Ўзбекистон Республикаси Президентининг «Давлат бошқаруви республика органлари тизимини такомиллаштириш тўғрисида» 2003 йил 9 декабрдаги ПФ–3358-сон Фармонига мувофиқ ҳамда архив ишини бошқариш органлари фаолияти самарадорлигини ошириш, архивларнинг моддий-техника базасини мустаҳкамлаш ва ривожлантириш мақсадида Вазирлар Маҳкамаси қарор қилади:

1. Ўзбекистон Республикаси Вазирлар Маҳкамаси ҳузуридаги Бош архив бошқармаси («Ўзбошархив» бошқармаси) Ўзбекистон Республикаси Вазирлар Маҳкамаси ҳузуридаги «Ўзархив» агентлиги («Ўзархив» агентлиги)га айлантирилсин.

2. Қуйидагилар Ўзбекистон Республикаси Вазирлар Маҳкамаси ҳузуридаги «Ўзархив» агентлигининг асосий вазифалари этиб белгилансин:

архив иши ва иш юритиш соҳасида ягона давлат сиёсатини амалга ошириш;

архив иши соҳасидаги қонун ҳужжатларининг амалда бажарилишини ва уларга риоя этилиши устидан таъсирчан назоратни амалга оширишни таъминлаш;

Ўзбекистон Республикаси Миллий архив фонди ҳужжатларини шакллантириш, уларнинг сақланишини, давлат ҳисобини таъминлаш ва улардан фойдаланиш;

республика давлат архивларини бошқариш, уларнинг фаолият кўрсатишини таъминлаш;

республикада архив ишини янада ривожлантириш ва такомиллаштириш бўйича таклифлар ишлаб чиқиш;

архившунослик ва археография соҳасида илмий ва методик ишларни ташкил этиш ва мувофиқлаштириш, илмий тадқиқотлар натижаларини ва илмий-техника ютуқларини республика архив муассасалари ишлари амалиётига жорий этиш;

архив иши соҳасидаги мамлакатимиз ва чет эл иш тажрибасини ўрганиш ва оммалаштириш.

3. Белгилаб қўйилсинки, Ўзбекистон Республикаси Вазирлар Маҳкамаси ҳузуридаги «Ўзархив» агентлиги Ўзбекистон Республикаси Вазирлар Маҳкамаси ҳузуридаги Бош архив бошқармасининг ҳуқуқ ва мажбуриятлари бўйича ҳуқуқий вориси ҳисобланади.

4. Қуйидагилар:

Ўзбекистон Республикаси Вазирлар Маҳкамаси ҳузуридаги «Ўзархив» агентлигининг ташкилий тузилмаси 1-иловага мувофиқ;

Ўзбекистон Республикаси Вазирлар Маҳкамаси ҳузуридаги «Ўзархив» агентлиги тўғрисидаги низом 4-иловага мувофиқ тасдиқлансин.

Ўзбекистон Республикаси Вазирлар Маҳкамаси ҳузуридаги «Ўзархив» агентлиги Бош директорига марказий аппарат тузилмасига белгиланган ходимлар сони ва иш ҳақи фонди доирасида ўзгартиришлар киритиш ҳуқуқи берилсин.

5. Ўзбекистон Республикаси Вазирлар Маҳкамаси ҳузуридаги «Ўзархив» агентлигида Бош директорнинг бир нафар ўринбосари ва шахсий таркиби Ўзбекистон Республикаси Вазирлар Маҳкамаси томонидан тасдиқланадиган 5 кишидан иборат ҳайъат бўлишига рухсат этилсин.

Ўзбекистон Республикаси Вазирлар Маҳкамаси ҳузуридаги «Ўзархив» агентлигининг Бош директори мақомига кўра вазирнинг биринчи ўринбосарига, Бош директор ўринбосари — вазир ўринбосарига тенглаштирилсин.

6. Белгилаб қўйилсинки, архив иши ҳудудий бошқармаларининг бошлиқлари Қорақалпоғистон Республикаси Вазирлар Кенгашининг Раиси, вилоятлар ва Тошкент шаҳар ҳокимлари билан келишув бўйича «Ўзархив» агентлигининг Бош директори томонидан лавозимга тайинланадилар ва лавозимдан озод этиладилар.

