Кейинги йилларда Тошкент шаҳри аҳолисига транспорт хизмати кўрсатишни яхшилаш бўйича муайян ишлар амалга оширилди. Автобуслар парки изчил янгиланмоқда, сервис хизмати тармоғи ташкил этилган ва бу йўловчилар ташиш хавфсизлигини ошириш имконини бермоқда. Шаҳар йўловчи транспортининг янги, мунтазам йўналишлари очилди, метрополитеннинг Юнусобод йўналиши ишга туширилиши таъминланди, хусусий йўловчи ташувчилар кўрсатаётган хизматлар ҳажмини ошириш имконини берадиган қонунчилик ва меъёрий-ҳуқуқий база яратилди.

Шу билан бирга, жамоат транспортида аҳолига хизмат кўрсатиш тизимида бозор механизмларини жорий этиш жараёни суст бормоқда. Хусусий йўловчи ташувчиларнинг тендер савдоларида иштирок этишида ва йўловчиларга транспорт хизмати кўрсатишидаги турли чеклашлар транспорт хизматлари бозори ривожига тўсқинлик қилмоқда. «Тошшаҳарйўловчитранс» акциядорлик компаниясида корхоналарнинг низом жамғармасидаги давлат улушини қисқартириш бўйича мақсадли ишларнинг амалга оширилмаётгани автобус парклари, ҳайдовчилар ва хизмат кўрсатувчи ходимларнинг йўловчиларга хизмат кўрсатиш сифатини яхшилаш, йўналишларда вақтида ва ишончли ҳаракатланиш ҳамда ҳаракатланувчи таркибни сақлаш ва йўловчи ташиш таннархини пасайтириш борасидаги мустақиллиги, моддий манфаатдорлиги ва масъулиятини ошириш имконини бермаяпти.

Тошкент шаҳри аҳолисига транспорт хизмати кўрсатишни янада такомиллаштириш, барча мулкчилик шаклидаги йўловчи ташувчилар ўртасида ошкора рақобат учун қулай шароит яратиш, кўрсатилаётган хизматларнинг сифат стандартларига мос бўлиши ва йўналишларда ҳаракат жадвалларига риоя этиш даражасини ошириш, йўловчи ташишлар бўйича буюртмачи ва пудратчи вазифаларини аниқ белгилаш, йўловчи транспорти ходимлари моддий манфаатдорлигини кучайтириш, ноишлаб чиқариш ва маъмурий-бошқарув харажатларини камайтириш мақсадида:

1. «Тошшаҳарйўловчитранс» акциядорлик компанияси Кенгашининг мазкур компанияни тугатиш тўғрисидаги қарори маъқуллансин.

2. Ўзбекистон Республикаси Иқтисодиёт вазирлиги, Давлат мулки қўмитаси, Ўзбекистон автомобиль ва дарё транспорти агентлиги ҳамда Тошкент шаҳар ҳокимлигининг «Тошшаҳарйўловчитранс» АК негизида йўловчилар ташиш бўйича «Тошшаҳартрансхизмат» уюшмасини ташкил этиш тўғрисидаги таклифи қабул қилинсин.

3. Белгилаб қўйилсинки:

«Тошшаҳартрансхизмат» уюшмаси Тошкент шаҳар йўловчи транспорти соҳасида ишлаётган хўжалик жамиятлари, давлат, хусусий ва бошқа ташкилотларни шартнома асосида бирлаштиради, ўз фаолиятини мустақил юридик шахс сифатида тўлиқ хўжалик ҳисоби тамойиллари асосида амалга оширади;

«Тошшаҳартрансхизмат» уюшмаси «Тошшаҳарйўловчитранс» АКнинг ҳуқуқ ва мажбуриятлари бўйича, шу жумладан, амалдаги қонунчиликка мувофиқ тугатилаётган компаниянинг акциядорлари олдидаги мажбуриятлари бўйича ҳуқуқий вориси ҳисобланади;

«Тошшаҳартрансхизмат» уюшмасига 1-иловада* қайд этилган тузилмалар киради.

4. Қуйидагилар йўловчилар ташиш бўйича «Тошшаҳартрансхизмат» уюшмасининг асосий вазифалари этиб белгилансин:

аҳолининг шаҳар йўловчи транспорти хизматларига бўлган эҳтиёжини қондириш, йўловчи транспортининг йўл ҳаракати хавфсизлигининг юқори даражасига риоя этган ҳолда, йўналишларда бир маромда ва ишончли ҳаракатини таъминлаш;

транспорт корхоналари мулки, шу жумладан автотранспорт воситаларининг сақланиши ва улардан мақсадли фойдаланиш устидан мониторинг олиб бориш, акциядорлик жамиятларига давлат активларини сотишда ёрдам кўрсатиш;

мулкчилик шаклидан қатъи назар, барча йўловчи ташувчиларга шартнома асосида хизмат кўрсатувчи, шу жумладан таъмирнинг барча турлари ва ҳаракатдаги таркибни модернизация қилиш ҳамда уларга сервис хизмати кўрсатиш бўйича транспорт инфратузилмасини ривожлантириш;

йўловчиларни ташиш хизматларига бўлган талаб, иқтисодий асосланган харажатлар ва йўловчи транспортининг рентабеллигини оширишдан келиб чиққан ҳолда, шаҳар йўловчи транспортида тарифларни шакллантиришда қатнашиш;

кадрларни тайёрлаш, қайта тайёрлаш ва малакасини оширишни ташкил этиш.

