Oʻzbekiston Respublikasi Hukumati va Serbiya Respublikasi Hukumati (keyingi oʻrinlarda alohida “Ishtirokchi” va birgalikda “Ishtirokchilar” deb ataluvchilar),

Ishtirokchilarning barqaror, xavfsiz va diversifikatsiyalangan transport va raqamli bogʻliqlik tarmoqlarini mustahkamlashga boʻlgan umumiy manfaatdorligini eʼtirof etib;

taʼminot zanjiri ishonchliligini oshirish va barqaror iqtisodiy oʻsishni qoʻllab-quvvatlash uchun muqobil Yevrosiyo savdo yoʻllarining muhimligini tan olib;

Serbiya Respublikasining Janubi-Sharqiy Yevropa transport koridorlarini Markaziy va Gʻarbiy Yevropa bozorlari bilan bogʻlovchi Gʻarbiy Bolqondagi transport va logistika markazi sifatidagi rolini eʼtirof etib;

Oʻzbekistonning Markaziy Osiyodagi tranzit markazi sifatidagi strategik roli va uning Sharqiy Osiyo hamda Markaziy Osiyoni Janubiy Kavkaz, Turkiya va Yevropa bozorlari bilan bogʻlovchi Transkaspiy xalqaro transport yoʻnalishi (keyingi oʻrinlarda “Oʻrta koridor” deb ataluvchi) boʻylab joylashuvini, shuningdek, Oʻzbekistonning koridorni qoʻllab-quvvatlash maqsadida infratuzilmani modernizatsiya qilish boʻyicha ulkan rejalarini, shu jumladan, uning Janubi-Sharqiy Yevropa tomon davomiy bogʻliqligini inobatga olib;

Serbiya Respublikasining Oʻrta koridor va Janubi-Sharqiy Yevropa bozorlari oʻrtasida samarali, tijorat jihatdan maqsadga muvofiq va ekologik jihatdan barqaror bogʻliqlikni ragʻbatlantirishga boʻlgan qiziqishini qayd etib;

savdoga koʻmaklashish, xususiy sektorning jalb etilishi va loyihaga asoslangan hamkorlikni qoʻllab-quvvatlovchi moslashuvchan va amaliy hamkorlik asosini yaratish istagida;

quyidagilar toʻgʻrisida oʻzaro anglashuvga erishdilar:

Mazkur Anglashuv Memorandumining maqsadi Oʻrta koridorni rivojlantirishda Ishtirokchilar oʻrtasidagi hamkorlik uchun huquqiy jihatdan majburiy boʻlmagan asos yaratishdan iborat boʻlib, u quyidagilarga qaratilgan hisoblanadi:

(a) Oʻzbekiston Respublikasi, Serbiya Respublikasi hamda Yevrosiyo va Janubi-Sharqiy Yevropaning kengroq bozorlari oʻrtasidagi savdo va investitsiya aloqalarini mustahkamlash;

(b) Oʻrta koridorning rivojlanishi va operatsion samaradorligini qoʻllab-quvvatlash; hamda

(c) innovatsiya, barqarorlik va xususiy sektor ishtirokini ragʻbatlantirish.

Mazkur Memorandum doirasidagi hamkorlik quyidagi yoʻnalishlarni oʻz ichiga olishi mumkin, ammo ular bilan cheklanmaydi:

1. Oʻrta koridor va Yevrosiyoning bogʻliqligi

(a) Oʻrta koridorning samaradorligi, ishonchliligi va tijoriy jozibadorligini oshirishga qaratilgan siyosiy va amaliy tashabbuslarni qoʻllab-quvvatlash;

(b) muammoli nuqtalarni bartaraf etish uchun ustuvorliklarni uygʻunlashtirish maqsadidabilan yanada samarali mintaqaviy muvofiqlashtiruvni tegishli mintaqaviy va xalqaro bogʻliqlik tashabbuslari bilan birgalikda kuchaytirish.

2. Investitsiya va xususiy sektorning jalb etilishi

(a) Ishtirokchilarning davlat muassasalari va xususiy sektor subyektlari, shu jumladan, ammo ular bilan cheklanmagan holda, texnologiya, dizayn/arxitektura, qurilish va moliya sohalarida faoliyat yurituvchi kompaniyalar oʻrtasidagi hamkorlikka xususiy subyektlarning investitsiya qarorlari hukumatlar tomonidan yoʻnaltirilishi mumkin emasligini eʼtirof etgan holda koʻmaklashish;

(b) har ikki mamlakat kompaniyalarining infratuzilmani modernizatsiya qilishni rivojlantirishda ishtirok etishiga koʻmaklashish;

(c) transport infratuzilmasi, logistika xizmatlari va raqamli platformalarga investitsiya kiritish imkoniyatlarini ragʻbatlantirish;

(d) Oʻrta koridor infratuzilmasini rivojlantirish bilan bogʻliq xaridlar jarayonlarining shaffofligi va raqobatbardoshligini oshirish, shu jumladan, Oʻzbekistonning Infratuzilma shaffofligi tashabbusi (CoST) bilan hamkorligini qoʻllab-quvvatlash.

