Шошилинч тиббий ёрдам масалалари бўйича тиббиёт ходимлари ва йўриқчиларини ўз вақтида ва сифатли тайёрлаш ҳамда қайта тайёрлашни таъминлаш мақсадида Вазирлар Маҳкамаси қарор қилади:

1. Иккинчи Тошкент тиббиёт институтининг анестезиология ва реаниматология кафедраси негизида Шошилинч тиббий ёрдам ўқув маркази ташкил этилсин.

Қуйидагилар Марказнинг асосий вазифалари этиб белгилансин:

аҳолини, халқ таълими, олий ва ўрта махсус таълим ходимларини, вазирликлар ва идораларнинг авария-қутқарув хизмати шахсий таркибини дастлабки тиббий ёрдам кўрсатиш кўникмаларига ўргатиш бўйича тиббиёт ходимларини, йўриқчиларини тайёрлаш ва қайта тайёрлаш;

илғор тажрибаларни, шу жумладан хорижий мамлакатларнинг шошилинч тиббий ёрдам кўрсатиш тажрибаларини умумлаштириш ва оммалаштириш;

даволашга ётқизишгача бўлган босқичда тиббий ёрдам кўрсатишнинг ташкилий шакллари ва усулларини ишлаб чиқиш ва такомиллаштириш;

Марказ ишлари йўналишлари бўйича ноширлик фаолиятини амалга ошириш, мутахассисларни тайёрлаш асослари бўйича меъёрий ҳужжатларни ишлаб чиқиш;

илмий-тадқиқот ишларини бажариш, шошилинч тиббий ёрдам кўрсатиш муаммолари бўйича семинарлар ва конференцияларда қатнашиш.

2. Марказнинг тузилмаси ва Марказ тўғрисидаги низом 1 ва 2-иловаларга мувофиқ тасдиқлансин.

Белгилаб қўйилсинки, Марказ директори Ўзбекистон Республикаси Ссғлиқни сақлаш вазирлиги томонидан тайинланади.

3. Маълумот учун қабул қилинсинки, Марказни маблағ билан таъминлаш, шу жумладан тиббиёт ходимларини тайёрлаш ва қайта тайёрлаш бўйича харажатлар педагогик ва хўжалик фаолиятидан тушадиган ўз маблағлари, шунингдек Америка халқаро соғлиқни сақлаш уюшмасининг молиявий ёрдами ҳисобидан амалга оширилади.

4. Ўзбекистон Республикаси Соғлиқни сақлаш вазирлиги:

Марказнинг ташкилий даврда муваффақиятли фаолият кўрсатиши ва уни ўқув қўлланмалари ва санитария автотранспорти билан таъминлаш учун ўзига қарашли муассасаларнинг моддий-техника базасини мустаҳкамлашга назарда тутилган маблағлар ҳисобидан 1998 йил I чорагида зарур маблағлар ажратсин;

Марказнинг фаолият кўрсатишини ва юқори малакали педагог кадрлар билан тўлдирилишини таъминласин;

бир ой муддатда мақсадли ўқув дастурларини кўриб чиқсин ва белгиланган тартибда тасдиқласин;

Шошилинч тиббий ёрдам хизматини ривожлантириш концепциясини 1998 йил 1 апрелга қадар ишлаб чиқсин ва Вазирлар Маҳкамасига киритсин.

5. Ўзбекистон Республикаси Молия вазирлиги, Фавқулодда вазиятлар вазирлиги, Ички ишлар вазирлиги, Мудофаа вазирлиги, Халқ таълими вазирлиги, Олий ва ўрта махсус таълим вазирлиги, бошқа вазирликлар ва идоралар ҳар йили бюджет прогнозларини шакллантиришда шошилинч тиббий ёрдам ўқув марказида мутахассислар ва йўриқчиларни махсус дастурлар бўйича тайёрлаш ва қайта тайёрлаш харажатларини назарда тутсинлар.

6. Ўзбекистон почта ва телекоммуникациялар агентлиги Марказни телетайп ва махсус телефон алоқаси билан жиҳозлаш чораларини кўрсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А. А. Азизхўжаев зиммасига юклансин.

1.1. Шошилинч тиббий ёрдам ўқув маркази (бундан кейин матнда Марказ деб аталади) Иккинчи Тошкент тиббиёт институтининг анестезиология ва реаниматология кафедраси негизида Америка халқаро соғлиқни сақлаш уюшмаси (АХСУ) кўмагида ташкил этилган.

1.2. Марказ АХСУ билан биргаликда тузилган ва Ўзбекистон Республикаси Соғлиқни сақлаш вазирлиги томонидан тасдиқланган ўқув дастури бўйича шошилинч тиббий ёрдам кўрсатиш борасида тингловчилар тайёрлашни таъминлайди. Тингловчилар гуруҳлари аҳолига тез ва шошилинч тиббий ёрдам хизмати тиббий ходимларидан, йўриқчиларидан, халқ таълими ва олий таълим муассасалари, ҳалокатларга тиббий ёрдам кўрсатиш хизмати тузилмалари, қутқарувчилар тузилмалари шахсий таркиби, Фавқулодда вазиятлар вазирлиги, Ички ишлар вазирлиги ва Мудофаа вазирлигининг ишлари фавқулодда вазиятлар оқибатларини тугатиш билан боғлиқ бўлган хизматлари ходимларидан иборат бўлади.

