Ushbu Qonunning maqsadi shaharcha, qishloq, ovul, shuningdek shaharlardagi, shaharchalardagi, qishloqlardagi, ovullardagi mahalla fuqarolar yigʻini (bundan buyon matnda fuqarolar yigʻini deb yuritiladi) raisi saylovini tashkil etish va oʻtkazish sohasidagi munosabatlarni tartibga solishdan iborat.

Fuqarolar yigʻini raisi saylovi toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Fuqarolar yigʻini raisi saylovida Oʻzbekiston Respublikasi fuqarolarining (bundan buyon matnda fuqarolar deb yuritiladi) ishtirok etishi ixtiyoriy va erkindir. Fuqarolarni saylovda ishtirok etishga yoki ishtirok etmaslikka majbur qilish maqsadida ularga taʼsir koʻrsatishga, shuningdek ularning oʻz xohish-irodasini erkin bildirishiga taʼsir koʻrsatishga hech kim haqli emas.

Fuqarolar yigʻini raisini saylash huquqiga saylov kuni oʻn sakkiz yoshga toʻlgan hamda shaharcha, qishloq, ovul, shuningdek shahardagi, shaharchadagi, qishloqdagi, ovuldagi mahalla hududida (bundan buyon matnda tegishli hudud deb yuritiladi) doimiy yashovchi fuqarolar ega boʻladi.

Sud tomonidan muomalaga layoqatsiz deb topilgan fuqarolar fuqarolar yigʻini raisi saylovida ishtirok etishi mumkin emas.

Fuqarolar yigʻini raisi saylovida fuqarolarning ishtirok etish huquqlarini biron-bir tarzda bevosita yoki bilvosita cheklash taqiqlanadi.

Fuqarolar yigʻini raisi saylovini tashkil etish va oʻtkazish oshkoralik, muqobillik hamda teng saylov huquqi prinsiplari asosida amalga oshiriladi.

Fuqarolar yigʻini raisi saylovini tashkil etish va oʻtkazish ochiq hamda oshkora amalga oshiriladi.

Fuqarolar yigʻini raisi saylovi tashkil etilayotganda hamda oʻtkazilayotganda fuqarolar yigʻini (fuqarolar vakillarining yigʻilishi) oʻtkaziladigan sana, vaqt va joy toʻgʻrisida fuqarolar voqif etiladi, fuqarolar yigʻini raisi lavozimiga nomzodlar haqida, ovoz berish yakunlari toʻgʻrisida xabardor qilinadi.

Fuqarolar yigʻini raisi saylovini tashkil etish va oʻtkazish, fuqarolar yigʻini (fuqarolar vakillarining yigʻilishi) oʻtkaziladigan sana, vaqt va joy, fuqarolar yigʻini raisilavozimiga nomzodlar toʻgʻrisidagi axborot Qoraqalpogʻiston Respublikasi, viloyatlar va Toshkent shahar mahallani qoʻllab-quvvatlash kengashlarining rasmiy veb-saytlariga saylov oʻtkazilishidan kamida besh kun oldin joylashtiriladi.

Fuqarolar yigʻini raisi saylovini tashkil etish va oʻtkazish jarayoni ommaviy axborot vositalari tomonidan yoritib boriladi.

Fuqarolar yigʻini raisi saylovi fuqarolar yigʻini raisi lavozimiga ikki va undan koʻp nomzod koʻrsatilgan holda amalga oshiriladi.

Fuqarolar yigʻini raisini saylashda fuqarolar jinsi, irqi, millati, tili, dini, eʼtiqodi, ijtimoiy kelib chiqishi, ijtimoiy mavqeyidan qatʼi nazar teng saylov huquqiga egadir.

Fuqarolar yigʻini raisini saylashda fuqarolar yigʻinining (fuqarolar vakillari yigʻilishining) har bir ishtirokchisi bir ovozga ega boʻladi.

