Davlat fuqarolik xizmatini salohiyatli va istiqbolli rahbar kadrlar bilan ta’minlashda nomzodlarning bilim va ko‘nikmalarini zamonaviy texnologiyalar asosida baholash hamda natijalarini tahlil qilish, shuningdek, rahbar kadrlar faoliyati samaradorligini oshirish yuzasidan manzilli choralar ko‘rish maqsadida Vazirlar Mahkamasi qaror qiladi:

1. O‘zbekiston Respublikasi Prezidenti huzuridagi Boshqaruv samaradorligi agentligining (keyingi o‘rinlarda — Agentlik) taklifiga asosan Agentlik muassisligida Rahbar kadrlarni baholash markazi (keyingi o‘rinlarda — Markaz) tashkil etilsin.

2. Quyidagilar Markazning asosiy vazifalari etib belgilansin:

ijtimoiy-psixologik tadqiqotlar asosida davlat fuqarolik xizmatchilari uchun bazaviy, alohida lavozim yoki lavozimlar guruhi uchun kompetensiyalar modeli hamda indikatorlarini ishlab chiqish;

davlat fuqarolik xizmatchilarini shaxsiy-professional diagnostika qilish, kompetensiyalar modeli asosida kompleks baholash;

kompetensiyalarni baholash jarayonida foydalanish uchun doimiy ravishda yangi uslublarni ishlab chiqish, o‘zlashtirish va joriy qilish;

kompetensiyalarni baholash natijalari asosida rahbar kadrlar uchun shaxsiy-professional rivojlanish trayektoriyasini ishlab chiqish va zamonaviy texnologiyalardan foydalangan holda amalga oshirish;

rahbarlik lavozimiga nomzodlarning umumiy kasbiy bilimi, qadriyatlari va aqliy salohiyatini aniqlash bo‘yicha test sinovlarini hamda psixologik so‘rovnomalar o‘tkazish;

rahbar kadrlar faoliyati samaradorligini baholash va monitoring qilish, kadrlarga bo‘lgan ehtiyojni prognoz qilish, ularni saralab olish va joy-joyiga qo‘yish jarayonlariga raqamli texnologiyalarni va zamonaviy usullarni keng joriy etish;

faoliyatining asosiy yo‘nalishlari bo‘yicha ekspert-tahliliy faoliyat, ilmiy tadqiqot va izlanishlarni olib borish.

3. Quyidagilar Markaz faoliyatini moliyalashtirish manbalari etib belgilansin:

Davlat xizmatini rivojlantirishni qo‘llab-quvvatlash jamg‘armasi mablag‘lari;

shartnoma asosida xizmatlar ko‘rsatishdan tushadigan tushumlar;

xalqaro moliya institutlari va xorijiy hukumat moliya tashkilotlarining grantlari va texnik ko‘maklari;

jismoniy va yuridik shaxslarning homiylik xayriyalari;

vaqtincha bo‘sh turgan mablag‘larni belgilangan tartibda tijorat banklari depozitlariga joylashtirishdan tushadigan daromadlar;

qonunchilik hujjatlari bilan taqiqlanmagan boshqa manbalar.

4. Belgilansinki:

Markaz davlat muassasasi shaklidagi yuridik shaxs hisoblanadi, O‘zbekiston Respublikasi Davlat gerbi tasviri tushirilgan muhrga va blankalarga, O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida hisobvaraqlariga ega bo‘ladi;

Markazning ustavi, tashkiliy tuzilmasi, shu jumladan, shtat birliklari soni va xodimlarning mehnatga haq to‘lash va moddiy rag‘batlantirish shartlari Agentlik tomonidan belgilanadi. Markazning shtatlar jadvali va xarajatlar smetasi O‘zbekiston Respublikasi Iqtisodiyot va moliya vazirligi tomonidan ro‘yxatdan o‘tkaziladi;

Markazga Agentlik direktori tomonidan lavozimga tayinlanadigan va lavozimdan ozod etiladigan direktor rahbarlik qiladi;

Markaz direktori o‘rinbosari va xodimlari Agentlik bilan kelishilgan holda, Markaz direktori tomonidan lavozimga tayinlanadi va lavozimdan ozod etiladi;

Markaz tomonidan davlat fuqarolik xizmatchilari kompetensiyalarini baholash shartnoma asosida amalga oshiriladi;

Markazga homiylik va grant mablag‘lari hisobidan berilgan asosiy vositalarni sotishdan tushgan pul mablag‘lari (ushbu pul mablag‘lari hisobidan sotib olingan asosiy vositalarni sotishdan tushgan pul mablag‘lari) to‘liq miqdorda Markaz ixtiyorida qoladi hamda maqsadli ravishda uning moddiy-texnika bazasini mustahkamlash va rivojlantirish, shu jumladan transport vositalarini xarid qilish uchun yo‘naltiriladi.

5. Markazga quyidagi huquqlar berilsin:

o‘z faoliyatini samarali amalga oshirishi uchun tegishli soha bo‘yicha malakali mutaxassislar va ekspertlarni, shu jumladan, xorijiy ekspertlarni belgilangan tartibda to‘g‘ridan-to‘g‘ri shartnoma asosida jalb qilish;

Agentlik va boshqa buyurtmachilar bilan to‘g‘ridan-to‘g‘ri tuziladigan xizmat ko‘rsatish shartnomasi asosida faoliyatining asosiy yo‘nalishlari doirasida daromad keltiradigan faoliyat bilan shug‘ullanish, davlat fuqarolik xizmatida zamonaviy raqamli texnologiyalarni joriy etish bo‘yicha axborot dasturlarini ishlab chiqish.

6. Markaz Toshkent shahar hokimligi huzuridagi “Munitsipal aktivlarni boshqarish markazi” DUKga tegishli Toshkent shahar, Chilonzor tumani, Islom Karimov ko‘chasi, 55-uy manzilidagi binoning 1-qavatida tekin foydalanish huquqi asosida joylashtirilsin.

7. Markazga bitta yengil avtomashina va bitta mikroavtobus saqlash uchun limit ajratilsin.

8. Agentlik bir oy muddatda Markazning ustavi, tashkiliy tuzilmasi, shu jumladan, shtat birliklari soni va xodimlarning mehnatga haq to‘lash va moddiy rag‘batlantirish shartlarini belgilash hamda Markazni davlat ro‘yxatidan o‘tkazish choralarini ko‘rsin.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — iqtisodiyot va moliya vaziri J.A. Qo‘chqorov zimmasiga yuklansin.