7. Белгилансинки, Ўзбекистон Республикаси Вазирлар Маҳкамаси ҳузуридаги «Ўзархив» агентлиги марказий аппарати ва ҳудудий органлари, шунингдек унга қарашли давлат архивларининг таъминоти харажатлари давлат бюджети маблағлари ва амалдаги қонун ҳужжатларига зид бўлмаган бошқа манбалар ҳисобига молиялаштирилади.

8. Ўзбекистон Республикаси Молия вазирлиги:

ҳар йили республика бюджетини шакллантиришда Ўзбекистон Республикаси Вазирлар Маҳкамаси ҳузуридаги «Ўзархив» агентлиги ва унинг ҳудудий органлари таъминоти ва уларнинг моддий-техника базасини мустаҳкамлаш учун зарур маблағларни назарда тутсин;

Ўзбекистон Республикаси Вазирлар Маҳкамаси ҳузуридаги «Ўзархив» агентлигига марказий аппарат учун иккита енгил автомобилни сақлашга лимитни сақлаб қолсин.

9. Ўзбекистон Республикаси Вазирлар Маҳкамаси ҳузуридаги «Ўзархив» агентлиги бир ой муддатда архив иши бўйича тегишли ҳудудий органларни қайта ташкил этсин ва улар тўғрисидаги низомни тасдиқласин.

10. Ўзбекистон матбуот ва ахборот агентлиги Ўзбекистон Республикаси Вазирлар Маҳкамаси ҳузуридаги «Ўзархив» агентлигини Ўзбекистон Республикаси Марказий давлат архиви кутубхонаси учун тарихий илмий нашрлар ва даврий матбуотнинг назорат нусхаларини олувчи ташкилотлар рўйхатига киритсин.

11. Олий ва ўрта махсус таълим вазирлиги, Ўрта махсус, касб-ҳунар таълими маркази:

Ўзбекистон Республикаси Вазирлар Маҳкамаси ҳузуридаги «Ўзархив» агентлиги тизими муассасалари, республиканинг бошқа манфаатдор вазирликлари ва идоралари билан тузилган шартномаларга мувофиқ архив иши бўйича олий ва ўрта махсус, касб-ҳунарга оид маълумотли кадрларни тайёрлаш, қайта тайёрлашни ва уларнинг малакасини оширишни ташкил этсинлар;

архив иши бўйича олий ва ўрта махсус, касб-ҳунарга оид маълумотли кадрларни тайёрловчи, қайта тайёрловчи ва уларнинг малакасини оширувчи ўқув юртларини юқори малакали ўқитувчилар билан таъминласинлар;

Ўзбекистон матбуот ва ахборот агентлиги, Ўзбекистон Республикаси Вазирлар Маҳкамаси ҳузуридаги «Ўзархив» агентлиги билан биргаликда «Архившунослик» курси бўйича зарур дарсликлар, ўқув дастурлари ва методик қўлланмалар нашр этилишини таъминласинлар.

12. Ўзбекистон Республикаси Вазирлар Маҳкамаси ҳузуридаги «Ўзархив» агентлигининг марказий аппарати Тошкент шаҳар, Чилонзор кўчасидаги 2-уйга жойлаштирилсин.

13. Ўзбекистон Республикаси Вазирлар Маҳкамасининг «Архив иши бўйича меъёрий ҳужжатларни тасдиқлаш тўғрисида» 1999 йил 30 октябрдаги 482-сон қарорининг (Ўзбекистон Республикаси ҚТ, 1999 й., 10-сон, 62-модда) 1-банди тўртинчи хатбоши ўз кучини йўқотган деб ҳисоблансин.

14. Ўзбекистон Республикаси Адлия вазирлиги Ўзбекистон Республикаси Вазирлар Маҳкамаси ҳузуридаги «Ўзархив» агентлиги, манфаатдор вазирликлар ва идоралар билан биргаликда бир ой муддатда амалдаги қонун ҳужжатларига ушбу қарордан келиб чиқувчи ўзгартириш ва қўшимчалар тўғрисида Вазирлар Маҳкамасига таклифлар киритсин.

15. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.А. Азизхўжаев зиммасига юклансин.