Fuqarolar yigʻini raisi fuqarolar yigʻini tomonidan, fuqarolar yigʻinini chaqirish imkoni boʻlmagan taqdirda esa, fuqarolar vakillarining yigʻilishi tomonidan besh yilga saylanadi.

Fuqarolar yigʻini raisi saylovini tashkil etish va oʻtkazishda davlat organlari fuqarolar yigʻinlariga koʻmaklashadi, zarur hollarda esa ularni binolar, transport va aloqa vositalari bilan taʼminlashi shart.

Fuqarolar yigʻini raisi saylovini oʻtkazish muddatlari saylov boshlanishidan kamida ikki oy oldin Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari tomonidan belgilanadi. Bunda saylov vakolatlari muddati tugagan fuqarolar yigʻini raisi lavozimiga oʻtkaziladi.

Fuqarolar yigʻini raisi sayloviga tayyorgarlik tadbirlarini oʻtkazish muddatlari va tartibi Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari tomonidan belgilanadi.

Oʻzbekiston Respublikasining butun hududida yoki ayrim joylarida joriy etilgan favqulodda holat amal qilishining butun muddati davomida fuqarolar yigʻini raisi saylovi oʻtkazilmaydi.

Fuqarolar yigʻinlari raislari saylovini tashkil etish va oʻtkazishda fuqarolar yigʻinlariga amaliy yordam koʻrsatish uchun Qoraqalpogʻiston Respublikasi, viloyatlar, Toshkent shahar, tumanlar va shaharlar hududida tegishincha Qoraqalpogʻiston Respublikasi, viloyatlar, Toshkent shahar, tumanlar va shaharlar komissiyalari (bundan buyon matnda komissiyalar deb yuritiladi) tuziladi.

Komissiyalar Qoraqalpogʻiston Respublikasi Joʻqorgʻi Kengesi, tegishli xalq deputatlari viloyat, Toshkent shahar, tuman va shahar Kengashining qarori bilan tuziladi. Komissiyalar fuqarolar yigʻini raisining navbatdagi saylovi eʼlon qilinganidan keyin oʻz faoliyatini tugatadi.

Komissiyalar tarkibiga, qoida tariqasida, Qoraqalpogʻiston Respublikasi Joʻqorgʻi Kengesi, tegishli xalq deputatlari viloyat, Toshkent shahar, tuman va shahar Kengashi deputatlari, fuqarolar yigʻinlarining, davlat organlarining, nodavlat notijorat tashkilotlarining vakillari kiritiladi.

Fuqarolar yigʻini raisi lavozimiga nomzodlar komissiyaga aʼzo shaxslar yoxud ularning yaqin qarindoshlari orasidan koʻrsatilgan taqdirda, ular komissiya tarkibidan chiqariladi.

Tegishincha Qoraqalpogʻiston Respublikasi, viloyatlar, Toshkent shahar, tumanlar va shaharlar mahallani qoʻllab-quvvatlash kengashlarining ijro apparatlari komissiyalarning ishchi organlaridir.

Fuqarolar yigʻinlari raislari saylovini tashkil etish va oʻtkazishga koʻmaklashuvchi Qoraqalpogʻiston Respublikasi, viloyatlar va Toshkent shahar komissiyalarining vakolatlari jumlasiga quyidagilar kiradi:

fuqarolar yigʻinlari raislari saylovini tashkil etish va oʻtkazish;

fuqarolar yigʻinlari raislari saylovini tashkil etish va oʻtkazishga koʻmaklashuvchi tumanlar va shaharlar komissiyalari faoliyatini muvofiqlashtirish;

fuqarolar yigʻinlari raislari sayloviga doir hujjatlarning namunalarini, shuningdek saylov byulletenlarining namunalari va shakllarini tasdiqlash;

fuqarolar yigʻinlari raislari saylovini tashkil etish va oʻtkazishga koʻmaklashuvchi tumanlar va shaharlar komissiyalarining saylovni samarali oʻtkazish uchun zarur boʻlgan normativ-huquqiy hujjatlar va boshqa hujjatlar bilan taʼminlanishini tashkil etish;

