Ўзбекистон Республикаси Президентининг «Ўзбекистон Республикасининг БМТ Озиқ-овқат ва қишлоқ хўжалиги ташкилоти, БМТ Қишлоқ хўжалигини ривожлантириш халқаро жамғармаси ҳамда БМТ Бутунжаҳон озиқ-овқат дастури билан ҳамкорлигини кенгайтириш ва чуқурлаштириш чора-тадбирлари тўғрисида» 2020 йил 15 декабрдаги ПҚ-4922-сон ҳамда «Ерлар деградациясига қарши курашишнинг самарали тизимини яратиш чора-тадбирлари тўғрисида» 2022 йил 10 июндаги ПҚ-277-сон қарорлари ижросини таъминлаш мақсадида Вазирлар Маҳкамаси қарор қилади:

1. Қуйидагилар:

Глобал экологик жамғарма (кейинги ўринларда — ГЭЖ) томонидан «Ўзбекистоннинг қурғоқчиликка учраган экотизимларида яйловлар ва ўрмонларни барқарор бошқариш» лойиҳасини (кейинги ўринларда — Лойиҳа) молиялаштириш учун 5 йил муддатга грант ажратилиши белгиланганлиги;

Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Қишлоқ хўжалиги вазирлиги Лойиҳани амалга ошириш учун умумий ижрочи ва техник ёрдам кўрсатувчи этиб белгиланганлиги;

Лойиҳани амалга ошириш даврида БМТнинг Озиқ-овқат ва қишлоқ хўжалиги ташкилотининг (кейинги ўринларда — ФАО) Ўзбекистондаги ваколатхонаси масъул ижро этувчи орган сифатида фаолият кўрсатиши;

Лойиҳа Бухоро ва Навоий вилоятларида амалга оширилиши назарда тутилганлиги маълумот учун қабул қилинсин.

2. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги Қишлоқ хўжалиги вазирлиги билан биргаликда:

икки ҳафта муддатда ФАОнинг Ўзбекистондаги ваколатхонаси билан Лойиҳани амалга ошириш юзасидан келишувни имзоласин;

бир ой муддатда Лойиҳани амалга ошириш учун шартнома асосида жалб қилинадиган маҳаллий маслаҳатчи-экспертларнинг сони ва уларга тўланадиган иш ҳақи миқдорини ФАОнинг Ўзбекистондаги ваколатхонаси билан келишган ҳолда тасдиқласин;

икки ой муддатда манфаатдор вазирлик ва идоралар, Бухоро ва Навоий вилоятлари ҳокимликлари билан биргаликда Лойиҳани амалга ошириш бўйича чора-тадбирлар режасини ишлаб чиқсин ва тасдиқласин;

Лойиҳани амалга ошириш доирасида бажарилган ишлар ҳолати ва ўзлаштирилган маблағлар юзасидан ҳисоботларни ҳар чоракда Ўзбекистон Республикаси Инвестициялар, саноат ва савдо вазирлиги ҳамда Вазирлар Маҳкамасига киритиб борсин.

3. Белгилаб қўйилсинки:

Лойиҳа билан боғлиқ тадбирлар масъул вазирликлар ва ФАОнинг Ўзбекистондаги ваколатхонаси ўртасидаги келишувлар доирасида амалга оширилади;

Лойиҳа билан боғлиқ тадбирларни амалга ошириш учун ГЭЖнинг гранти ФАОнинг Ўзбекистондаги ваколатхонаси орқали Лойиҳанинг йиллик бюджетида тасдиқланган миқдорда ва муддатларда тегишли вазирлик учун Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида очилган ҳисобварақларга ўтказиб борилади;

Лойиҳа доирасида ҳисобот йилида ГЭЖнинг ўзлаштирилмаган гранти ФАОнинг Ўзбекистондаги ваколатхонаси билан келишган ҳолда кейинги йилга тўлиқ ўтказилади;

ГЭЖ гранти ҳисобидан харидлар Ўзбекистон Республикасининг «Давлат харидлари тўғрисида»ги Қонуни талаблари асосида очиқ ва шаффоф усулда амалга оширилади. Бунда республика ҳудудидан ташқаридаги харидлар ФАОнинг Ўзбекистондаги ваколатхонаси билан келишган ҳолда амалга оширилади;

ГЭЖ гранти ҳисобидан харид қилинган асбоб-ускуналар, қурилма ва жиҳозлар Лойиҳани амалга ошириш муддати тугаганидан сўнг маҳаллий ҳамкор ташкилотларга бепул ўтказиб берилади.

4. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Қишлоқ хўжалиги вазирлигига Лойиҳа доирасидаги тадбирларнинг ўз муддатида ва сифатли бажарилишини, харидларнинг очиқ ва шаффофлигини таъминлаш, шунингдек, уларнинг устидан доимий назорат ўрнатиш мақсадида «йўл хариталари»ни тасдиқлаш ҳамда идоралараро мувофиқлаштирувчи кенгаш ва ишчи гуруҳларни тузиш ваколатлари берилсин.

5. Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига ушбу қарорнинг ижроси билан боғлиқ тадбирларни мунтазам ёритиб бориш тавсия этилсин.

6. Мазкур қарорнинг бажарилишини назорат қилиш Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири А.А. Абдухакимов ҳамда Ўзбекистон Республикаси қишлоқ хўжалиги вазири И.Ю. Абдурахмонов зиммасига юклансин.