Пахта толасини чуқур қайта ишлашни таъминлаш ва рақобатбардош истеъмол товарлари ишлаб чиқаришни кўпайтириш, Хоразм вилоятининг меҳнат ресурслари ортиқча бўлган туманларида корхоналар барпо этиш, республиканинг экспорт салоҳиятини кенгайтириш мақсадида Вазирлар Маҳкамаси қарор қилади:

1. Хоразм вилояти ҳокимлиги, «Ўзбекенгилсаноат» давлат-акциядорлик компанияси, «Марубени корпорейшн» (Япония) ва «Бурсел текстиль» (Туркия) компанияларининг Хоразм вилоятининг Боғот шаҳридаги қурилиши тугалланмаган объект базасида бир йилда 5,07 минг тонна калава, 6,0 минг тонна трикотаж полотно ва 4,21 миллион чойшаб комплекти ишлаб чиқарадиган «Бурсел—Боғот текстиль» қўшма корхонаси ташкил этиш тўғрисидаги таклифи қабул қилинсин.

2. Қуйидагилар:

«Бурсел текстиль» фирмаси «Ўзбекенгилсаноат» давлат-акциядорлик компанияси билан биргаликда кўрсатиб ўтилган лойиҳани муваффақиятли амалга ошириш учун «Бурсел—Боғот текстиль» қўшма корхонасининг зарур миқдордаги устав фондини шакллантириш мажбуриятини ўз зиммасига олганлиги;

дастлабки қиймати 47,0 млн АҚШ доллари миқдоридаги машиналар, асбоб-ускуналар ва қурилиш материалларини етказиб бериш учун контрактни маблағ билан таъминлаш «Бурсел текстиль» фирмасининг «Бурсел—Боғот текстиль» қўшма корхонаси устав фондига 7,05 млн АҚШ доллари миқдоридаги улуши ва Япония халқаро ҳамкорлик банкининг дастлабки 39,95 млн АҚШ доллари миқдоридаги кредити ҳисобига амалга оширилиши;

«Бурсел текстиль» компанияси тайёр маҳсулотнинг 80 фоизи жаҳон нархлари бўйича экспорт қилинишини таъминлаш мажбуриятини олганлиги маълумот учун қабул қилинсин.

Лойиҳанинг ва контрактнинг узил-кесил қиймати техник-иқтисодий асослаш экспертизадан ўтказилиши натижасига кўра аниқланади.

3. Белгилансинки, Япония халқаро ҳамкорлик банкининг «Асака» давлат-акциядорлик тижорат банки томонидан қайта молиялаштирилган кредити ва у бўйича фоизлар кредит шартномаси шартларига мувофиқ «Бурсел—Боғот текстиль» қўшма корхонасининг ўз валюта маблағлари ҳисобига қайтарилади.

4. «Ўзбекенгилсаноат» давлат-акциядорлик компанияси, «Ўзенгсанлойиҳа» институти «Бурсел текстиль» фирмаси билан биргаликда бир ой муддатда «Бурсел—Боғот текстиль» қўшма корхонасида калава, трикотаж полотно ва тикув буюмлари ишлаб чиқариш лойиҳасини ишлаб чиқсин ва белгиланган тартибда экспертиза қилиш учун киритсин.

Ўзбекистон Республикаси Вазирлар Маҳкамаси икки ой муддатда «Марубени корпорейшн» ва «Бурсел текстиль» компаниялари томонидан ишлаб чиқилган параметрлар ҳамда Ўзбекистон Республикаси ваколатли экспертиза органларининг хулосалари натижалари асосида лойиҳанинг техник-иқтисодий асосланишини тасдиқласин.

5. «Асака» давлат-акциядорлик тижорат банки лойиҳанинг тасдиқланган техник-иқтисодий асосланиши параметрлари асосида Япониянинг халқаро ҳамкорлик банки билан белгиланган тартибда кредит битимини ҳамда «Бурсел—Боғот текстиль» қўшма корхонасининг қарз маблағларини қайта молиялаштириш учун субқарз битимини тузсин.

Ўзбекистон Республикаси Молия вазири «Асака» банкининг Япония халқаро ҳамкорлик банки олдидаги тўлов мажбуриятлари бўйича ҳамда «Асака» банкига «Бурсел—Боғот текстиль» қўшма корхонасининг мажбуриятлари бўйича белгиланган тартибда Ўзбекистон Республикаси Ҳукумати номидан кафолат беришга вакил қилинсин.

Ўзбекистон Республикаси Адлия вазирлиги Ўзбекистон Республикаси кафолатлари бўйича юридик хулосани кредит битимида белгиланган шакл бўйича белгиланган тартибда расмийлаштирсин.

6. «Бурсел—Боғот текстиль» қўшма корхонаси объект қурилишини тугаллаш учун республика қурилиш компаниялари ўртасида субпудрат шартларида қурилиш ишларини бажариш учун белгиланган тартибда танлов савдолари ўтказсин.

7. «Бурсел—Боғот текстиль» қўшма корхонаси, истисно тариқасида, объект фойдаланишга топширилгунгача бўлган даврда олиб келинаётган технология асбоб-ускуналари, бутловчи буюмлар, эҳтиёт қисмлар, қурилиш материаллари ва объект қурилиши учун фойдаланиладиган бошқа моддий ресурслар учун, шунингдек маҳсулот ишлаб чиқаришнинг технология жараёнида фойдаланиладиган сарфлаш материаллари учун божхона тўловлари тўлашдан озод қилинсин (божхона расмийлаштируви йиғимларидан ташқари).

8. «Бурсел—Боғот текстиль» қўшма корхонасида ишлаш учун келаётган чет эллик мутахассисларга меҳмонхонада яшаганлик ва республикада транспортнинг барча турларида юрганлик учун Ўзбекистон Республикаси фуқаролари учун назарда тутилган тарифлар бўйича ҳақ тўлаш ҳуқуқи берилсин.

9. Ўзбекистон Республикаси Ташқи ишлар вазирлиги «Ўзбекенгилсаноат» давлат-акциядорлик компаниясининг буюртманомалари бўйича лойиҳани амалга оширишда иштирок этадиган чет эллик мутахассисларга кўп марталик визалар белгиланган тартибда расмийлаштирилишини таъминласин.

10. Ўзбекистон Республикаси Ички ишлар вазирлиги «Ўзбекенгилсаноат» давлат-акциядорлик компаниясининг буюртманомалари бўйича «Бурсел—Боғот текстиль» қўшма корхонасида ишлаш учун келаётган чет эллик мутахассисларни давлат божи тўлашдан озод қилган ҳолда уларга кўп марталик йиллик визалар берилишини ва уларнинг муддати узайтирилишини, шунингдек яшаш жойида вақтинча рўйхатдан ўтказилишини ва вақтинчалик рўйхатдан ўтказиш муддати узайтирилишини таъминласин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Р.С. Азимов ва М.З. Усмонов зиммасига юклансин.