fuqarolar yigʻinlari raislari saylovini oʻtkazish masalalari yuzasidan aholi oʻrtasida tushuntirish ishlarini tashkil etish;

fuqarolar yigʻinlari raislari saylovini tashkil etish va oʻtkazish jarayonining ommaviy axborot vositalarida yoritilishini tashkil etish;

fuqarolar yigʻinlari raislari saylovini tashkil etish va oʻtkazish masalalari boʻyicha fuqarolarning murojaatlarini koʻrib chiqish;

saylov yakunlari toʻgʻrisida tegishli komissiyalar tomonidan taqdim etilgan axborotni umumlashtirish va koʻrib chiqish, bu axborotni keng jamoatchilik eʼtiboriga yetkazish.

Fuqarolar yigʻinlari raislari saylovini tashkil etish va oʻtkazishga koʻmaklashuvchi tumanlar va shaharlar komissiyalari oʻz vakolatlari doirasida:

fuqarolar yigʻini raisi saylovi toʻgʻrisidagi qonunchilikning ijrosini taʼminlaydi;

fuqarolar yigʻinlari raislari saylovini tashkil etish va oʻtkazish boʻyicha ishchi guruhlarning (bundan buyon matnda ishchi guruh deb yuritiladi) faoliyatini muvofiqlashtirib boradi;

fuqarolar yigʻinlari raislari saylovini tashkil etish va oʻtkazish masalalari boʻyicha aholi oʻrtasida tushuntirish ishlarini tashkil etadi;

hovlilar, uylar, koʻchalardan fuqarolarning vakillik normasini belgilaydi;

ishchi guruhlardan fuqarolar yigʻinlari raislari lavozimiga nomzodlarga doir hujjatlarni keyinchalik tegishli tumanlar, shaharlar hokimlari bilan kelishish uchun qabul qilib oladi;

ishchi guruhlarning fuqarolar yigʻinlari raislari saylovini tashkil etish va oʻtkazish bilan bogʻliq masalalar boʻyicha axborotini eshitadi;

tegishli hududda fuqarolar yigʻinlari raislari saylovi yakunlarini chiqaradi hamda tegishincha fuqarolar yigʻinlari raislari saylovini tashkil etish va oʻtkazishga koʻmaklashuvchi Qoraqalpogʻiston Respublikasi, viloyatlar va Toshkent shahar komissiyalariga axborot taqdim etadi;

fuqarolar yigʻinlari raislari saylovini tashkil etish va oʻtkazish masalalari boʻyicha fuqarolarning murojaatlarini koʻrib chiqadi;

fuqarolar yigʻinlari raislari saylovini tashkil etish va oʻtkazish bilan bogʻliq hujjatlarning arxivga yoki idoraviy arxivga topshirilishini taʼminlaydi.

Fuqarolar yigʻini raisi saylovini tashkil etish va oʻtkazish uchun fuqarolar yigʻini (fuqarolar vakillarining yigʻilishi) qarori bilan ishchi guruh tuziladi. Fuqarolar yigʻini raisi saylovi natijalari eʼlon qilinganidan keyin ishchi guruh oʻz faoliyatini tugatadi.

Ishchi guruh tarkibiga, qoida tariqasida, fuqarolar yigʻinining, tegishli hududda joylashgan nodavlat notijorat tashkilotlarining va boshqa tashkilotlarning vakillari, shuningdek tegishli xalq deputatlari tuman (shahar) Kengashining deputati kiritiladi. Fuqarolar yigʻini raisi, uning maslahatchilari, fuqarolar yigʻini organlarining boshqa xodimlari, shuningdek fuqarolar yigʻini raisi lavozimiga nomzodlarning, fuqarolar yigʻini organlari boshqa xodimlarining yaqin qarindoshlari ishchi guruh tarkibiga kiritilishi mumkin emas.

