Ўзбекистон Республикаси Олий Кенгашининг «Давлат уй-жой фондини хусусийлаштириш тўғрисида» Ўзбекистон Республикаси Қонунини амалга киритиш тартиби ҳақида»ги қарорини бажариш юзасидан Вазирлар Маҳкамаси қарор қилади:

1. Қуйидагилар тасдиқлансин:

Хусусийлаштирилган квартиралар (квартираларнинг бир қисми), уйлар (уйларнинг бир қисми)ни бошқаларга бериш ва мерос қилиб қолдиришда мулкчилик ҳуқуқи ўтиши ҳақидаги шартномаларни расмийлаштириш тўғрисидаги Низом 1-иловага мувофиқ;

Ўзбекистон Республикаси Мудофаа вазирлиги уй-жой фондини хусусийлаштириш тартиби тўғрисидаги Низом 2-иловага мувофиқ.

3. Ўзбекистон Республикаси Давлат мулки қўмитаси ва Ўзбекистон Республикаси Адлия вазирлигининг давлат уй-жой фондини хусусийлаштириш тўғрисида Низомга ҳамда давлат уй-жой фондини хусусийлаштириш, сақлаш ва ундан фойдаланиш тартиби тўғрисидаги Қоидаларига ўзгартириш ва қўшимчалар киритиш, шунингдек, Вазирлар Маҳкамасининг баъзи қарорларини 3-иловага мувофиқ ўз кучини йўқотган деб ҳисоблаш ҳақидаги таклифи қабул қилинсин.

4. Мазкур қарорнинг бажарилишини назорат қилиш Вазирлар Маҳкамасининг Капитал қурилиш, транспорт ва алоқа ҳамда Юридик бўлимларига юклатилсин.

1. Хусусийлаштирилган уй-жойларга пулли, имтиёзли ёки бепул асосда мулк қилиб берилган квартиралар (квартираларнинг бир қисми), уйлар (уйларнинг бир қисми) киради.

2. Хусусийлаштирилган квартира (квартиранинг бир қисми), уй (уйнинг бир қисми) мулкдори жисмоний ва юридик шахсларнинг ҳуқуқларини ва қонун билан ҳимоя қилинадиган манфаатларини бузмаган ҳолда ушбу уй-жойга эгалик қилиш, ундан фойдаланиш ва уни тасарруф этиш ҳуқуқига эгадир.

Хусусийлаштирилган уй-жойнинг мулкдори мазкур уй-жойни ўз хоҳишига кўра ҳар қандай жисмоний ёки юридик шахсларга ёки кўчмас мулк билан операцияларни амалга оширишга вакил қилинган органга бериш ва васият қилиб қолдириш, шунингдек, уни кўчмас мулк савдоси бўйича кимошди савдосига қўйиш ҳуқуқига эгадир.

Квартирани (квартиранинг бир қисмини), уйни (уйнинг бир қисмини) жисмоний ёки юридик шахсларга беришда мулкдор бошқаларга бериш шартномасини тасдиқлатиш учун нотариал идорага, кимошди савдоси орқали сотишда эса – кўчмас мулк савдосини амалга оширишга вакил қилинган органга мурожаат қилади.

3. Бошқаларга берилаётган хусусийлаштирилган уй-жойнинг қиймати томонларнинг келишувига кўра, бироқ бошқаларга бериш пайтида уй-жойнинг техник хатлов кадастр бюроси хизмати томонидан баҳоланган қийматидан паст бўлмаган миқдорда белгиланади. Мерос тартибида ўтадиган уй-жойнинг қиймати меросхўрлик тайинланган кунда техник хатлов кадастр бюроси хизмати томонидан белгиланган баҳолаш маълумотлари ҳисобга олинган ҳолда белгиланади.

4. Хусусийлаштирилган квартирани (квартиранинг бир қисмини), уйни (уйнинг бир қисмини) сотиб олиш, алмаштириш ҳуқуқига Ўзбекистон Республикаси фуқаролари, чет эл фуқаролари ва доимий яшовчи ҳамда Ўзбекистон Республикаси ички ишлар органлари томонидан белгиланган тартибда берилган яшаш учун рухсатномаси бўлган фуқаролар эга бўладилар.

5. Юридик ёки жисмоний шахслар томонидан мулкдордан сотиб олинган уй-жойдан фақат уй-жой сифатида фойдаланилиши мумкин.

