Ўзбекистон Республикасининг Биологик ранг-баранглик тўғрисидаги Конвенцияга қўшилиши муносабати билан Вазирлар Маҳкамаси қарор қилади:

1. Дунё миқёсидаги экологик жамғарманинг молиявий ва ПРООНнинг техник ёрдами билан Ўзбекистон Республикаси Экология ва атроф муҳитни муҳофаза қилиш давлат қўмитаси томонидан Ўзбекистон Республикаси Макроиқтисодиёт ва статистика вазирлиги, Қишлоқ ва сув хўжалиги вазирлиги, Давлат ўрмон қўмитаси, Фанлар академияси ва бошқа ташкилотлар билан биргаликда ишлаб чиқилган Ўзбекистон Республикасининг Биологик ранг-барангликни сақлаш бўйича миллий стратегияси ва ҳаракатлар режаси маъқуллансин.

Миллий стратегия ва ҳаракатлар режасини амалга ошириш ва уларнинг ўтказилишини назорат қилиш бўйича ишларни ташкил этиш учун иловага* мувофиқ тартибда Биологик ранг-баранглик миллий комиссияси тузилсин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар, идоралар, ташкилотлар кўрсатиб ўтилган ҳужжатларда назарда тутилган тадбирларнинг бажарилишида Биологик ранг-баранглик миллий комиссиясига ёрдам кўрсатсинлар.

3. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И.Ҳ.Жўрабеков зиммасига юклансин.