Fuqarolar yigʻini raisi lavozimiga nomzodlar ishchi guruhga aʼzo shaxslar yoxud ularning yaqin qarindoshlari orasidan koʻrsatilgan taqdirda, ular ishchi guruh tarkibidan chiqariladi.

Ishchi guruh:

fuqarolar yigʻini (fuqarolar vakillarining yigʻilishi) oʻtkaziladigan sana, vaqt va joyni belgilaydi hamda uni oʻtkazishdan kamida besh kun oldin bu haqda tegishli hududda yashovchi fuqarolarni xabardor qiladi;

hovlilar, uylar, koʻchalar aholisining fuqarolar vakillari saylovi boʻyicha umumiy yigʻilishlarini tashkil etadi va oʻtkazadi;

hovlilar, uylar, koʻchalar aholisi umumiy yigʻilishining ishtirokchilarini roʻyxatga oladi hamda fuqarolarning saylangan vakillari haqidagi maʼlumotlarni koʻrsatgan holda aholining umumiy yigʻilishi bayonnomasini tuzadi;

tegishli komissiyaga taqdim etish uchun fuqarolar yigʻini raisi lavozimiga nomzodlar boʻyicha takliflarni tegishli hududda doimiy yashovchi fuqarolarning fikrini inobatga olgan holda tayyorlaydi;

fuqarolar yigʻini raisi saylovini tashkil etish va oʻtkazish masalalari yuzasidan aholi oʻrtasida tushuntirish ishlarini olib boradi;

fuqarolar yigʻini raisining takroriy saylovi, shuningdek boʻshab qolgan oʻrinlarga fuqarolar yigʻini raisi saylovi oʻtkazilishini tashkil etadi;

fuqarolar yigʻini raisi saylovini tashkil etish va oʻtkazish masalalari boʻyicha fuqarolarning murojaatlarini koʻrib chiqadi.

Fuqarolar yigʻini raisi lavozimiga nomzodlar koʻrsatish tegishli hududda doimiy yashovchi fuqarolarning fikri inobatga olingan holda ishchi guruh tomonidan amalga oshiriladi.

Ishchi guruh fuqarolar yigʻini raisi lavozimiga nomzodlarga doir hujjatlarni tayyorlaydi va tuman yoki shahar hokimi bilan kelishish uchun tegishli komissiyaga saylovdan kamida oʻn kun oldin taqdim etadi. Hujjatlarga fuqarolar yigʻini raisi lavozimiga nomzodlarning oʻz nomzodi koʻrsatilishiga yozma roziligi ilova qilinadi.

Tuman yoki shahar hokimi fuqarolar yigʻini raisi lavozimiga taqdim etilgan nomzodlarning hujjatlarini koʻrib chiqadi va oʻzining ushbu nomzodlar boʻyicha asoslantirilgan xulosalarini keyinchalik ishchi guruhlarga topshirish uchun tegishli komissiyalarga yuboradi.

Ishchi guruh tuman yoki shahar hokimining xulosasini olganidan keyin fuqarolar yigʻini raisi lavozimiga kelishilgan nomzodlar haqidagi axborotni saylovdan kamida besh kun oldin fuqarolar yigʻini binosiga va guzarlarga osib qoʻyadi.

Fuqarolar yigʻini raisi lavozimiga nomzodlar Oʻzbekiston Respublikasi fuqarolari boʻlishi, qoida tariqasida, oliy maʼlumotga ega boʻlishi, bevosita saylovga qadar kamida besh yil tegishli hududda doimiy yashayotgan boʻlishi, tashkilotchilik qobiliyatiga, davlat organlarida yoki nodavlat notijorat tashkilotlarida yoxud tadbirkorlik va boshqa xoʻjalik faoliyati sohasida ish tajribasiga, shuningdek hayotiy tajribaga va aholi oʻrtasida obroʻ-eʼtiborga ega boʻlishi kerak.

