Жойларда олиб борилган текширишлар Коммунал хизмат кўрсатиш вазирлиги, Соғлиқни сақлаш вазирлиги ва бошқа идоралар, корхоналар ва ташкилотларнинг раҳбарлари аҳоли яшаш жойларининг санитария ҳолатига зарур даражада эътибор бермаётганлигини кўрсатади. Кўпгина шаҳарлар ва туманларнинг ҳокимлари, фуқароларнинг ўзини ўзи бошқариш органлари бу ишлардан четда турибдилар. Санитария-эпидемиология хизматлари уларга «Давлат санитария назорати тўғрисида»ги Қонун билан берилган ваколатларидан тўлиқ фойдаланмаяптилар, ижро этувчи-бошқарув органлари раҳбарларини тегишли ҳудудларнинг санитария ҳолати ёмонлиги учун етарли даражада жавобгарликка тортмаяптилар

Ўзбекистон Республикаси Президентининг «Санитария қонунларини бузганлик учун жавобгарликни кучайтириш тўғрисида» 1998 йил 2 мартдаги Фармонини бажариш учун ва республикада давлат санитария назоратининг роли ва самарадорлигини ошириш мақсадида Вазирлар Маҳкамаси қарор қилади:

1. Ўзбекистон Республикаси Соғлиқни сақлаш вазирлиги:

эҳтиётдан ва жорий давлат санитария назорати ҳамда касалликларнинг олдини олиш фаолиятини тартибга солувчи барча санитария нормалари ва қоидаларини 1998 йил 1 майгача белгиланган тартибда қайта кўриб чиқсин ва тасдиқласин;

ҳудудларни санитария жиҳатидан муҳофаза қилиш ва касалликларнинг олдини олиш давлат тадбирлари тизимида санитария-эпидемиология хизмати ролини кучайтириш мақсадида унинг ташкилий тузилмасини такомиллаштиришга оид таклифларни бир ой муддатда киритсин;

эҳтиётдан ва жорий давлат санитария назоратини ўтказишда асбоб-ускуналардан ва тадқиқотларнинг лаборатория усулларидан фойдаланишни 70 фоизгача етказсин;

икки ой муддатда касалликларга қарши курашиш тармоқлараро дастурлари бажарилишини таҳлил қилиб чиқсин, уларга тузатишлар киритсин ва манфаатдор вазирликлар ва идоралар билан биргаликда уларнинг бажарилишини таъминласин;

касалликларнинг олдини олишда аҳолини юқумли касалликлардан ҳимоя қилувчи самарадорликни сақлаб қолган ҳолда энг кам харажатли селектив иммунизация қилишни ва диагностик текширишларни кенг қўлласин;

«ЭКОСАН», «Маҳалла» жамғармалари ва ўзини ўзи бошқариш бошқа органлари билан биргаликда атроф муҳитнинг аҳволи, аҳолининг санитария-гигиена ва экология маданиятини ошириш тадбирлари ўтказилиши учун жамоатчилик назоратини кучайтирсин;

мазкур қарорнинг бажарилиши тўғрисида ҳар бир ярим йиллик якунлари бўйича Вазирлар Маҳкамасига ахборот берсин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Ўзбекистон Республикаси Макроиқтисодиёт ва статистика вазирлиги, Молия вазирлиги, Соғлиқни сақлаш вазирлиги, Коммунал хизмат кўрсатиш вазирлиги, бошқа вазирликлар ва идоралар бюджет прогнозларини шакллантиришда ҳудудларни санитария жиҳатидан муҳофаза қилиш, дори-дармонлар, диагностика препаратлари, вакциналар сотиб олиш ва касалликларнинг олдини олиш харажатларини энг устувор вазифалар сифатида кўриб чиқсинлар.

3. Ўзбекистон Республикаси Ички ишлар вазирлиги:

Қорақалпоғистон Республикаси Вазирлар Кенгаши ва вилоятлар, ҳокимликлари билан биргаликда аҳоли зич жойлашган шаҳарлар ва туманларда санитария милициясининг ихтисослаштирилган бўлинмаларини маҳаллий бюджетлар маблағлари ҳисобига белгиланган ходимлар сони доирасида ташкил этсин;

Ўзбекистон Республикаси Молия вазирлиги ва Соғлиқни сақлаш вазирлиги билан келишган ҳолда санитария милицияси низомини, намунавий тузилмасини ва унинг штат жадвалини ишлаб чиқсин ва тасдиқласин;

Ўзбекистон Республикаси Соғлиқни сақлаш вазирлиги билан биргаликда санитария милицияси бўлинмалари ва санэпидстанцияларнинг ҳудудларни санитария жиҳатидан муҳофаза қилиш ва касалликларнинг олдини олиш бўйича ўзаро ҳамкорлигини таъминласин,

4. Санитария қонунларини бузганлик учун жазо жарималаридан тушадиган маблағлардан фойдаланиш тартиби тўғрисидаги низом иловага мувофиқ тасдиқлансин.

5. Белгилаб қўйилсинки, оммавий касалликлар тўғрисидаги расмий хабарлар фақат Ўзбекистон Республикаси Соғлиқни сақлаш вазирлиги томонидан киритилади.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Азизхўжаев зиммасига юклансин.