6. Хусусийлаштирилган уй-жойни бошқаларга бериш хоҳишини билдирган мулкдор қуйидаги ҳужжатларни тақдим этади:

паспорт ёки унинг ўрнини босувчи ҳужжат;

хусусийлаштирилган уй-жойга мулкчилик ҳуқуқини берувчи давлат далолатномаси ёхуд жойлардаги давлат ҳокимияти органи, бирлашма, корхона, ташкилот маъмуриятининг қарори ёки Ўзбекистон Республикаси Вазирлар Кенгаши ва Ўзбекистон Касаба уюшмалари Федерацияси Кенгашининг 1989 йил 21 июндаги 203-сон қарорига мувофиқ нотариал тартибда тасдиқланган уй-жойнинг олди-сотди шартномаси;

квартирага (квартиранинг бир қисмига), уйга (уйнинг бир қисмига) хатлов ҳужжатлар йиғма жилди;

оиланинг биргаликда яшовчи барча вояга етган аъзоларининг, шунингдек, квартиралар (квартираларнинг бир қисми)ни ёки уй (уйнинг бир қисми)ни хусусийлаштиришга розилик берган шахсларнинг нотариал тартибда тасдиқланган розилиги;

илова қилинаётган шаклдаги маълумотнома ёки уй дафтари;

бошқаларга бериш пайтида техник хатлов кадастр бюроси хизматлари томонидан бериладиган уй-жойнинг техник ҳолати ва қиймати тўғрисидаги белгиланган намунадаги хатлов маълумотномаси.

7. Ўзбекистон Республикасининг бошқа минтақаларида яшовчи фуқаролар томонидан Тошкент шаҳри ва Тошкент вилоятидаги хусусийлаштирилган квартираларни (квартираларнинг бир қисмини), уйларни (уйларнинг бир қисмини) сотиб олиш қонун ҳужжатларида белгиланган тартибда амалга оширилади.

Ўзбекистон Республикаси Вазирлар Маҳкамасининг «Хорижий фуқаролар ва фуқаролиги бўлмаган шахслар томонидан Ўзбекистон Республикасида уй-жой сотиб олинишини ҳамда доимий яшаш учун Тошкент шаҳрига келишни тартибга солиш тўғрисида» 1999 йил 27 февралдаги 92-сон қарорининг 4-бандида кўрсатилган шахслардан ташқари, Ўзбекистон Республикасида яшаш гувоҳномасига эга бўлган чет эл фуқаролари ва фуқаролиги бўлмаган шахслар, белгиланган тартибда Тошкент шаҳри ва Тошкент вилоятида доимий прописка олишгандан кейин, Тошкент шаҳри ва Тошкент вилоятидаги хусусийлаштирилган квартираларни (квартираларнинг бир қисмини), уйларни (уйларнинг бир қисмини) сотиб олишлари мумкин.

8. Олди-сотди, айирбошлаш, ҳадя қилиш шартномаларини нотариал тасдиқлашда ва хусусийлаштирилган уй-жойга меросхўрлик ҳуқуқи тўғрисида гувоҳнома беришда Ўзбекистон Республикаси Вазирлар Маҳкамаси томонидан белгиланган ставкалар бўйича давлат божи ундирилади.

9. Олди-сотди, айирбошлаш ва ҳадя қилиш битишувлари амалга оширилгандан сўнг, шунингдек, мулкчилик ҳуқуқи меросхўрлик тартибида ўтгандан сўнг, бошқаларга бериш ёки мерос қилиб қолдириш вақтидан қатъи назар, квартира (квартиранинг бир қисми), уй (уйнинг бир қисми) хусусийлаштирилган уй-жой мақомини йўқотади.

10. Нотариал тартибда расмийлаштирилган, техник хатлов бюросида рўйхатдан ўтказилган олди-сотди, айирбошлаш ва ҳадя қилиш шартномаси, шунингдек, қонун билан белгиланган тартибда берилган меросхўрлик ҳуқуқи тўғрисидаги гувоҳнома илгари хусусийлаштирилган сотиб олинган уй-жойга эгалик қилиш ҳуқуқини берувчи ҳуқуқни белгиловчи ҳужжат бўлиб ҳисобланади.

1. Мазкур Низом Ўзбекистон Республикаси Мудофаа вазирлигининг уй-жой фондини хусусийлаштиришнинг асосларини, тартибини ва шартларини белгилайди.

Мудофаа вазирлигининг уй-жой фонди квартираларини хусусийлаштириш «Давлат уй-жой фондини хусусийлаштириш тўғрисида» Ўзбекистон Республикаси Қонунига ва тегишли норматив ҳужжатларга мувофиқ амалга оширилади.

2. Ўзбекистон Республикаси Қуролли Кучларининг ҳарбий хизматчилари, Мудофаа вазирлигининг уй-жой фондида яшаётган ишчилар, хизматчилар ва бошқа шахслар хусусийлаштириш субъектлари ҳисобланадилар.