1. Ушбу Низом Ўзбекистон Республикаси Вазирлар Маҳкамаси ҳузуридаги «Ўзархив» агентлигининг (кейинги ўринларда «Ўзархив» агентлиги деб юритилади) мақоми, вазифалари, функциялари, ваколатлари ва фаолиятининг ташкилий асосларини «Архивлар тўғрисида», «Маданий мерос объектларини қўриқлаш ва улардан фойдаланиш тўғрисида», «Ахборотлаштириш тўғрисида», «Электрон ҳужжат айланиши тўғрисида»ги Ўзбекистон Республикаси қонунларига ҳамда «Ўзархив» агентлиги фаолиятига тааллуқли Ўзбекистон Республикасининг бошқа қонун ҳужжатларига мувофиқ белгилайди.

2. Қорақалпоғистон Республикаси ва Тошкент шаҳар архив иши ҳудудий бошқармалари, Ўзбекистон Республикаси, Қорақалпоғистон Республикаси, вилоятлар давлат архивлари ва уларнинг филиаллари, Тошкент шаҳар Давлат архиви «Ўзархив» агентлиги тизимига киради.

3. «Ўзархив» агентлиги республикада архив иши ва иш юритиш соҳасидаги ваколатли давлат органи ҳисобланади ва бевосита Ўзбекистон Республикаси Вазирлар Маҳкамасига бўйсунади.

4. «Ўзархив» агентлиги ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Олий Мажлисининг қарорлари ва бошқа қонун ҳужжатларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек, бошқа қонун ҳужжатларига ва ушбу Низомга амал қилади.

5. «Ўзархив» агентлиги халқаро ташкилотларда архив иши ва уни юритиш соҳасида Ўзбекистон Республикаси номидан вакиллик қилувчи ваколатли орган ҳисобланади.

6. «Ўзархив» агентлиги ўзига юкланган вазифаларни бевосита, шунингдек ўз фаолиятини Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимлари билан келишган ҳолда «Ўзархив» агентлиги томонидан тасдиқланган улар тўғрисидаги низомлар асосида амалга оширувчи, ўзига бўйсунадиган ҳудудий органлар орқали ҳал қилади.

7. Қуйидагилар «Ўзархив» агентлигининг асосий вазифалари ҳисобланади:

архив иши ва уни юритиш соҳасида ягона давлат сиёсатини амалга ошириш;

архив иши соҳасидаги қонун ҳужжатларининг амалда бажарилишини ва уларга риоя этилиши устидан таъсирчан назоратни таъминлаш;

Ўзбекистон Республикаси Миллий архив фонди ҳужжатларини шакллантириш, уларнинг сақланишини, давлат ҳисобини таъминлаш ва улардан фойдаланиш;

архив иши ва иш юритишнинг ҳолатини таҳлил қилиш, тенденциялари ва қонуниятларини ўрганиш, уни ривожлантириш йўналишларини белгилаш;

республика давлат архивларини бошқариш, уларнинг фаолият кўрсатишини таъминлаш;

республикада архив иши ва иш юритишни янада ривожлантириш ва такомиллаштириш бўйича таклифлар ишлаб чиқиш;

архившунослик ва археография, иш юритиш, электрон ҳужжат айланиши соҳасида илмий ва методик ишларни ташкил этиш ва мувофиқлаштириш, илмий тадқиқотлар натижаларини ва илмий-техника ютуқларини республика архив муассасалари ишлари амалиётига жорий этиш;

Ўзбекистон Республикаси Миллий архив фондига тегишли бўлган ахборот ресурсларини сақлашни таъминлайдиган электрон архивларни ташкил этишни ва фаолият кўрсатишини тартибга солиш ҳамда мувофиқлаштириш;

архив иши ва иш юритиш соҳасидаги мамлакатимиз ва чет эл илғор иш тажрибасини ўрганиш ва оммалаштириш.

8. «Ўзархив» агентлиги ўзига юкланган вазифаларга мувофиқ қуйидаги функцияларни бажаради:

республика архив иши ва уни юритишнинг миллий дастурларини ва концепцияларини ишлаб чиқади ҳамда амалга оширилишини ташкил қилади;

Ўзбекистон Республикаси Миллий архив фондини ҳужжатлар билан тўлдириш, сақлаш ва улардан фойдаланиш масалалари бўйича қонун ҳужжатлари ва норматив ҳужжатлар лойиҳаларини ишлаб чиқади ва белгиланган тартибда Ўзбекистон Республикаси Вазирлар Маҳкамасига киритади ҳамда уларнинг амалга оширилишини таъминлайди;

