Миллий қадриятларнинг тикланишида Наврўз байрамининг аҳамиятини эътиборга олиб Вазирлар Маҳкамаси қарор қилади:

1. Ўзбекистон Республикаси Ёшлар Иттифоқи, «Фотон» ишлаб чиқариш бирлашмаси, Йўлдош Охунбобоев номидаги тўқимачилик ва енгил саноат институти, Тошкент шаҳар Октябрь ноҳияси «Янги шаҳар» маҳалласи жамоаси, Чортоқ шаҳар тикувчилик фабрикаси жамоаларининг 1992 йил 14 март куни «Наврўз» умумхалқ хайрия ҳашарини ўтказиш тўғрисидаги ҳамда Ўзбекистон Республикаси Давлат телерадио компанияси жамоаси, «Эл» халқаро уюшмаси, Ўзбекистон болалар жамғармаси, «Меҳр-шафқат ва саломатлик» жамғармаси, Республика Ногиронлар жамияти, Қизил Ярим ой жамияти жамоаларининг 1992 йил 21 март куни «Мустақиллик, тинчлик ва меҳр-шафқат» хайрия телемарафонини ўтказиш тўғрисидаги таклифлари маъқуллансин.

2. Меҳнат жамоаларининг «Мустақиллик, тинчлик ва меҳр-шафқат» шиори остида ўтказиладиган умумхалқ хайрия ҳашари ва телемарафонига раҳбарлик қилиш умумхалқ байрами Наврўзга тайёргарлик кўриш ва ўтказиш комиссиясига юклатилсин. Хайрия тадбирларини ўтказиш юзасидан республика вилоятлари, шаҳар, қишлоқ, маҳалла кенгашлари, вазирликлар, биржа ва барча турдаги корхона ва ташкилотлар аниқ режа асосида ташкилий ва амалий тадбирларни ишлаб чиқсинлар.

Хайрия ҳашаридан йиғилган ва ишлаб топилган маблағлар «Наврўз» хайрия жамғармасига топширилсин.

3. Шаҳар ва қишлоқларни ободонлаштириш, кўкаламзорлаштириш, кўчат ўтқазиш, боғлар яратиш, қабристонларни саришталаш ишларига алоҳида эътибор берилсин.

4. Ўзбекистон Республикаси Алоқа вазирлиги, Давлат банки телемарафон ўтказилаётган пайтда бир кеча-кундуз давомида маблағларни қабул қилиб олиш учун навбатчилик ишларини ташкил этсинлар.

5. Ўзбекистон Республикаси Ташқи ишлар вазирлиги Маданият вазирлиги билан биргаликда чет эллик ишбилармонлардан, маданият ходимларидан иборат барча меҳмонларнинг умумхалқ хайрия ишларида, байрамида ва телемарафонида иштирок этишлари учун қулай шарт-шароитлар яратсинлар.

6. Ўзбекистон Давлат телерадио компанияси, Маданият вазирлиги ва Давлат матбуот қўмитаси умумхалқ хайрия ишлари, Наврўз тантаналарини ва телемарафонининг маънавий ва тарбиявий, бадиий жиҳатдан юксак савияда ўтиши учун барча ижодий кучларни сафарбар этсинлар.