3. Ёпиқ ҳарбий шаҳарчалардаги квартиралар ва уйлар, ётоқхоналардаги квартиралар, яшаш учун яроқсиз деб топилган ёки хизмат квартиралари (хоналари) ҳисобланган, икки ёки ундан кўп ижарачилар яшайдиган квартиралар (эгаллаб турган квартираларни хусусийлаштириш бўйича уларнинг розилиги бўлмаган тақдирда), бошқа давлатларнинг Қуролли Кучларида хизматни ўтаётган ҳарбий хизматчилар томонидан банд этиб турилган бўш квартиралар ҳамда банд этиб қўйилган квартиралар хусусийлаштирилмайди.

4. Квартираларни хусусийлаштиришга доир ҳужжатларни расмийлаштириш шаҳар ва вилоятлар ҳокимликлари ҳузуридаги тегишли органлар томонидан уй-жой фонди эгаси билан тузилган шартнома шартлари бўйича ёки Мудофаа вазирлигининг квартиралардан фойдаланиш органлари томонидан амалга оширилади.

5. Квартираларни хусусийлаштирган ҳарбий хизматчилар, Ўзбекистон Республикаси Вазирлар Маҳкамаси томонидан тасдиқланган хусусийлаштирилган квартираларни, уйларни (уйларнинг бир қисмини) сотиб олиш-сотиш шартномаларини расмийлаштириш тартиби тўғрисидаги Низомга мувофиқ сотиш, алмаштириш ва ҳадя этиш билан боғлиқ барча ҳаракатларни амалга ошириш ҳуқуқига эгадирлар.

6. Ҳарбий хизматчилар янги хизмат жойига жўнаб кетишаётганда ўз хоҳишига кўра хусусийлаштирган уй-жойи бўйича Мудофаа вазирлигининг квартиралардан фойдаланиш органлари билан ёки уларнинг тавсиясига биноан навбатдаги ҳарбий хизматчи билан қолдиқ баланс қиймати бўйича сотиб олиш-сотиш шартномасини расмийлаштиришлари мумкин, бунда улар уй-жойни топширганлиги тўғрисида белгиланган намунадаги маълумотнома оладилар.

1. Ўзбекистон Республикаси Вазирлар Маҳкамасининг «Ўзбекистон Республикасида давлат уй-жой фондини хусусийлаштиришни давом эттириш тўғрисида» 1993 йил 1 мартдаги 114-сон қарори билан тасдиқланган Ўзбекистон Республикасида давлат уй-жой фондини хусусийлаштириш тўғрисидаги Низомга қуйидаги ўзгартиришлар ва қўшимчалар киритилсин:

муқаддиманинг иккинчи хатбошидаги ва бошқа барча бандлардаги «шахсий мулк» сўзлари «мулк» сўзи билан алмаштирилсин;

2-банднинг иккинчи хатбошидаги «тарихий» сўзидан олдин «архитектура» сўзи қўшилсин, «совхозлар ва бошқа давлат қишлоқ хўжалиги корхоналарининг уй-жой фондидан ташқари» сўзлари чиқариб ташлансин;

3-банд қуйидаги таҳрирда баён қилинсин:

«Ўзбекистон Республикасининг, бошқа давлатларнинг фуқаролари, Ўзбекистон Республикаси ҳудудида доимий яшайдиган (пропискада бўлган) фуқаролиги бўлмаган шахслар хусусийлаштириш субъектлари ҳисобланадилар.

Вазирликлар, давлат қўмиталари, идоралар, корхоналар, муассасалар, ташкилотлар ва Ўзбекистон Республикасининг, бошқа давлатларнинг ўзга юридик шахслари ўз ходимларини, пенсионерларини уй-жой билан таъминлаш учун мулкдордан уй-жой сотиб олишлари мумкин».

8-банд қуйидаги мазмундаги хатбоши билан тўлдирилсин:

«Агар квартира, уй (уйнинг бир қисми) учун бадални тўлиқ тўлаган ёки Ўзбекистон Республикаси Президенти фармонларига мувофиқ аризани ҳокимиятнинг маҳаллий органида рўйхатдан ўтказган, бироқ мулкка эгалик қилиш ҳуқуқини берувчи давлат далолатномасини олмасдан вафот этган тақдирда меросхўрлар ушбу квартирани, уйни (уйнинг бир қисмини) мерос қилиб олишга ҳақлидирлар»;

9, 10 ва 19-бандлар чиқариб ташлансин;

23-банд қуйидаги таҳрирда баён қилинсин:

«Давлат уй-жой фондини хусусийлаштиришнинг қандай бораётганини назорат қилиш мазкур уй-жой фондининг эгаси ёки улар томонидан вакил қилинган органлар томонидан амалга оширилади».