давлат архивлари шохобчаларини ривожлантириш ва уларнинг тузилмаларини такомиллаштириш бўйича ишларни белгиланган тартибда ташкил қилади ва амалга оширади, Ўзбекистон Республикаси давлат архивлари фаолиятига раҳбарлик қилади;

архившунослик, ҳужжатшунослик, археография соҳасидаги илмий-методик ишларни ташкил қилади ва мувофиқлаштиради, илмий тадқиқотлар натижаларини ва илмий-техника ютуқларини архив иши ва иш юритиш амалиётига жорий қилади;

давлат архивларида ҳужжатлардан фойдаланиш тартибини белгилайди;

архив иши соҳасида юридик ва жисмоний шахслар ўртасидаги ўзаро муносабатларни уларнинг республика ва маҳаллий даражалардаги фаолияти учун тенг шарт-шароитлар яратиш йўли билан мувофиқлаштириб боради, фойдаланувчиларнинг ҳуқуқларини ва қонуний манфаатларини ҳимоя қилади;

ҳужжатларнинг, шу жумладан давлат ахборот ресурсларининг илмий ва амалий қимматини экспертизадан ўтказишни ҳамда уларни доимий сақлаш учун давлат архивларига, шу жумладан электрон архивларга танлаб олишни ташкил қилади;

Ўзбекистон Республикаси Миллий архив фондининг давлат архивларидаги ҳужжатларини тўлдириш, сақлаш ва ҳисобга олишни ташкил қилади, ҳужжатларнинг сақланиши, уларнинг кўрсатиб ўтилган архивларга берилиши ҳамда ушбу ҳужжатлардан фойдаланилиши бўйича белгиланган тартибга риоя этилишини назорат қилади;

давлат томонидан сақланиши учун берилиши керак бўлган, шу жумладан сақлаш муддати кўрсатилган ҳужжатларнинг намунавий рўйхатини ишлаб чиқади ва тасдиқлайди, республика бошқарув органлари томонидан ишлаб чиқилган ҳужжатларнинг идоравий рўйхатларини келишади;

ҳужжатлари Ўзбекистон Республикаси Миллий архив фонди таркибига киритилиши керак бўлган давлат корхоналари, муассасалари ва ташкилотлари тоифасини белгилайди;

ҳужжатларни республика аҳамиятига ва маҳаллий аҳамиятга эга бўлган архив фондлари таркибига киритиш масалаларини ҳал қилади, республика аҳамиятига эга бўлган фондларни Ўзбекистон Республикаси Давлат архивларида тўплаш, шунингдек Ўзбекистон доирасида ҳужжатларни Ўзбекистон Республикаси, Қорақалпоғистон Республикаси, Тошкент шаҳри давлат архивларидан вилоятларнинг давлат архивларига ва аксинча, бир вилоятнинг давлат архивидан бошқа вилоятнинг давлат архивига бериш тадбирларини амалга оширади;

Ўзбекистон Республикаси Миллий архив фонди ҳужжатларини доимий равишда сақлайдиган архив муассасаларига гувоҳномалар беради;

Ўзбекистон Республикаси Миллий архив фонди ҳужжатларининг республика давлат архивларида рўйхатга олинишини ташкил қилади;

архив муассасалари томонидан юридик ва жисмоний шахсларга фаолият соҳаси бўйича кўрсатиладиган пулли хизматлар рўйхатини ва прейскурантларини қонун ҳужжатларида белгиланган тартибда тасдиқлайди;

Ўзбекистон Республикаси Миллий архив фонди ҳужжатларининг марказлаштирилган давлат ҳисобини юритади;

юридик ва жисмоний шахсларга Ўзбекистон ҳудудида қадимий ҳужжатли ёдгорликларни тўплашга ва Ўзбекистон Республикаси Миллий архив фонди ҳужжатларини республикадан ташқарига вақтинча олиб кетишга белгиланган тартибда махсус рухсатномалар беради;

давлатга қарашли бўлмаган архив фонди ҳужжатларини сотиб олиш юзасидан давлатнинг имтиёзли ҳуқуқини амалга оширади, бу борада «Ўзархив» агентлиги тизими органлари ва муассасаларига кўмаклашади;

архив хизматлари, идоравий архивлар, шахсий таркиб бўйича ҳужжатларнинг идоралараро архивлари ишига тармоқлараро ташкилий-методик раҳбарликни ва назоратни, давлат ҳокимияти ва бошқаруви республика органлари ишларини юритишда ҳужжатларнинг ташкил этилишини назорат қилади;

