Ўзбекистон Республикаси Вазирлар Маҳкамасининг 13 август 2003 йил 350-сонли қарорини бажариш мақсадида қарор қиламиз:

1. Балиқ овлаш корхоналарида табиий сув ҳавзаларидан фойдаланганлик учун ижара ҳақини ҳисоблаш ва уни ундириш тартиби тўғрисидаги Низом тасдиқлансин,

2. Ушбу қарор Адлия вазирлигидан рўйхатдан ўтказилган кундан бошлаб, ўн кундан сўнг кучга киради.

Ушбу Низом Ўзбекистон Республикаси Вазирлар Маҳкамасининг 2003 йил 13 августдаги «Балиқчилик тармоғида монополиядан чиқариш ва хусусийлаштиришни чуқурлаштириш чора-тадбирлари тўғрисида»ги 350-сонли қарорига асосан ишлаб чиқилган бўлиб, балиқ ва бошқа сув жониворларини овлаш ёки уларни кўпайтириш учун фойдаланилаётган ёки фойдаланиш мумкин бўлган барча табиий сув ҳавзаларидан (денгиз, дарёлар, сув омборлари, кўллар ва уларга ёндош сув ҳавзалари — кўл хўжаликлари ва балиқ питомникларидан ташқари) олинадиган ижара ҳақларининг миқдори ва уни ундириш тартибини белгилайди.

1. Мазкур Низомга асосан табиий сув ҳавзалари камида 10 йил муддатга ижарага берилиб, ижарага олган балиқ овлаш корхоналари сув ҳавзаларидан фойдаланганлик учун ижара ҳақи тўлайдилар.

2. Ижара ҳақи ижара шартномаси тузилганда жорий йил учун белгиланиб, кейинги ҳар йил учун январь ойида қайтадан белгиланади.

3. Ижарага берилган табиий сув ҳавзаларидан олинадиган ижара ҳақи миқдори қуйидаги тартибда ҳисобланади:

а) ижарага бериладиган сув ҳавзаларининг майдони аниқланади (гектарда);

б) ижарага бериладиган сув ҳавзасининг майдонидан охирги 3 йил давомида овланган балиқ ва бошқа сув жониворларининг миқдори Давлат статистика идоралари маълумотлари асосида аниқланади;

в) 3 йил давомида тутилган балиқ ва сув жониворларининг миқдори қўшилиб, ўртача бир йилга тўғри келадиган миқдор аниқланади;

г) ўртача бир йилда тутилган балиқ ва сув жониворларининг миқдори ижарага бериладиган сув ҳавзасининг майдонига бўлиниб, бир гектарга тўғри келадиган миқдор аниқланади (кг.да);

д) ҳисоб-китоблар натижасида бир гектардан олинган маҳсулотнинг миқдори 4,2 кг.дан кам бўлса ёки олдин ушбу ҳавзадан олинган маҳсулотнинг миқдори аниқ бўлмаса, у ҳолда бир гектардан овланадиган балиқ ва сув жониворларининг миқдори Балиқчиликни ривожлантириш илмий-тадқиқот маркази хулосасига асосан аниқланади;

е) бир гектардан олинадиган маҳсулотнинг ўртача миқдори энг кам иш ҳақи миқдорининг биринчи икки йилида 1.5 фоизига, иккинчи икки йилда 2 фоизига ва кейинги йилларда 3 фоизига тенг бўлган суммага кўпайтирилади. Аниқланган сумма 1 гектар табиий сув ҳавзасига тўғри келадиган ижара ҳақи ҳисобланади.

4. Агар танлов ғолиби берган аризасида мазкур Низомнинг 3-бандига асосан ҳисобланган ижара ҳақи суммасидан кўпроқ суммани таклиф қилган бўлса, шартномада ижара ҳақи мазкур таклиф қилинган сумма миқдорида белгиланади. Бунда кейинги йилларда энг кам ойлик иш ҳақининг белгиланган миқдори ўзгарса, ижара ҳақи миқдори ҳам тегишлича ўзгартирилиши лозим.

5. Энг кам ойлик иш ҳақининг миқдори йил давомида ўзгарса, жорий йил учун ижара ҳақи қайта ҳисобланмайди.

6. Ижара ҳақи балиқ овлаш корхоналари томонидан йил давомида 2 қисмга бўлиб тўланади. Бир қисми (ижара ҳақининг 40 фоизидан кам бўлмаган) йилнинг 1 апрелигача, қолган қисми 1 октябргача тўлаб берилади.

7. Сув ҳавзаси ижарага берилган биринчи йилда жорий йил учун ижара ҳақи ушбу йилда фаолият кўрсатадиган ойлар миқдорига тенг улушларда қуйидаги тартибда белгиланади:

Их — ижара ҳақи;

Йих — йиллик ижара ҳақи;

Тм — жорий йилда фаолият кўрсатадиган ойлар сони.

8. Ижарачи ижара ҳақининг:

а) 60 фоизини тегишли маҳаллий бюджетларга, шу жумладан балиқчилик тармоғини ривожлантириш тадбирларига;

б) 25 фоизини «Балиқчиликни ривожлантириш илмий-тадқиқот маркази ҳузуридаги Балиқчиликни ривожлантириш жамғармаси»га;

в) 15 фоизини Ўзбекистон Республикаси Давлат табиатни муҳофаза қилиш қўмитасига йўналтиради.

9. Ижарачи томонидан ижара ҳақининг ўз вақтида тўлаб борилиши тегишли идоралар томонидан назорат қилинади.

10. Ижарачи ижара ҳақини белгиланган муддатларда тўлаб бермаса, тўлов муддати ўтказиб юборилган ҳар бир кун учун 0,07 фоиз миқдорида, лекин ижара ҳақининг 50 фоизидан кўп бўлмаган миқдорда пеня ундирилади. Пеня ижара ҳақи суммасини тўлашдан озод қилмайди.

11. Мазкур Низом Ўзбекистон Республикаси Давлат статистика қўмитаси билан келишилган.