«Ўзбекистон Республикасининг халқаро шартномалари тўғрисида»ги Ўзбекистон Республикаси Қонунининг 22-моддасига мувофиқ:

1. Тожикистон Республикасининг Душанбе шаҳрида 2021 йил 10 июнь куни Ўзбекистон Республикаси Ҳукумати билан Тожикистон Республикаси Ҳукумати ўртасида имзоланган Тожикистон-Ўзбекистон инвестиция компаниясини ташкил этиш тўғрисидаги Битим тасдиқлансин.

2. Ўзбекистон Республикаси Тикланиш ва тараққиёт жамғармаси мазкур халқаро шартномани амалга ошириш учун масъул бўлган ваколатли орган этиб белгилансин.

3. Қуйидагилар:

Тожикистон-Ўзбекистон инвестиция компанияси (кейинги ўринларда — Компания) 12 миллион АҚШ доллари миқдоридаги бошланғич устав капитали ҳамда инвестиция портфели шаклланган сари уни 50 миллион АҚШ долларигача босқичма-босқич етказиш шарти билан масъулияти чекланган жамият шаклида ташкил қилиниши;

ўрнатилган тартибда қўшимча иштирокчиларни жалб қилиш имконияти билан Ўзбекистон Республикаси Тикланиш ва тараққиёт жамғармасининг Компания устав капиталини шакллантиришдаги улуши 75 фоизни ҳамда Тожикистон Республикаси Инвестициялар ва давлат мулкини бошқариш давлат қўмитаси ҳузуридаги «Тажинвест» давлат унитар корхонасининг улуши 25 фоизни ташкил этиши маълумот учун қабул қилинсин.

4. Ўзбекистон Республикаси Ташқи ишлар вазирлиги Тожикистон томонига қуйидагилар тўғрисида тегишли билдиришномани йўлласин:

мазкур халқаро шартноманинг кучга кириши учун Ўзбекистон Республикаси томонидан зарур бўлган давлат ички тартиб-таомиллари бажарилганлиги ҳамда уни амалга ошириш учун масъул бўлган ваколатли орган белгиланганлиги;

Компания Кузатув кенгаши аъзолигига Ўзбекистон Республикаси томонидан Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков, Ўзбекистон Республикаси инвестициялар ва ташқи савдо вазирининг биринчи ўринбосари Л.Ш. Қудратов ҳамда Ўзбекистон Республикаси инвестициялар ва ташқи савдо вазирининг ўринбосари — Ўзбекистон Республикаси Тикланиш ва тараққиёт жамғармаси ижрочи директори Ш.А. Вафаевнинг номзодлари тақдим этилиши;

Ўзбекистон Республикаси инвестициялар ва ташқи савдо вазирининг ўринбосари — Ўзбекистон Республикаси Тикланиш ва тараққиёт жамғармаси ижрочи директори Ш.А. Вафаевга Компаниянинг уставини имзолаш ваколати берилганлиги.

5. Ўзбекистон Республикаси Вазирлар Маҳкамаси ҳамда тегишли вазирлик ва идораларнинг раҳбарлари ушбу халқаро шартнома кучга киргандан кейин унинг қоидалари амалга оширилиши устидан ўрнатилган тартибда назоратни таъминласин.

6. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов зиммасига юклансин.