идоравий архивлар шохобчаларини ривожлантириш ва уларнинг ишларини ташкил этиш бўйича тадбирларда қатнашади;

архив ҳужжатларини, Ўзбекистон Республикаси Миллий архив фонди ҳужжатларининг таркиби ва мазмуни тўғрисидаги маълумотнома-ахборот адабиётларини нашр этишни ташкил қилади, ретроспектив ахборотларга бўлган ижтимоий эҳтиёжларни ва ҳужжатлардан фойдаланиш самарадорлигини ўрганишга доир ишларни мувофиқлаштиради;

республика ташқарисидаги архив ҳужжатларини қайтариш тўғрисидаги таклифларни кўриб чиқади ва белгиланган тартибда киритади, чет элдаги Ўзбекистон тарихига оид архив ҳужжатларини аниқлашни ва уларни ёки уларнинг нусхаларини сотиб олишни ташкил этади;

давлатга қарашли бўлмаган архивлар эгаларига ушбу архивларнинг ҳужжатларини тўлдириш, сақлаш ва улардан фойдаланишда кўмаклашади;

республика бюджети лойиҳасига «Ўзархив» агентлигига бевосита бўйсунган архив муассасалари таъминотига харажатлар тўғрисидаги таклифларни ишлаб чиқади, уларнинг молиялаштирилишини ва сарфланиши назорат қилинишини таъминлайди;

Ўзбекистон Республикасининг архив иши ва уни юритиш соҳасидаги халқаро фаолиятини амалга оширувчи ваколатли маъмурий органи сифатида иш кўради. Халқаро ташкилотларнинг архив иши ва уни юритиш соҳасидаги конгрессларида, съездларида, конференцияларида Ўзбекистон Республикаси номидан қатнашади, архив иши ва уни юритиш соҳасида халқаро идоралараро битимлар ва шартномаларни белгиланган тартибда тузади;

архив иши ва уни юритиш соҳасидаги халқаро, ҳукуматлараро битимлар ва шартномалар лойиҳаларини тайёрлайди;

архив иши ва уни юритиш учун халқаро молия институтлари, хорижий мамлакатлар ҳукуматлари томонидан ажратиладиган грантлардан фойдаланишнинг устувор йўналишларини белгилайди;

архив иши ва уни юритиш соҳасини ривожлантиришга инвестицияларни, шу жумладан хорижий инвестицияларни жалб этиш бўйича тендерлар, танловлар ва савдоларни ташкил қилади ва уларни ўтказишда қатнашади;

архив муассасалари, идоравий архивлар ҳамда республика корхоналари, муассасалари ва ташкилотларининг ишларни юритиш хизматлари ходимларини қайта тайёрлашни ва уларнинг малакасини оширишни ташкил қилади;

архив иши ва иш юритиш соҳасидаги кадрларни сифатли тайёрлашда олий ва ўрта махсус, касб-ҳунар ўқув юртларига кўмаклашади;

Ўзбекистон Республикаси Миллий архив фондининг ахборот ресурслари ва электрон ҳужжатлари ҳимоя қилиниши таъминланишини ташкил этади;

Ўзбекистон Республикаси Миллий архив фонди алоҳида қимматли ва ноёб ҳужжатларининг эҳтиёт нусхалари яратилишини ташкил қилади;

фуқароларнинг таклифлари, аризалари ва шикоятларининг ўз вақтида кўриб чиқилишини ташкил қилади; консуллик сўровлари бажарилишини таъминлайди.

«Ўзархив» агентлиги қонун ҳужжатларида назарда тутилган бошқа функцияларни ҳам бажаради.

9. «Ўзархив» агентлиги қуйидаги ҳуқуқларга эга:

ўз ваколатлари доирасида, Ўзбекистон Республикаси қонун ҳужжатларига мувофиқ, архив иши ва уни юритиш соҳасида юридик ва жисмоний шахслар учун мажбурий бўлган норматив ҳужжатларни нашр этиш;

давлат ҳокимияти ва бошқаруви органлари вакиллари, тармоқ давлат фондлари, республика музейлари ва кутубхоналарининг қўлёзмалар бўлимларининг идоравий сақлаш босқичидаги архив ҳужжатлари сақланишининг ҳолати ва иш юритиш ташкил этилиши тўғрисидаги ҳисоботларни эшитиш, «Ўзархив» агентлиги ваколатига тегишли масалалар бўйича ахборотни улардан белгиланган тартибда сўраб олиш;

