Oʻzbekiston Respublikasi Milliy gvardiyasi kontrakt boʻyicha harbiy xizmatchi va maxsus unvonga ega xodimlarining jamoat tartibini saqlash va qoʻriqlanadigan shaxslarning xavfsizligini taʼminlashdagi faoliyatining tezkorligi va samaradorligini oshirish, shuningdek, ularni ijtimoiy qoʻllab-quvvatlashni kengaytirish hamda Milliy gvardiyaning kontrakt boʻyicha harbiy xizmatchilari va maxsus unvonga ega xodimlariga mamlakatda ishlab chiqarilgan yengil avtotransport vositalari sotib olish uchun imtiyozli kreditlar berilishini tashkil etishga koʻmaklashish maqsadida Vazirlar Mahkamasi qaror qiladi:

1. Oʻzbekiston Respublikasi Milliy gvardiyasi (keyingi oʻrinlarda Milliy gvardiya deb ataladi), “Oʻzavtosanoat” AJ va Oʻzbekiston Respublikasi Tashqi iqtisodiy faoliyat milliy bankining Milliy gvardiyaning jangovar va maʼnaviy-maʼrifiy tayyorgarlikda oʻrnak koʻrsatgan kontrakt boʻyicha harbiy xizmatchi (keyingi oʻrinlarda harbiy xizmatchi deb ataladi) va maxsus unvonga ega xodimlariga (keyingi oʻrinlarda xodimlar deb ataladi) mamlakatda ishlab chiqarilgan yengil avtotransport vositalarini (keyingi oʻrinlarda avtotransport vositalari deb ataladi) sotib olish uchun imtiyozli kreditlar berish toʻgʻrisidagi takliflariga rozilik berilsin.

2. Oʻzbekiston Respublikasi Tashqi iqtisodiy faoliyat milliy bankining Milliy gvardiya tomonidan beriladigan taqdimnomalarga muvofiq Milliy gvardiya harbiy xizmatchilari va xodimlariga yiliga 300 tagacha avtotransport vositalarini sotib olish uchun quyidagi shartlarda imtiyozli kreditlar ajratish toʻgʻrisidagi taklifi maʼqullansin:

kredit muddati — 5 yilgacha;

dastlabki badal — sotib olinadigan avtotransport vositasi qiymatining kamida 20 foizi miqdorida;

kredit boʻyicha foiz stavkasi — 2019-yil 31-dekabrga qadar Oʻzbekiston Respublikasi Markaziy bankining kredit berish sanasida amalda boʻlgan qayta moliyalashtirish stavkasi plyus 2 (ikki) foiz miqdorida. 2020-yil 1-yanvardan boshlab kreditlar tijorat banklari tomonidan bozor tamoyillari asosida mustaqil belgilanadigan stavkalarda beriladi;

kredit boʻyicha taʼminot — kredit boʻyicha sotib olinadigan avtotransport vositasini garovga qoʻyish.

Kreditning boshqa shartlari mazkur bankning kredit siyosati va amaldagi qonunchilikka asosan amalga oshiriladi.

3. “Oʻzavtosanoat” AJga Milliy gvardiyaning taqdimnomalari boʻyicha Milliy gvardiyaning avtotransport vositalarini sotib olishni xohlovchi harbiy xizmatchilari va xodimlariga banklarning kreditlari hisobiga ushbu avtotransport vositalarini sotib olishda koʻmaklashish tavsiya etilsin.

4. Oʻzbekiston Respublikasi Milliy gvardiyasi:

avtotransport vositalarini sotib olish uchun imtiyozli kredit olishga tavsiya etiladigan harbiy xizmatchi va xodimlarni tanlab olish hamda taqdimnomalar berish mezonlarini ishlab chiqsin;

Milliy gvardiya harbiy xizmatchilari va xodimlari oʻrtasida kreditlarni olish shartlari va tartibi toʻgʻrisida keng tushuntirish ishlari olib borilishini tashkil etsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri D.A. Kuchkarov va Milliy gvardiya qoʻmondoni B.X. Tashmatov zimmasiga yuklansin.