2. Ўзбекистон Республикаси Вазирлар Маҳкамасининг «Ўзбекистон Республикасида давлат уй-жой фондини хусусийлаштиришни давом эттириш тўғрисида» 1993 йил 1 мартдаги 114-сон қарори билан тасдиқланган Ўзбекистон Республикасида давлат уй-жой фондини хусусийлаштириш, сақлаш ва ундан фойдаланиш Қоидаларига қуйидаги ўзгартиришлар ва қўшимчалар киритилсин:

20-банд қуйидаги мазмундаги хатбоши билан тўлдирилсин:

«Агар квартира, уй (уйнинг бир қисми) учун бадални тўлиқ тўлаган ёки Ўзбекистон Республикаси Президентининг фармонларига мувофиқ аризани ҳокимиятнинг маҳаллий органида рўйхатдан ўтказган, бироқ мулкка эгалик қилиш ҳуқуқини берувчи давлат далолатномасини олмасдан вафот этган тақдирда меросхўрлар ушбу квартирани, уйни (уйнинг бир қисмини) мерос қилиб олишга ҳақлидирлар»;

22-банд қуйидагича таҳрирда баён қилинсин:

«Хусусийлаштирилган квартиранинг, уйнинг (уйнинг бир қисмининг) эгаси қуйидаги ҳуқуқларга эгадир:

Ўзбекистон Республикаси қонунчилигига мувофиқ жисмоний ва юридик шахсларнинг, давлатнинг ҳуқуқларини, қонун билан ҳимоя қилинадиган манфаатларини бузмаган ҳолда ушбу уй-жойга эгалик қилиш, ундан фойдаланиш ва уни тасарруф этиш;

Ўзбекистон Республикаси қонунчилиги билан белгиланган тартибда коммунал хизматлар учун ҳақ тўлаш, кўчмас мулк солиқлари, суғурта бадалларини тўлаш бўйича имтиёзлардан фойдаланиш;

эгаллаб турган уй-жой майдонидан қатъи назар, бошқа квартирани, уйни (уйнинг бир қисмини) сотиб олиш;

уй-жой майдонидан қатъи назар, «Давлат уй-жой фондини хусусийлаштириш тўғрисида» Ўзбекистон Республикаси Қонунига мувофиқ оила аъзоларини ва бошқа шахсларни квартирага, уйга (уйнинг бир қисмига) прописка қилиш;

прописка ва турар жойи бўйича ҳеч қандай чеклашларсиз, квартирани, уйни бошқа ҳар қандай квартирага, шу жумладан, кооператив уй-жойга алмаштириш;

ширкатлар ташкил этиш, уй-жойлардан ва биргаликда фойдаланиладиган жойлардан фойдаланишни ташкил этишни, давлат уй-жойлардан фойдаланиш ва тузатиш-қуриш ташкилотларини, кооперативларни, хусусий ҳамда бошқа хўжалик юритувчи субъектларни ҳам қўшганда, мустақил равишда белгилаш, уй-жойга хизмат кўрсатиш ва уларни тузатиш бўйича шартномалар тузиш;

уй-жойларни ва улар атрофидаги ҳудудларни сақлаш бўйича бажариладиган ишлар сифатини баҳолашда бевосита ёхуд ширкат таркибида қатнашиш, шартнома мажбуриятларини бажармаганлик ёки зарур даражада бажармаганлик учун корхоналар, муассасалар ва ташкилотларга, шунингдек, алоҳида шахсларга нисбатан жарима санкцияларини қўллаш бўйича материаллар тақдим этиш;

хусусийлаштирилган уй-жойлардан фуқароларни кўчирмасдан асосли тузатишни амалга ошириш мумкин бўлмаган вақт учун мулкдорлардан ёки уй-жойлардан фойдаланишга вакил қилинган органлардан уй-жойни ижарага олиш»;

23-банд чиқариб ташлансин.

1. Ўзбекистон Республикаси Вазирлар Маҳкамасининг «Тошкент шаҳрида давлат уй-жой фондини хусусийлаштириш тўғрисида» 1992 йил 13 августдаги 378-сон қарори;

2. Ўзбекистон Республикаси Вазирлар Маҳкамасининг «Ўзбекистон Республикасида давлат уй-жой фондини хусусийлаштиришни давом эттириш тўғрисида» 1993 йил 1 мартдаги 114-сон қарорининг 10-банди.