Мустақил Давлатлар Ҳамдўстлиги Парламентлараро Ассамблеясининг (МДҲ ПА) 2022 йил 27-28 октябрь кунлари Самарқандда ўтказилган кузги сессияси МДҲ ҳудудида парламентлараро ҳамкорликнинг концептуал жиҳатдан янги шарт-шароитларини шакллантириш учун зарур пойдевор яратди.

Озарбайжон, Арманистон, Қозоғистон, Қирғизистон, Беларусь, Россия, Ўзбекистон ва Туркманистон парламентлари делегациялари раҳбарлари, Молдова парламенти аъзолари, МДҲ ПА Кенгаши Котибияти, МДҲ Ижроия қўмитаси ва ТуркПА вакиллари иштирокида бундай кенг кўламли халқаро тадбирнинг ташкил этилиши Ўзбекистоннинг халқаро майдондаги роли ва нуфузи ортиб бораётганини кўрсатди.

МДҲ ПА сессияси минтақа ривожланишида юзага келаётган тенденцияларни тушуниш, парламентлараро ҳамкорликнинг асосий истиқболларини белгилаб олиш, қатор намунавий (модель) қонунларни қабул қилиш, кўплаб икки томонлама учрашувлар ўтказиш имконини берди.

Шу билан бирга, қатор мақсадларга эришиш парламент дипломатиясининг саъй-ҳаракатларини изчил ошириш ва парламентлараро ҳамкорликнинг янги механизмларини жорий этишни тақозо этади.

МДҲ ПА кузги сессияси доирасида илгари сурилган ташаббусларни амалда рўёбга чиқариш ва парламентлараро алоқаларни янада мустаҳкамлаш мақсадида Ўзбекистон Республикаси Олий Мажлисининг Сенати қарор қилади:

1. Оролбўйи минтақасини ривожлантириш масалалари ва экология қўмитаси раиси Б. Алихановнинг Мустақил Давлатлар Ҳамдўстлиги Парламентлараро Ассамблеясининг 2022 йил 27-28 октябрь кунлари Самарқандда ўтказилган кузги сессияси якунлари тўғрисидаги ахбороти маълумот учун қабул қилинсин.

2. Олий Мажлис Сенатининг МДҲ ПА доирасидаги фаолияти устувор йўналишлари этиб қуйидагилар белгилансин:

Ўзбекистон Республикаси Президенти Ш.М. Мирзиёевнинг ташқи сиёсий ташаббусларини парламентлараро ҳамкорлик механизмлари орқали фаол тарғиб қилиш;

«яшил» технологияларни ривожлантириш масалалари бўйича иқтисодиёт, инвестиция, энергетика ва инновациялар соҳасидаги ҳамкорликнинг ҳуқуқий асосларини мустаҳкамлаш;

халқаро мажбуриятларни мониторинг қилиш, шу жумладан МДҲ мамлакатлари ўртасидаги муносабатларни ривожлантириш бўйича миллий ҳаракатлар режаларини («йўл хариталари»ни) ишлаб чиқиш;

МДҲ ПА доирасида парламентлараро гуруҳлар, комиссиялар ва бошқа тузилмалар фаолияти самарадорлигини ошириш;

намунавий (модель) қонунларни ишлаб чиқишда фаол қатнашиш;

савдо-иқтисодий, маданий-гуманитар алоқаларни чуқурлаштиришга қаратилган парламентлараро даражадаги конференциялар, учрашувлар ва форумлар ташкил этиш ҳамда ўтказиш;

парламент дипломатияси бўйича тажриба алмашиш ва «Электрон парламент» тизими ахборот технологияларидан кенг фойдаланиш;

МДҲ шаҳарлари ўртасида минтақалараро, шунингдек, биродарлик муносабатларини ўрнатиш ва ривожлантиришга кўмаклашиш;

Ўзбекистон Республикасининг миллий манфаатларини ифодалаш мақсадида парламент делегацияларининг ташрифларини ташкил этиш, халқаро форумларда иштирок этиш;

туристик маршрутларни ривожлантириш масалалари бўйича ўзаро тажриба алмашишни рағбатлантириш, тарихий, маданий, маънавий ва миллий қадриятларни ўрганиш ҳамда асраб-авайлаш бўйича ҳамкорликни кенгайтириш;

саъй-ҳаракатларни мувофиқлаштириш ва экологик муаммолар ҳамда табиий офатларни бошқариш масалаларини ҳал этиш бўйича аниқ чора-тадбирларни ишлаб чиқишда кўмаклашиш, атроф муҳитни муҳофаза қилиш ташаббусларини қўллаб-қувватлаш.

