Jahon bozorida barqaror talabga ega, yuqori qoʻshilgan qiymatli raqobatdosh toʻqimachilik mahsulotlari ishlab chiqarishni taʼminlash, shuningdek, kimyo xomashyosini chuqur qayta ishlash boʻyicha zamonaviy ilmiy yutuqlar va taraqqiy etgan innovatsiya texnologiyalarini koʻllagan holda toʻqimachilik tarmogʻida yangi investitsiya loyihalarini amalga oshirish uchun xomashyo bazasini kengaytirish, ichki sanoat kooperatsiyasini hamda import oʻrnini egallaydigan mahsulotlar ishlab chiqarishni mahalliylashtiruvchi korxonalarni rivojlantirish maqsadida:

1. Oʻzbekiston Respublikasi Tashqi iqtisodiy faoliyat milliy banki, “Oʻzbekyengilsanoat” aksiyadorlik jamiyati hamda “Namangan sharbati” masʼuliyati cheklangan jamiyat shaklidagi qoʻshma korxonasi (keyingi oʻrinlarda — “Namangan sharbati” MChJ QK)ning “Namangan sharbati” MChJ QK negizida:

10,0 ming tonna poliefir tolasi;

10,0 ming tonna poliefir ipi;

20,0 mln. p.m. aralash tolali gazlamalar;

7,0 ming tonna aralash tolali polotnolar;

6,0 mln. dona aralash tolali toʻqimachilik mahsulotlari ishlab chiqarish quvvatlarini 2018-yilda ishga tushirgan holda aralash tolali toʻqimachilik mahsulotlari ishlab chiqarish boʻyicha yangi korxonani tashkil etish loyihasi (keyingi oʻrinlarda — loyiha)ni amalga oshirish toʻgʻrisidagi taklifiga rozilik berilsin.

2. Belgilansinki, umumiy qiymati 92,0 mln. AQSh dollari boʻlgan loyihani moliyalashtirish “Namangan sharbati” MChJ QKning 30,0 mln. AQSh dollari miqdoridagi shaxsiy mablagʻlari, shuningdek, Oʻzbekiston Respublikasi Tashki iqtisodiy faoliyat milliy banki tomonidan qayta moliyalashtiriladigan Oʻzbekiston Tiklanish va taraqqiyot jamgʻarmasining 62,0 mln. AQSh dollari miqdoridagi mablagʻlari hisobidan amalga oshiriladi.

3. “Namangan sharbati” MChJ QK Oʻzbekiston Respublikasi Tashki iqtisodiy faoliyat milliy banki va “Oʻzbekyengilsanoat” AJ bilan birgalikda uch oy muddatda aralash tolali toʻqimachilik mahsulotlari yangi korxonasini tashkil etish boʻyicha loyiha ishlab chiqilishi va “Oʻzbekyengilsanoat” AJning tarmoqdagi Ilmiy-texnik kengashida ekspertizadan oʻtkazilishi hamda texnik-iqtisodiy asoslanishi belgilangan tartibda tasdiqlanishini taʼminlasin.

4. Namangan viloyati hokimligi “Namangan sharbati” MChJ QKga loyihani tashkil etish va amalga oshirish uchun belgilangan tartibda yer maydoni ajratib berilishini taʼminlasin.

5. “Namangan sharbati” MChJ QK 2022-yilning 1-yanvarigacha:

yuridik shaxslarning foyda soligʻi, qoʻshilgan qiymat soligʻi, yuridik shaxslarning mulk soligʻi hamda Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasiga majburiy ajratmalar toʻlashdan;

Oʻzbekiston Respublikasida ishlab chiqarilmaydigan, belgilangan tartibda tasdiqlanadigan roʻyxatlar boʻyicha respublikaga olib kiriladigan uskunalar, butlovchi buyumlar, shuningdek, kimyo xomashyosi asosida mahsulot ishlab chiqarish uchun foydalaniladigan xomashyo, materiallar va kimyoviy vositalar bojxona toʻlovlaridan (bojxona rasmiylashtiruvi yigʻimlaridan tashqari) ozod etilsin.

6. Oʻzbekiston Respublikasi Prezidentining “2017 — 2019-yillarda toʻqimachilik va tikuv-trikotaj sanoatini yanada rivojlantirish chora-tadbirlari dasturi toʻgʻrisida” 2016-yil 21-dekabrdagi PQ-2687-sonli qarorida nazarda tutilgan Oʻzbekiston Respublikasi Tiklanish va taraqqiyot jamgʻarmasi tomonidan moliyalashtirish mexanizmi va shart-sharoitlari “Namangan sharbati” MChJ QKga, istisno tariqasida, joriy etilsin.

7. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov, Oʻzbekiston Respublikasi Prezidenti huzuridagi Loyiha boshqaruvi milliy agentligi direktori Sh.M. Sodiqov va Oʻzbekiston Respublikasi Tashqi iqtisodiy faoliyat milliy banki boshqaruvi raisi S.R. Xolmurodov zimmasiga yuklansin.