Sud tomonidan muomalaga layoqatsiz deb topilgan, ogʻir yoxud oʻta ogʻir jinoyatlarni sodir etganlik uchun sudlanganlik holati tugallanmagan yoki sudlanganligi olib tashlanmagan shaxslar, shuningdek sudning hukmi bilan ozodlikdan mahrum etish joylarida saqlanayotgan, haqiqiy harbiy xizmatdagi shaxslar, diniy tashkilotlarning professional xizmatchilari fuqarolar yigʻini raisi lavozimiga saylanish uchun nomzod etib koʻrsatilishi mumkin emas.

Fuqarolar yigʻini (fuqarolar vakillarining yigʻilishi) “Fuqarolarning oʻzini oʻzi boshqarish organlari toʻgʻrisida”gi Oʻzbekiston Respublikasi Qonunida belgilangan tartibda chaqiriladi va oʻtkaziladi.

Fuqarolar vakillarining yigʻilishiga hovlilar, uylar, koʻchalardan fuqarolarning vakillari yuboriladi.

Tashkilotchilik qobiliyatiga, hayotiy tajribaga va aholi oʻrtasida obroʻ-eʼtiborga ega boʻlgan fuqarolar, qoida tariqasida, fuqarolarning vakillari boʻlishi mumkin.

Fuqarolar yigʻini raisi lavozimiga nomzodlar fuqarolar vakillari yoxud ularning yaqin qarindoshlari orasidan koʻrsatilgan taqdirda, ular fuqarolar vakillari tarkibidan chiqariladi.

Vakillik normasini tegishli komissiya belgilaydi. Bunda fuqarolar vakillarining soni saylovda ishtirok etish huquqiga ega boʻlgan fuqarolar umumiy sonining kamida oʻn ikki foizini tashkil etishi kerak.

Fuqarolar yigʻini (fuqarolar vakillarining yigʻilishi) ishchi guruhning rahbari raisligida oʻtkaziladi.

Fuqarolar yigʻini (fuqarolar vakillarining yigʻilishi) kun tartibiga, qoida tariqasida, quyidagi masalalar kiritiladi:

sanoq komissiyasini saylash;

fuqarolar yigʻini raisini saylash.

Fuqarolar yigʻinida (fuqarolar vakillarining yigʻilishida) fuqarolar yigʻinining (fuqarolar vakillari yigʻilishining) ish reglamenti, shu jumladan fuqarolar yigʻini raisi lavozimiga nomzodlarning maʼruzalari, ularning muhokamasi, savollar va javoblar uchun vaqt belgilanadi.

Fuqarolar yigʻini raisi saylovi boʻyicha ovoz berish natijalarini aniqlash uchun fuqarolar yigʻini (fuqarolar vakillarining yigʻilishi) tomonidan kamida uch kishidan iborat tarkibda sanoq komissiyasi saylanadi.

Fuqarolar yigʻinida (fuqarolar vakillarining yigʻilishida) raislik qiluvchi fuqarolar yigʻini raisi lavozimiga nomzodlarni eʼlon qiladi. Shundan soʻng fuqarolar yigʻinida (fuqarolar vakillarining yigʻilishida) raislik qiluvchi fuqarolar yigʻini raisi lavozimiga nomzodlarning har biriga soʻz beradi.

Fuqarolar yigʻini raisi lavozimiga nomzodlarning maʼruzasi alifbo tartibida oʻtkazilib, nomzodlar oʻzining kelgusi faoliyati dasturini eʼlon qiladi.

Fuqarolar yigʻini raisini saylash yashirin ovoz berish orqali amalga oshiriladi.

Fuqarolar yigʻini raisi saylovi boʻyicha ovoz berish oʻtkazilayotganda fuqarolar yigʻini (fuqarolar vakillarining yigʻilishi) ishtirokchilariga saylov byulletenlari (bundan buyon matnda byulleten deb yuritiladi) sanoq komissiyasi tomonidan beriladi.