3. Barqarorlik va kam uglerodli transport

(a) xavflarni kamaytirish va toʻliq hayotiy sikl davomida olinadigan foydalarni taʼminlash uchun transport infratuzilmasini iqlim muammolariga moslashtirish;

(b) barcha tegishli xalqaro ekologik va ijtimoiy standartlarga muvofiqlashtirishni ragʻbatlantirish, xavfsizlik va moliyaviy jihatdan maqbullikni taʼminlash hamda barcha uchun mobillik imkoniyatidan teng huquqli foydalanishni taʼminlash;

(c) nol emissiya yoʻnalishlari sari izchil taraqqiyotni taʼminlash uchun bevosita Milliy miqyosda belgilanadigan hissalar bilan bogʻlagan holda, issiqxona gazlari chiqarilishi va atrof-muhitga taʼsirni minimallashtiradigan transport turlari va yoqilgʻilariga oʻtishni qoʻllab-quvvatlash.

4. Salohiyatni oshirish va bilim almashinuvi

(a) Oʻrta koridor va transport/infratuzilmani Oʻzbekiston Respublikasi va Serbiya Respublikasi oʻrtasidagi Iqtisodiy hamkorlik boʻyicha hukumatlararo komissiya kun tartibining doimiy masalasi sifatida kiritish;

(b) Ishtirokchilar oʻrtasida kelishilgan hollarda transportni boshqarish, bojxona jarayonlarini soddalashtirish, energiya samaradorligi, ekologik standartlar, sanksiyalarni chetlab oʻtishning oldini olish hamda tovar va xizmatlar harakatiga koʻmaklashishni qamrab olgan holda ekspertlar almashinuvi, ilgʻor tajriba almashinuvi, oʻquv tadbirlari va oʻrganuv tashriflariga koʻmaklashish.

1. Ishtirokchilar mazkur Memorandum doirasidagi faoliyatni muvofiqlashtirish uchun vakolatli organlar yoki aloqa nuqtalarini belgilaydilar.

2. Oʻzaro kelishuv asosida, hamkorlik qoʻshma ishchi guruhlar, loyiha kelishuvlari, texnik hamkorlik dasturlari yoki ishbilarmonlik hamkorligi platformalari orqali amalga oshirilishi mumkin.

1. Mazkur Memorandum xalqaro yoki milliy huquqqa muvofiq huquq yoki majburiyatlar yuzaga keltirishni nazarda tutmaydi.

2. Mazkur Memorandum doirasida amalga oshiriladigan faoliyat har bir Ishtirokchi davlatining amaldagi qonunlari va normativ-huquqiy hujjatlariga muvofiq olib boriladi.

1. Mazkur Memorandum hech bir Ishtirokchi uchun moliyaviy majburiyatlar yuzaga keltirmaydi.

2. Mazkur moddaning 1-bandida koʻrsatilganidan qatʼi nazar, basharti mazkur Memorandum doirasidagi faoliyat bilan bogʻliq har qanday moliyaviy majburiyatlar yuzaga kelsa, bunday majburiyatlar mablagʻlar mavjudligiga va alohida yozma kelishuvlarga bogʻliq boʻladi.

Tegishli hollarda Ishtirokchilar mazkur Memorandum doirasida almashilgan maxfiy yoki xizmat doirasida foydalaniladigan axborotni oʻz davlatlarining qonunlari va siyosatiga muvofiq himoya qilish uchun tegishli choralar koʻradilar.

Mazkur Memorandumni talqin qilish yoki amalga oshirishdan kelib chiqadigan har qanday kelishmovchiliklar Ishtirokchilar oʻrtasida maslahatlashuvlar va muloqot orqali hal etiladi.

Mazkur Memorandumga Ishtirokchilarning oʻzaro yozma roziligi bilan istalgan vaqtda oʻzgartirishlar kiritilishi mumkin.

1. Mazkur Memorandum imzolangan sanadan boshlab amal qiladi.

2. U besh (5) yil muddat davomida amalda boʻladi va Ishtirokchilarning oʻzaro yozma roziligi bilan uzaytirilishi mumkin.

3. Har qaysi Ishtirokchi diplomatik kanallar orqali yozma xabarnoma yuborish orqali mazkur Memorandumni toʻxtatishi mumkin. Toʻxtatilish, basharti boshqacha tarzda kelishilmagan boʻlsa, amalga oshirilayotgan hamkorlik faoliyatlariga daxl qilmaydi.

Belgrad shahrida, 2026-yil 8-sentabrda, ikki nusxada, oʻzbek, serb va ingliz tillarida imzolandi, bunda barcha matnlar teng autentikdir. Talqin qilishda har qanday tafovut yuzaga kelgan taqdirda, ingliz tilidagi matn ustuvor hisoblanadi.