5. «Тошшаҳартрансхизмат» уюшмаси автобус паркларининг давлат активларини хусусий мулк сифатида сотиш механизмини ишлаб чиқиш бўйича Ишчи комиссия 2-иловага* мувофиқ ташкил этилсин.

Ишчи комиссия бир ой муддатда:

2006—2010 йиллар мобайнида «Тошавтобустранс» компанияси автобус паркларининг давлатга тегишли акциялар пакетлари ҳамда Ўзбекистон Республикаси Ҳукумати томонидан жалб этилган хорижий кредитлар ҳисобига харид қилинган автобусларни, мулк қийматини баҳолаш, сотиш босқичлари, тўлов жадваллари ва инвесторларнинг давлат активларини сотиб олишдан манфаатдорлигини оширишга ёрдам берувчи механизмларни кўзда тутган ҳолда, хусусий мулк қилиб сотиш тартиби тўғрисида;

жаҳон тажрибасини ўрганиш асосида, йўл ҳақи тўлашни соддалаштириш, маблағларни тўлиқ йиғиб олиш ва хизмат кўрсатишдан тушган пулни яширишдан иборат суиистеъмолликларнинг олдини олишга алоҳида эътибор қаратган ҳолда, жамоат транспортида йўл ҳақини тўлаш тизимини босқичма-босқич такомиллаштириш бўйича таклифлар ишлаб чиқсин ва киритсин.

6. Тошкент шаҳар ҳокимлиги ҳузуридаги Транспортнинг барча турларини мувофиқлаштириш марказини Тошкент шаҳар ҳокимлигининг таркибий бўлинмаси сифатида Йўловчи транспортининг барча турлари ҳаракатини лицензиялаш ва мувофиқлаштириш департаментига айлантириш тўғрисидаги Тошкент шаҳар ҳокимлигининг таклифи маъқуллансин ва қуйидагилар унинг асосий вазифалари этиб белгилансин:

барча транспорт турлари ҳаракатини мувофиқлаштириш, йўналишлар тармоғини тартибга солиш ва мақбул ҳолга келтириш, шаҳарда йўловчи ташиш бўйича буюртмачи вазифасини бажариш, лицензиялар бериш ҳуқуқига эга бўлган ҳолда йўловчи ташиш йўналишларини қатъий тендер асосида белгилаш;

рақобат муҳитини вужудга келтириш ва барча йўловчи ташувчилар, шу жумладан хусусийлар учун транспорт хизматлари бозорида тенг шароит яратиш, жамоат транспорти иши натижаси ва самарадорлигини баҳолаш;

шаҳар автобус ва электр транспортида йўловчи ташиш бўйича чекланган тарифларни белгилаш юзасидан Тошкент шаҳри ҳокимлигига молия идоралари билан келишилган таклифларни киритиш, уларга риоя этилишини назорат қилиш;

Тошкент шаҳрида йўловчи ташишнинг автоматлаштирилган бошқарув тизимини жорий этиш, шу жумладан ерусти йўловчи транспортида йўл ҳақи тўлаш ҳисоб-китоби тизимини автоматлаштириш ва шаҳар йўловчи транспорти ҳаракат йўналишларида назорат ўрнатиш.

7. Тошкент шаҳар ҳокимлиги жамоат йўловчи транспортини қайта ташкил этиш ва ислоҳ қилиш бўйича мазкур Фармонда кўзда тутилган тадбирларни амалга оширишда шаҳар транспортида йўловчи ташиш тарифлари ошишининг олдини олишга қаратилган барча чораларни кўрсин.

8. Ўзбекистон Республикаси Вазирлар Маҳкамаси бир ҳафта муддатда:

«Тошшаҳартрансхизмат» уюшмаси ва Тошкент шаҳар ҳокимлиги Йўловчи транспортининг барча турлари ҳаракатини лицензиялаш ва мувофиқлаштириш департаменти фаолиятини ташкил этиш масалалари бўйича қарор лойиҳасини киритсин;

автобус парклари ва электр транспорти корхоналари раҳбарларини аттестациядан ўтказиш бўйича комиссия тузсин, уни ўтказиш муддатлари, аттестациядан ўтадиган шахслар ҳамда хизмат вазифалари бажарилишини баҳолаш мезонларини белгиласин.

9. Мазкур Фармоннинг ижросини назорат қилиш Ўзбекистон Республикаси Бош вазири Ш. Мирзиёев зиммасига юклансин.