Ўзбекистон Республикаси Миллий архив фонди ҳужжатларини доимий сақловчи республика давлат архивлари, тармоқ давлат фондлари, вазирликлар, давлат қўмиталари, идоралар, корхоналар, муассасалар, ташкилотлар, кутубхоналар ва музейларнинг қўлёзмалар бўлимлари, сиёсий, жамоат, диний ташкилотлар ва бирлашмалар, қўшма корхоналар ва бошқа юридик шахслардан, шунингдек фуқаролардан «Ўзархив» агентлиги республика фонд каталоги учун тегишли маълумотларни олиш;

давлат ҳокимияти ва бошқаруви республика органларидан ҳамда идоравий бўйсунишидан ва мулкчилик шаклларидан қатъи назар, корхоналар, муассасалар ва ташкилотлардан архивнинг иши ва иш юритиш ҳужжатларини ташкил этиш тўғрисида зарур материалларни олиш;

давлат ҳокимияти органларидан тугатилаётган корхоналар тўғрисида ахборот олиш;

мансабдор шахсларнинг Ўзбекистон Республикаси Миллий архив фонди ҳужжатларининг ўғирланиши, яроқсиз ҳолга келтирилиши, яширилиши, йўқотилиши ёки ноқонуний йўқ қилинишига олиб келган шароитлар яратганлиги ҳоллари тўғрисида тергов органларига хабар қилиш;

архив иши ва уни юритиш масалаларини кўриб чиқиш учун доимий ва вақтинчалик идоралараро комиссиялар, кенгашлар тузиш;

республика вазирликлари ва идоралари томонидан ишлаб чиқиладиган архив иши ва иш юритиш ҳужжатларини ташкил этиш масалалари бўйича қоидалар, низомлар, йўриқномалар, ўқув дастурлари ва бошқа норматив ҳужжатларни келишиб олиш;

ўз ваколатлари доирасида халқаро ташкилотлар, шунингдек хорижий мансабдор ва хусусий шахслар билан алоқаларни амалга ошириш, архив иши бўйича белгиланган тартибда халқаро, идоралараро шартномалар тузиш;

архившунослик, ҳужжатшунослик ва археография соҳасидаги ишларни бажариш юзасидан танловлар эълон қилиш.

«Ўзархив» агентлиги ўзига юкланган вазифалардан келиб чиқадиган ўз ваколатлари доирасидаги бошқа ҳуқуқларга ҳам эгадир.

«Ўзархив» агентлигининг мансабдор шахслари ўз хизмат мажбуриятларини бажариш учун давлат ҳокимияти ва бошқаруви органлари, республика корхоналари,муассасалари, ташкилотлари ва бирлашмаларининг архивлари ва иш юритиш хизматларига белгиланган тартибда кириш ҳуқуқига эгадирлар.

10. «Ўзархив» агентлиги:

Ўзбекистон Республикаси Миллий архив фондини шакллантириш;

архив ҳужжатларининг давлат ҳисобини юритиш;

республика давлат архивларида сақланаётган ҳужжатларнинг сақланишини таъминлаш;

архив ҳужжатларидан фуқаролар, жамият ва давлат манфаатлари учун фойдаланиш;

архив иши ҳудудий бошқармалари фаолиятини ташкил этиш учун жавоб беради.

11. Агентликка Ўзбекистон Республикаси Президенти томонидан лавозимга тасдиқланадиган ва лавозимдан озод этиладиган раис бошчилик қилади.

Бош директорнинг белгиланган тартибда Вазирлар Маҳкамаси томонидан лавозимга тайинланадиган ва лавозимдан озод қилинадиган бир нафар ўринбосари бўлади.

12. Қорақалпоғистон Республикаси, вилоятлар ва Тошкент шаҳар архив иши ҳудудий бошқармалари бошлиқлари Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари билан келишув бўйича «Ўзархив» агентлиги Бош директори томонидан лавозимга тайинланадилар ва лавозимдан озод қилинадилар.

13. «Ўзархив» агентлигида бош директор (ҳайъат раиси), унинг ўринбосари (лавозимига кўра), шунингдек «Ўзархив» агентлиги фаолиятининг асосий йўналишларини мувофиқлаштирувчи таркибий бўлинмалари раҳбарларидан иборат таркибда ҳайъат ташкил этилади.