1.3. Марказ директори Ўзбекистон Республикаси Соғлиқни сақлаш вазирлигининг буйруғи билан фавқулодда вазиятларда шошилинч тиббий ёрдам кўрсатишни ташкил қилиш масалалари бўйича энг малакали илмий ходимлар-педагоглар орасидан тайинланади.

1.4. Марказ Соғлиқни сақлаш вазирлигига бўйсунади ва Марказнинг илмий-услубий ишларини, ўқув жараёнини маъмурий-хўжалик фаолиятини ташкил этиш учун жавоб беради.

2.1. Аҳолини ҳамда халқ таълими ва олий таълим тизимининг авария-қутқарув, милиция ва ёнғиндан сақлаш тузилмалари шахсий таркибининг ҳалокатларнинг санитария оқибатларини тугатишда ва экстремал вазиятларда беморларга, шикастланганларга тиббий ёрдам кўрсатишда қатнашувчи ходимларини АХСУ билан келишилган ва Ўзбекистон Республикаси Соғлиқни сақлаш вазирлиги тасдиқлаган ўқув дастурлари бўйича дастлабки тиббий ёрдам кўрсатиш кўникмаларига ўргатувчи тиббиёт ходимларини, йўриқчиларини тайёрлаш.

2.2. Пировард мақсадни, курсларда тайёргарликдан ўтувчи мутахассисларнинг тайёргарлик даражасини, тингловчиларнинг умумий маълумоти даражасини ҳисобга олган ҳолда тингловчилар турли тоифаларини тайёрлаш дастурларини ишлаб чиқиш, уларга тузатишлар киритиш ва уларни бирхиллаштириш.

2.3. Ўқиб бўлинган курс бўйича имтиҳонлардан ўтказиш ва тингловчиларнинг тоифаларига кўра, таълим курслари бўйича сертификатлар бериш.

2.4. Илғор ўқув юртлари ва бошқа мамлакатларнинг ҳалокатлар тиббиёти бўйича тажрибасини умумлаштириш ва оммалаштириш.

2.5. Соҳага доир материаллар, тавсияномалар ва қўлланмаларни тайёрлаш ва эълон қилиш бўйича ноширлик фаолиятини амалга ошириш, шунингдек ҳалокатлар тиббиётига оид видеофильмлар ва слайдлар яратиш.

2.6. Тиббий ёрдам кўрсатиш, даволашга ётқизишгача бўлган босқичда тиббий хизмат кўрсатиш сифати ва маданиятини оширишнинг ташкилий шакл ва усулларини ишлаб чиқиш ва такомиллаштириш.

2.7. Шошилинч тиббий ёрдам бўйича илмий-тадқиқот ишларини бажариш, семинар ва конференцияларда қатнашиш.

2.8. Мутахассислар тайёрлаш асослари бўйича меъёрий ҳужжатларни ишлаб чиқиш.

3.1. Ҳалокатлар тиббиёти хизматини ривожлантиришнинг миллий стратегияси ва концепциясини ишлаб чиқишда қатнашади.

3.2. Илмий тадқиқотлар режаларини ишлаб чиқади. Халқаро танловларда, шунингдек Соғлиқни сақлаш вазирлиги ҳамда Фан ва техника давлат қўмитасининг илмий-тадқиқот ишларини маблағ билан таъминлаш бўйича танловларида қатнашади.

3.3. Республиканинг ва бошқа давлатларнинг давлат муассасалари, илмий-тадқиқот институтлари, тиббиёт ўқув юртлари ва етакчи мутахассислар билан Марказ соҳаси бўйича мутахассислар тайёрлаш масалалари борасида ҳамкорликни амалга оширади.

3.4. Мулкчиликнинг барча шаклларидаги корхоналар, юридик ва жисмоний шахслар учун, амалдаги қонунчиликка мувофиқ, асосий ўқув жараёни доирасида консультациялар, услубий ишланмалар ва ўқув қўлланмалари, кадрлар тайёрлаш бўйича пулли хизматлар кўрсатади.

3.5. Ўз маблағлари ва халқаро хайрия жамғармалари, АХСУ ажратмалари ҳамда хўжалик ҳисобидаги фаолияти даромадлари доирасида ўз хўжалик фаолиятини мустақил режалаштиради ва амалга оширади.

4.1. Хўжалик ҳисобидан тушадиган ўз маблағлари.

4.2. АХСУ ажратмалари.

4.3. Хайрия жамғармалари, жамоат ташкилотлари ва бошқаларнинг маблағлари.

5.1. Марказ қонунчиликда белгиланган тартибда жорий, бухгалтерия ва статистика ҳисобини амалга оширади.

5.2. Марказ белгиланган тартибда, тасдиқланган шаклда ва белгиланган муддатларда республика Соғлиқни сақлаш вазирлигига тегишли ахборот топширади.

6.1. Марказ Ўзбекистон Республикаси Герби тасвирланган, ўз номи давлат тилида ёзилган муҳрга, шунингдек юридик шахснинг бошқа рамзий белгиларига эга бўлади.

6.2. Марказ банкда мустақил ҳисоб-китоб рақамини очиш ҳамда Марказнинг мақсади ва вазифаларига жавоб берадиган молиявий операцияларни амалга ошириш ҳуқуқига эга.

7. Марказни тугатиш ва қайта ташкил қилиш Ўзбекистон Республикаси Вазирлар Маҳкамаси қарорига мувофиқ амалга оширилади.