Х. Холтоев Ўзбекистон Республикаси Ҳукумати номидан Айирбошлаш нотасини имзолашга вакил қилинсин.
2.Қуйидагилар:
беғараз ёрдамни олиш учун барча тартиботларни Япония томони билан келишилган муддатларда расмийлаштириш ва беғараз асосда ажратилаётган маблағларга хизмат кўрсатиш Ўзбекистон Республикаси қишлоқ ва сув хўжалиги вазирлигига;
юқорида кўрсатиб ўтилган беғараз ёрдамга ҳисоб-китоб хизмати кўрсатиш Ўзбекистон Республикаси Ташқи иқтисодий фаолият миллий банкига юклансин.
3. Беғараз ёрдам доирасида Ўзбекистон Республикасига келтирилаётган қишлоқ хўжалиги техникаси, асбоб-ускуналар, эҳтиёт қисмлар ва хизматлар божхона тўловлари, солиқлар, йиғимлар ва Йўл жамғармасига ажратмалардан озод қилинсин.
4. Ўзбекистон Республикаси Ташқи ишлар вазирлиги қишлоқ ва сув хўжалиги вазирлигининг буюртманомаларига кўра лойиҳани амалга оширишда қатнашаётган хорижий мутахассисларни консуллик йиғимлари ундирмасдан белгиланган тартибда келиш визалари билан таъминласин.
5. Ўзбекистон Республикаси Ички ишлар вазирлиги қишлоқ ва сув хўжалиги вазирлигининг буюртманомаларига кўра лойиҳанинг хорижий қатнашчиларини давлат божи ундирмасдан яшаш жойида вақтинчалик рўйхатдан ўтказсин, визалар ва вақтинчалик рўйхатдан ўтказиш муддатларини узайтирсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Т.Х. Холтоев зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2002 йил 4 апрель,
117-сон
