Jamoatchilikning respublika madaniyati va sanʼatini rivojlantirish muammolarini har tomonlama hal qilish, jamiyatning maʼnaviy-axloqiy taraqqiyotida ularning mavqeini oshirish, aholining madaniy estetik talab-ehtiyojlarini toʻla-toʻkis qondirish zarurligi toʻgʻrisidagi takliflarni inobatga olib, shuningdek madaniyat va kinematografiya tarmoqlarini boshqarishni takomillashtirish, bozor munosabatlari sharoitida mazkur soha muassasalariga rahbarlikning zamonaviy iqtisodiy usullarini keng joriy etish maqsadida:

1. Oʻzbekiston Respublikasi Madaniyat vazirligining tuzilmasi qayta koʻrib chiqilib, uning markaziy apparati hamda unga qarashli muassasalar negizida:

Oʻzbekiston Respublikasining Madaniyat ishlari vazirligi:

Oʻzbekiston Respublikasi Davlat kinokompaniyasi tashkil qilinsin.

2. Belgilab qoʻyilsinki, Oʻzbekiston Madaniyat ishlari vazirligining asosiy vazifalari quyidagilardan iboratdir:

milliy madaniyat sohasida davlat siyosati amalda roʻyobga chiqarish, xalqning boy anʼanalarini tiklash va yanada rivojlantirish, respublikaning ijodiy uyushmalari bilan uzviy hamkorlikni mustahkamlash, davlatlararo va xalqaro madaniy aloqalarni kengaytirish borasidagi chora -tadbirlar majmuini amalga oshirish:

respublika aholisining barcha tabaqalari oʻrtasida madaniy-maʼrifiy ishlarni avj oldirish va ularni aniq ravshan mazmun bilan boyitish, kishilarning madaniy va estetik ehtiyojlarini yana ham toʻliqroq qondirish, professional va xalq ijodiyotini, shuningdek ijtimoiy oʻzgarishlar va ilm-fan sohasidagi yutuqlarni keng targʻib qilish:

teatr, muzika, xoreografiya, estrada, tasviriy va xalq amaliy sanʼatini yangi bosqichga koʻtarish, ularning gʻoyaviy-badiiy va maʼnaviy saviyasini oshirish, Oʻzbekistonning tarixi va madaniyat obidalarini muhofaza qilish ishini tubdan yaxshilash:

madaniyat sohasi xodimlari va ijodkor ziyolilarning ijtimoiy muhofazasini taʼminlash, umuminsoniy qadriyatlarini, insonparvarlik va axloqiylikni qaror topshirish lozim boʻlgan kadrlar tayyorlash jarayonini yaxshilash, odamlarni oʻzining umumtaʼlim va madaniy saviyasini oshirishga, milliy va jahon madaniyatining eng yaxshi namunalaridan bahramand boʻlishga intilish ruhida tarbiyalash:

mazkur idoralarga qarashli madaniyat muassasalarni boshqarish tuzilmasini takomillashtirish va ularga rahbarlik qilishni yaxshilash, ularning tashabbuskorligini, mustaqilligi hamda iqtisodiy ragʻbatlantirishni avj oldirish, bozor munosabatlari sharoitida madaniyat va sanʼatning tijorat sohasiga aylanib qolishiga barham berish yuzasidan amaliy choralarni koʻrish, teatrlar, klublar, muzeylar, kutubxonalar, studiyalar va istirohat bogʻlarining moddiy-texnika negizini mustahkamlash.

3. Oʻzbekiston Respublikasi Davlat kinokompaniyasining zimmasiga quyidagi vazifalarni hal qilish yuklatilsin:

qaysi tasarrufda boʻlishidan qatʼi nazar, respublika hududida faoliyat koʻrsatayotgan kino va videofilmlar ishlab chiqaruvchi, namoyish etuvchi va tarqatuvchi tashkilotlarga rahbarlik qilish, ularning faoliyatini muvofiqlashtirish, repertuarning gʻoyaviy-badiiy saviyasini nazorat qilish;

kino sanʼatining millatlararo aloqalarni rivojlantirish, uzoq muddatli qoʻshma xalqaro ijodiy dasturlarni tuzish, xalqaro va mintaqa kinofestivallarni, kino va video bozorlarini tashkil qilish, filmlarni birgalikda yaratishlarini muvofiqlashtirish;

respublika kino tarmogʻi korxonalari, tashkilotlar va muassasalarning tashkiliy tuzilmasi xamda moliyaviy-xoʻjalik faoliyatini yanada takomillashtirishga doir meʼyoriy hujjatlarni qabul qilish uchun takliflar tayyorlash.

Shu narsa belgilab qoʻyilsinki:

respublika hududida ish olib boradigan kino hamda videofilmlar ijodiy-ishlab chiqarish studiyalari, kino va videofilmlarni namoyish qiluvchi, tarqatuvchi birlashmalar va punktlar qaysi tasarrufda ekanligidan, shuningdek mulkchilik shaklidan qatʼi nazar, Oʻzbekiston Respublikasining Davlat kinokompaniyasida shartnoma asosida roʻyxatdan oʻtishga majburdirlar;

belgilangan tartibda roʻyxatga olinmagan tashkilotlar va fuqarolarning respublika hududida kino va videomahsulot ishlab chiqarishlari hamda tarqatishlariga yoʻl qoʻyilmaydi.

4. Vazirlar Mahkamasi 10 kun ichida:

Oʻzbekiston Respublikasi Madaniyat ishlari vazirligining tuzilmasi va faoliyatini takomillashtirish toʻgʻrisida;

Davlat kinokompaniyasini tashkil qilish toʻgʻrisida qarorlar tayyorlab, mazkur kinokompaniyaning tuzilmasi va Nizomini tasdiqlasin.