Byulletenga fuqarolar yigʻini raisi lavozimiga nomzodlarning familiyasi, ismi, otasining ismi alifbo tartibida kiritiladi.

Fuqarolar yigʻini raisini saylashda byulletenlarni berish bevosita ovoz berishdan oldin boshlanadi.

Byulleten ovoz beruvchi tomonidan yashirin ovoz berish kabinasida yoki xonasida toʻldiriladi. Ovoz beruvchi byulletenning oʻng tomonida oʻzi yoqlab ovoz berayotgan fuqarolar yigʻini raisi lavozimiga nomzodning familiyasi qarshisida joylashgan boʻsh katakka “+”, “” yoxud “x” belgisini qoʻyadi.

Ovoz beruvchi toʻldirilgan byulletenni saylov qutisiga tashlaydi.

Saylov qutilari ovoz berish tugaganidan keyin sanoq komissiyasi tomonidan ochiladi.

Ovozlar sanoq komissiyasi tomonidan fuqarolar yigʻini raisi lavozimiga har bir nomzod boʻyicha sanab chiqiladi.

Ovozlarni sanash natijalari boʻyicha sanoq komissiyasi tomonidan bayonnoma tuziladi va bayonnoma sanoq komissiyasining raisi hamda aʼzolari tomonidan imzolanadi.

Sanoq komissiyasining bayonnomasida quyidagilar koʻrsatiladi:

fuqarolar yigʻini (fuqarolar vakillarining yigʻilishi) ishtirokchilarining umumiy soni;

ovoz berishda ishtirok etgan fuqarolar yigʻini (fuqarolar vakillarining yigʻilishi) ishtirokchilari soni;

ovoz berish oʻtkazilganida byulletenlar olgan fuqarolar yigʻini (fuqarolar vakillarining yigʻilishi) ishtirokchilari soni;

fuqarolar yigʻini raisi lavozimiga har bir nomzodni yoqlab berilgan ovozlar soni;

ovoz berish oʻtkazilayotganda haqiqiy emas deb topilgan byulletenlar soni.

Sanoq komissiyasining bayonnomasi sanoq komissiyasining raisi tomonidan oʻqib eshittiriladi va fuqarolar yigʻini (fuqarolar vakillarining yigʻilishi) tomonidan tasdiqlanadi.

Ovoz berishda ishtirok etgan fuqarolarning yarmidan koʻprogʻining ovozini olgan nomzod fuqarolar yigʻini raisi lavozimiga saylangan deb hisoblanadi.

Fuqarolar yigʻini (fuqarolar vakillarining yigʻilishi) saylov yakunlari boʻyicha qaror qabul qiladi, bu qaror fuqarolar yigʻinida (fuqarolar vakillarining yigʻilishida) raislik qiluvchi tomonidan oʻqib eshittiriladi.

Fuqarolar yigʻini (fuqarolar vakillarining yigʻilishi) bayonnomasi ikki nusxada tuzilib, bir nusxasi saylov yakunlarini umumlashtirish uchun tegishli tuman va shahar komissiyasiga taqdim etiladi.

Tegishli tuman va shahar komissiyalari fuqarolar yigʻinlari raislari saylovi yakunlariga doir umumlashtirilgan maʼlumotlarni yuqori turuvchi komissiyaga topshiradi.

Agar fuqarolar yigʻini raisi saylovida fuqarolar yigʻinida ishtirok etuvchilar roʻyxatiga kiritilgan fuqarolarning yarmidan kamrogʻi ishtirok etgan boʻlsa, saylov oʻtmagan deb topiladi. Fuqarolar yigʻini raisi saylovi fuqarolar vakillarining yigʻilishlarida oʻtkazilgan taqdirda, agar yigʻilishda hovlilar, uylar, koʻchalardan fuqarolar vakillarining uchdan ikki qismidan kamrogʻi ishtirok etgan boʻlsa, saylov oʻtmagan deb topiladi.