3. Олий Мажлис Сенатининг қўмиталари:

МДҲ ПА доирасида савдо-иқтисодий, маданий-гуманитар алоқаларни мустаҳкамлашга қаратилган ва бошқа парламентлараро даражадаги тадбирларни ташкил этиш ҳамда ўтказишда фаол иштирок этсин;

МДҲ ПА доирасидаги намунавий (модель) қонунларнинг муҳим жиҳатларини ҳамда мамлакатлар иқтисодиёти интеграция қилинишидаги аҳамияти ва муаммоларини таҳлил қилсин;

намунавий (модель) қонунларнинг миллий манфаатларга мос, ижтимоий-иқтисодий ривожлантиришга хизмат қилувчи меъёрларини қонунчиликка имплементация қилиш бўйича таклифлар ишлаб чиқсин.

4. Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси Ташқи ишлар вазирлиги билан биргаликда:

эришилган келишувларни амалга ошириш бўйича 2023 йилга мўлжалланган «Йўл харитаси»ни ишлаб чиқсин ва МДҲ ПА иштирокчи мамлакатларининг миллий парламентлари билан келишсин;

Олий Мажлис Сенати делегациясининг Ўзбекистон Республикаси Олий Мажлиси Сенати ва Қозоғистон Республикаси Парламенти Сенати ўртасидаги қўшма Парламентлараро комиссиянинг 2023 йилда Костонайдаги навбатдаги мажлисида иштирокини ташкил этишга киришсин;

Ўзбекистон Республикаси ва Қирғизистон Республикаси ўртасидаги ҳамкорлик бўйича қўшма Парламентлараро комиссиянинг Қирғизистонга оид қисми шакллантирилгач, комиссиянинг навбатдаги мажлисини ўтказиш масаласини ишлаб чиқсин;

Ўзбекистон билан МДҲ мамлакатлари ўртасидаги ҳамкорликни ривожлантириш бўйича «йўл хариталари» ижроси устидан парламент назоратини ўрнатсин;

Ўзбекистон Республикасининг МДҲ мамлакатларидаги элчиларининг икки томонлама ҳамкорликни ривожлантириш бўйича амалга оширилаётган ишлар юзасидан ҳисоботларини эшитсин.

Сенатнинг Оролбўйи минтақасини ривожлантириш масалалари ва экология қўмитаси билан ҳамкорликда МДҲ ПА ҳузуридаги экология ва табиатдан фойдаланиш масалалари бўйича эксперт кенгаши ишини ташкил этишда фаол иштирок этсин.

Сенатнинг Хотин-қизлар ва гендер тенглик масалалари қўмитаси ҳамда Савдо-саноат палатасини жалб этган ҳолда ҳамдўстлик мамлакатлари парламентлари билан ҳамкорликда тадбиркор аёллар бизнес форумларини ўтказиш чораларини кўрсин.

Сенатнинг Ешлар, маданият ва спорт масалалари қўмитаси, Халқ таълими вазирлиги ва Ешлар ишлари агентлиги билан биргаликда:

2023 йилда Ўзбекистонда «Ҳамдўстлик болалари» халқаро маданий-маърифий форумига тайёргарлик кўриш ва уни ўтказиш ишларини бошласин;

Олий Мажлис Сенатининг Ёшлар парламенти ва МДҲ мамлакатлари ёшлар парламентлари ўртасидаги узвий ҳамкорлик йўлга қўйилишини таъминласин.

2023 йил 1 июнгача бўлган муддатда мазкур Қарор ижроси юзасидан амалга оширилган ишлар тўғрисидаги ахборотни Сенат Кенгашига тақдим этсин.

5. Мазкур Қарорнинг ижросини назорат қилиш Ўзбекистон Республикаси Олий Мажлиси Сенати Раисининг биринчи ўринбосари С. Сафоев зиммасига юклансин.

6. Ушбу Қарор қабул қилинган кундан эътиборан кучга киради.