Низом Ўзбекистон Республикаси Президентининг «Санитария қонунларини бузганлик учун жавобгарликни кучайтириш тўғрисида» 1998 йил 2 мартдаги Фармонига мувофиқ ишлаб чиқилган.

Барча даражалардаги санитария-эпидемиология хизматлари банкда «Эпидемиология жамғармаси» махсус счётини очадилар, унда санитария қонунлари, санитария меъёрлари, қоидалари ва гигиена нормативларини, шунингдек карантинли ва инсон учун хавфли бошқа инфекцияларнинг пайдо бўлиши ва тарқалишининг олдини олиш мақсадида белгиланган мажбурий қоидаларни бузганлик учун жазо жарималаридан тушадиган барча маблағлар жамланади.

Бош давлат санитария врачлари ва уларнинг ўринбосарлари томонидан солинган жарималардан ҳосил бўлган махсус счёт маблағлари эпидемияга қарши ва санитария-соғломлаштириш тадбирлари комплексини ўтказишга, шунингдек эҳтиёт ва жорий давлат санитария назоратини сифатли амалга ошираётган ходимларни моддий рағбатлантиришга йўналтирилади.

Санитариянинг бузилишига йўл қўйган корхоналар, ташкилотлар, муассасалар ва бошқа юридик ҳамда жисмоний шахслар текшириш ўтказган ва ёзма кўрсатма йўллаган санэпидстанциянинг махсус счётига ўтказилиши керак бўлган маблағларни жарима солинганлиги тўғрисидаги қарор топширилган пайтдан бошлаб 15 кун мобайнида алоҳида тўлов қоғози билан ўтказадилар.

Жарима белгиланган муддатда тўланмаган тақдирда ҳар бир кечиктирилган кун учун жарима суммасининг 0,15 фоизи миқдорида пеня ундирилади.

Икки ёки бир неча даражадаги санэпидстанция ходимлари биргаликда ўтказган текширишлар натижалари бўйича махсус счётга ўтказилиши керак бўлган маблағлар тегишли махсус счётлар ўртасида тенг тақсимланади.

Ундирилган маблағлар умумий суммасининг:

а) 85 фоизи эпидемияга қарши ва санитария-соғломлаштириш тадбирлари комплексларини ўтказишга, яъни:

вақтинчалик инфекция койкаларини кенгайтириш ва таъминлаб туришга;

эпидемияга қарши вақтинчалик отрядларни ташкил этиш ва таъминлаб туришга, шунингдек юқумли касалликлар ўчоқларида вақтинчалик кўчма ҳаммом-изоляция қурилмалари ва изоляция хоналарини ташкил этиш ва таъминлаб туришга;

вабо ва бошқа ўта хавфли инфекциялар ўчоқларини тугатиш билан боғлиқ махсус тадбирлар ўтказилишига;

юқумли касалликлар билан касалланиш ошганида ёки уларнинг тарқалиши хавфи туғилганда ишларнинг зарур ҳажми доимий ишловчи тармоқлар билан таъминланиши мумкин бўлмаган ҳолларда режадан ташқари эпидемияга қарши тадбирларнинг ўтказилишига;

вакцина учун ҳақ тўлашга ва тиббий асбоб-ускуналар ва техника харид қилишга йўналтирилади.

Юқорида кўрсатилган маблағларни тиббиёт муассасаларининг доимий ишловчи тармоқларини таъминлаб туришга ва эпидемияга қарши кураш тадбирлари билан боғлиқ бўлмаган бошқа ҳар қандай мақсадларга сарфлаш тақиқланади;

б) 15 фоизи санэпидстанция ходимларини моддий рағбатлантиришга, яъни:

Ўзбекистон Республикасининг амалдаги қонун ҳужжатлари билан белгиланган байрам кунлари муносабати билан мукофотлашга;

моддий ёрдам кўрсатишга;

кўп йиллик бенуқсон меҳнати учун, пенсияга чиқиш муносабати билан, шунингдек юбилей саналари муносабати билан бир йўла мукофотлар тўлашга йўналтирилади.

Мукофотлар миқдори ходимнинг умумий иш натижасига қўшган шахсий ҳиссасига мувофиқ белгиланади. Мукофотларнинг умумий суммаси бир йилда 3 ойлик лавозим маошидан ошмаслиги керак.

Моддий рағбатлантириш учун назарда тутилган маблағнинг ишлатилмай қолган қисми эпидемияга қарши тадбирларни ўтказишга йўналтирилади.

Мукофотлар ва бир марта бериладиган мукофотлар муассаса раҳбарининг буйруғи асосида берилади.

Барча даражалардаги санэпидстанциялар махсус счётга пул маблағларининг тушиши ва уларнинг амалда сарфланиши тўғрисида белгиланган шаклда (илова қилинади) ҳар чоракда ҳисобот тузадилар ва уларни ҳисобот чорагидан кейинги ойнинг 20-кунидан кечиктирмасдан улар жойлашган жойдаги тегишли тармоқ ва молия органларига тақдим этадилар.

Маблағлар тўғри ва ўз вақтида ундирилиши, «Эпидемиология жамғармаси» махсус счётига ўтказилиши ва фойдаланилиши устидан назорат қилиш санитария-эпидемиология станциялари раҳбарлари ва Ўзбекистон Республикаси Молия вазирлигининг тегишли молия бўлинмалари томонидан амалга оширилади.