Fuqarolar yigʻini raisi saylovi davomida yoki ovozlarni sanab chiqishda yoʻl qoʻyilgan va ovoz berish yakunlariga taʼsir qilgan qoidabuzarliklar tufayli saylov sud tomonidan haqiqiy emas deb topilishi mumkin.

Agar fuqarolar yigʻini raisi lavozimiga ikki nafardan ortiq nomzod koʻrsatilgan va ulardan birontasi ham saylanmagan boʻlsa, fuqarolar yigʻini (fuqarolar vakillarining yigʻilishi) eng koʻp ovoz olgan ikki nomzod boʻyicha takroriy ovoz berishni oʻtkazish toʻgʻrisida qaror qabul qiladi.

Takroriy ovoz berish ushbu Qonun talablariga rioya etilgan holda oʻtkaziladi.

Takroriy ovoz berish chogʻida ovoz berishda ishtirok etgan fuqarolarning ovozini boshqa nomzodga nisbatan koʻproq olgan nomzod fuqarolar yigʻini raisi lavozimiga saylangan hisoblanadi.

Fuqarolar yigʻini raisi takroriy saylovi quyidagi hollarda oʻtkaziladi, agar:

avvalgi saylov oʻtmagan yoki haqiqiy emas deb topilgan boʻlsa;

takroriy ovoz berish fuqarolar yigʻini raisi saylanganligini aniqlash imkonini bermasa;

fuqarolar yigʻinida (fuqarolar vakillarining yigʻilishida) fuqarolar yigʻini raisi lavozimiga koʻpi bilan ikki nafar nomzod koʻrsatilgan hamda ulardan birontasi ham saylanmagan boʻlsa.

Fuqarolar yigʻini raisi takroriy saylovi ushbu Qonun talablariga rioya etilgan holda bir oylik muddatdan kechiktirmasdan oʻtkaziladi.

Fuqarolar yigʻini raisi vakolatlari muddatidan ilgari tugatilgan taqdirda, tegishli fuqarolar yigʻinlarida ushbu Qonunning talablariga rioya etilgan holda yangi saylov oʻtkaziladi.

Boʻshab qolgan oʻrinlarga fuqarolar yigʻinlari raislari besh yil muddatga saylanadi.

Fuqarolar yigʻinining (fuqarolar vakillari yigʻilishining) fuqarolar yigʻini raisi saylovi natijalari boʻyicha qarori ustidan sudga shikoyat qilinishi mumkin.

Fuqarolar yigʻini raisi saylovi natijalari boʻyicha fuqarolar yigʻini (fuqarolar vakillarining yigʻilishi) bir oy ichida fuqarolar yigʻini kengashini shakllantiradi, fuqarolar yigʻini raisining maslahatchilarini, fuqarolar yigʻini faoliyatining asosiy yoʻnalishlari boʻyicha komissiyalarni va taftish komissiyasini saylaydi.

Fuqarolar yigʻini raisi saylovi toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

Quyidagilar oʻz kuchini yoʻqotgan deb topilsin:

1) Oʻzbekiston Respublikasining 2004-yil 29-aprelda qabul qilingan “Fuqarolar yigʻini raisi (oqsoqoli) va uning maslahatchilari saylovi toʻgʻrisida”gi 609-II-sonli Qonuni (Oʻzbekiston Respublikasi Oliy Majlisining Axborotnomasi, 2004-yil, № 5, 78-modda);

2) Oʻzbekiston Respublikasining 2013-yil 22-aprelda qabul qilingan “Fuqarolar yigʻini raisi (oqsoqoli) va uning maslahatchilari saylovi toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida”gi OʻRQ-351-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2013-yil, № 4, 97-modda);

3) Oʻzbekiston Respublikasining 2018-yil 18-aprelda qabul qilingan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-476-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2018-yil, № 4, 224-modda) 47-moddasi.

Oʻzbekiston Respublikasi Vazirlar Mahkamasi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran kuchga kiradi.