Ўзбекистон Республикасининг Ҳаво кодексига, сифат бўйича халқаро стандартларга, Халқаро авиация ташкилоти (ИКАО)нинг тавсияларига мувофиқ ва бошқарув фаолиятини марказлаштиришдан чиқариш жараёнида парвозларнинг хавфсизлигини таъминлаш, шунингдек, истеъмолчиларнинг манфаатларини ҳимоя қилиш мақсадида Вазирлар Маҳкамаси қарор қилади:

1. Ўзбекистон Республикаси Ҳаво кодексининг давлат бошқаруви ва парвозларнинг хавфсизлигини назорат қилишга оид қисмида баён қилинган Авиация маъмурияти функцияси «Ўзбекистон ҳаво йўллари» миллий авиакомпаниясининг Давлат бошқаруви ва назорати бош инспекциясига юклатилсин.

2. Ўзбекистон фуқаро авиациясида Ҳаво транспорти эксплуатантларини сертификация қилиш жорий этилсин. Сертификация қилиш ҳаво транспортидан фойдаланишни тартибга солувчи амалдаги қоидалар, йўриқномалар ва бошқа норматив ҳужжатлар бўйича амалга оширилсин.

3. «Ўздавстандарт» билан «Ўзбекистон ҳаво йўллари» миллий авиакомпаниясининг Давлат бошқаруви ва назорати бош инспекцияси ўртасида ўзаро ҳамкорлик қилиш тўғрисида тузилган битим маъқуллансин.

4. «Ўзбекистон ҳаво йўллари» миллий авиакомпанияси фойдаланувчи сертификация тартиб-қоидалари ва эксплуатантларга йўл-йўриқ бериш бўйича дастуруламални тасдиқласин ва уни, идоравий бўйсуниши ва мулкчилик шаклидан қатъий назар, барча авиация ташувчиларига етказсин.

5. Белгилаб қўйилсинки:

янгидан ташкил этиладиган эксплуатантлар ишлаб чиқариш фаолияти бошлангунга қадар сертификация қилинади. Эксплуатант гувоҳномаси (сертификат) уларга ишлаб чиқариш-техника негизи, ҳаво кемалари ва бошқа асбоб-ускуналар ташкил этишнинг технологик жараёнларининг ҳуқуқий ҳолати, парвозларнинг бажарилиши ва уларни таъминлаш, авиация ходимларининг тайёргарлик даражаси амалдаги талабларга мувофиқлиги текширилгандан кейин берилади;

фаолият кўрсатаётган эксплуатантлар 1993 йил 1 декабрга қадар гувоҳнома олиш учун буюртманома беришлари керак.

6. Ўзбекистон Республикаси Ҳаво кодексининг 96-моддасига мувофиқ Вазирлар Маҳкамасининг 1992 йил 21 майдаги 240-сон қарори билан тасдиқланган корхоналарга (ташкилотларга) фаолиятнинг айрим турлари билан шуғулланиш ҳуқуқини берувчи рухсатномалар (лицензиялар) бериш тартиби тўғрисидаги Низом 2-бандининг ҳаво транспорти орқали йўловчилар ва юкларни ташишга оид қисмига «Органнинг номи» устунида «Baзиpлap Маҳкамаси» сўзлари ўрнига «Ўзбекистон ҳаво йўллари» миллий авиакомпанияси» сўзлари ёзилган ҳолда ўзгартириш киритилсин.

7. Мазкур қарорнинг бажарилишини назорат қилиш Бош вазирнинг ўринбосари ўртоқ. К. Н. Тўлаганов зиммасига юклатилсин.