Ўзбекистон Республикаси Вазирлар Маҳкамасининг «Ўзбекистон Республикасида меҳмонхона бизнеси ва халқаро туризмни янада ривожлантириш чора-тадбирлари тўғрисида» 2002 йил 2 сентябрдаги 310-сон қарорини бажариш юзасидан ҳамда «Чорсу» меҳмонхона комплексини реконструкция қилишни жадаллаштириш мақсадида Вазирлар Маҳкамаси қарор қилади:

1. «Ўзбектуризм» миллий компанияси ва «Эмсаш» (Туркия) фирмасининг устав жамғармаси 10 млн АҚШ долларидан иборат бўлган масъулияти чекланган жамият шаклидаги «Чорсу Отель» қўшма корхонасини ташкил этиш тўғрисидаги таклифига розилик берилсин. Ўзбекистон томонининг улуши «Чорсу» меҳмонхона комплекси тарзида 3 млн АҚШ доллари миқдорида ва «Эмсаш» фирмасининг улуши асбоб-ускуналар ва пул маблағлари тарзида 7 млн АҚШ доллари миқдорида белгилансин.

2. «Чорсу» меҳмонхона комплексини реконструкция қилиш инвестиция лойиҳасининг асосий техник-иқтисодий кўрсаткичлари 1, 2-иловаларга* мувофиқ тасдиқлансин.

3. Ўзбекистон Республикаси Давлат мулки қўмитаси:

«Чорсу» меҳмонхонасини реконструкция қилиш даври учун «Чорсу» меҳмонхонасини реконструкция қилиш учун жалб этилаётган кредит маблағларини таъминлашда гаров (ипотека) шартномасини «Бухара Палас» меҳмонхонасига расмийлаштириш ҳуқуқини «Ўзбектуризм» миллий компаниясига берсин;

Ўзбекистон томонининг «Чорсу Отель» қўшма корхонаси устав жамғармасидаги 3 млн АҚШ доллари миқдоридаги улушини реконструкция қилишдан кейин 5 йил мобайнида тенг улушлар билан сотиш юзасидан «Эмсаш» фирмаси билан шартнома тузсин.

4. «Эмсаш» фирмаси томонидан «Чорсу» меҳмонхона комплексини реконструкция қилиш тугаллангунгача Ташқи иқтисодий фаолият миллий банки кредитини таъминлаш сифатида реконструкция қилиш тугаллангандан кейинги давр учун биринчи класс хорижий банкнинг банк кафолати берилиши маълумот учун қабул қилинсин.

5. Ўзбекистон Республикаси Ташқи иқтисодий фаолият миллий банки Туркиянинг экспорт-импорт банки (Туркэксимбанк) билан 12950 минг АҚШ доллари суммасига кредит битими тузсин ва Туркэксимбанк маблағларининг «Чорсу Отель» қўшма корхонаси учун қайта молиялаштирилишини таъминласин.

6. Ўзбекистон Республикаси Вазирлар Маҳкамасининг 2001 йил 3 январдаги 4-ф-сон фармойиши ўз кучини йўқотган деб ҳисоблансин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари К.Н.Тўлаганов зиммасига юклансин.