Respublika oliy va oʻrta maxsus oʻquv yurtlari professor-oʻqituvchilari tarkibining, ilmiy xodimlari hamda taʼlim-yordamchi xodimlarining moddiy va maishiy sharoitlarini yanada yaxshilash, narxlar erkin boʻlgan sharoitda ularning ijtimoiy muhofazasini kuchaytirish maqsadida:

1. Oʻzbekiston Respublikasi Prezidentining “Barcha tiplardagi maktablarning oʻqituvchilariga, bolalar uylarining tarbiyachilariga qoʻshimcha imtiyozlar berish, yuqori sinf oʻqituvchilarining ish haqini oshirish toʻgʻrisida” 1990-yil 13-noyabrdagi Farmonining qismlari qaysi idoraga boʻysunishidan qatʼi nazar, respublika oliy va oʻrta maxsus oʻquv yurtlarining professor-oʻqituvchilari tarkibiga, ilmiy xodimlari va taʼlim-yordamchi xodimlariga ham joriy etilsin:

— ular yashab turgan davlat va idoralarga qarashli uylar hamda kvartiralarni shaxsiy mulk qilib bepul berish;

— kvartira haqi va kommunal xizmatlar uchun haq toʻlashda imtiyozlar;

— yer uchastkalarini va yakka tartibdagi qurilish uchun binokorlik materiallarini sotib olishga birinchi navbatda ajratib berish.

Farmon mazkur bandining amal qilishi kamida 10 yil ilmiy-pedagogik ish stajiga ega boʻlgan xodimlarning ushbu toifasiga mansub pensionyerlarga joriy etilsin.

2. Vazirlar Mahkamasi mazkur Farmonni roʻyobga chiqarishga doir tashkiliy chora-tadbirlar toʻgʻrisida 10 kun muddat ichida qaror loyihasini tayyorlashi zarur.

3. Ushbu Farmon 1992-yilning 1-martidan kuchga kiradi.