Ҳайъатнинг аъзолари сони ва шахсий таркиби бош директорнинг тақдимномасига биноан Ўзбекистон Республикаси Вазирлар Маҳкамаси томонидан тасдиқланади.

Ҳайъат қуйидагилар билан боғлиқ масалаларни кўриб чиқади:

«Ўзархив» агентлиги фаолиятининг архив иши ва иш юритишни янада ривожлантириш, илмий-техник ютуқлардан кенг кўламли фойдаланиш, идоралараро ва давлатлараро алоқаларни ривожлантириш бўйича ушбу Низомда белгиланган асосий йўналишларини тайёрлаш ва амалга ошириш;

«Ўзархив» агентлиги номенклатурасига кирадиган лавозимларга кадрларни танлаш, жой-жойига қўйиш, тайёрлаш ва қайта тайёрлаш;

Ўзбекистон Республикаси Президентининг фармонлари, қарорлари ва фармойишларида, Ўзбекистон Республикаси Вазирлар Маҳкамаси қарорлари ва фармойишларида белгиланган вазифаларни амалга ошириш бўйича ижро интизомини мустаҳкамлаш, уларнинг ўз вақтида ва сифатли амалга оширилишини таъминлаш учун «Ўзархив» агентлиги раҳбарлари ва ходимларининг шахсий жавобгарлигини ошириш.

Ҳайъат «Ўзархив» агентлиги ваколатига тааллуқли бошқа масалаларни ҳам кўриб чиқиш ҳуқуқига эга.

Ҳайъат мажлисига «Ўзархив» агентлиги ваколатига кирадиган масалалар бўйича бошқа вазирликлар, давлат қўмиталари, идоралар, маҳаллий давлат ҳокимияти органлари, корхоналар, муассасалар, ташкилотлар раҳбарлари таклиф этилиши мумкин.

Ҳайъат унинг мажлисида таркибининг ярмидан кўпи қатнашган тақдирда ваколатли бўлади. Кўриб чиқилаётган масалалар бўйича қарорлар оддий кўпчилик овоз билан қабул қилинади.

Ҳайъат қарорлари бош директорнинг буйруқлари билан амалга оширилади. Бош директор ва ҳайъат аъзолари ўртасида келишмовчиликлар пайдо бўлган тақдирда бош директор пайдо бўлган келишмовчиликлар тўғрисида Ўзбекистон Республикаси Вазирлар Маҳкамасига ахборот берган ҳолда мустақил равишда қарор қабул қилади. Ҳайъат аъзолари ҳам ўз фикр-мулоҳазаларини Ўзбекистон Республикаси Вазирлар Маҳкамасига хабар қилишлари мумкин.

Ҳайъат фаолияти тартиби унинг ҳайъат тасдиқлайдиган регламентида белгиланади.

14. «Ўзархив» агентлиги ҳузурида:

республикада архив иши ва иш юритишнинг илмий муаммоларини кўриб чиқиш бўйича илмий кенгаш;

Ўзбекистон Республикаси Миллий архив фонди таркибини белгилаш ва ҳужжатларнинг қимматини экспертизадан ўтказиш билан боғлиқ масалаларни кўриб чиқиш учун марказий эксперт-текшириш комиссияси фаолият кўрсатади.

Кўрсатиб ўтилган кенгаш ва комиссия тўғрисидаги низом ҳамда уларнинг шахсий таркиблари «Ўзархив» агентлиги Бош директори томонидан тасдиқланади.

15. «Ўзархив» агентлиги ва унинг ҳудудий бошқармалари фаолиятини молиялаштириш давлат бюджети маблағлари, шунингдек амалдаги қонун ҳужжатларига зид бўлмаган бошқа манбалар ҳисобидан амалга оширилади.

16. «Ўзархив» агентлиги юридик шахс ҳисобланади, Ўзбекистон Республикаси Давлат герби тасвири туширилган ҳамда ўз номи ёзилган муҳрга, банк муассасаларида ҳисоб-китоб ва бошқа ҳисоб рақамларига эга бўлади.

17. «Ўзархив» агентлигини қайта ташкил этиш ва тугатиш Ўзбекистон Республикаси қонун ҳужжатларига мувофиқ амалга оширилади.