«Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) тўғрисида»ги Ўзбекистон Республикаси Қонуни 21-моддасининг биринчи қисмига мувофиқ, Ўзбекистон Республикаси Президентининг 2019 йил 22 апрелдаги «Бола ҳуқуқлари кафолатларини янада кучайтиришга оид қўшимча чора-тадбирлар тўғрисида»ги ПҚ-4296-сонли, 2019 йил 27 июндаги «Оммавий ахборот воситалари мустақиллигини таъминлаш ҳамда давлат органлари ва ташкилотлари ахборот хизматлари фаолиятини ривожлантириш бўйича қўшимча чора-тадбирлар тўғрисида»ги ПҚ-4366-сонли қарорларида белгиланган вазифаларни амалга ошириш, шунингдек Олий Мажлиснинг Инсон ҳуқуқлари бўйича вакилининг (омбудсманнинг) инсон ҳуқуқлари ва эркинликлари соҳасидаги қонун ҳужжатлари ижроси устидан парламент назоратини амалга оширишдаги ролини кучайтириш мақсадларида Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши қарор қиладилар:

1. Қуйидагилар:

Ўзбекистон Республикаси Олий Мажлиси Инсон ҳуқуқлари бўйича вакили (омбудсман) Котибиятининг ташкилий тузилмаси 1-иловага* мувофиқ;

Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) ва унинг Котибияти штатлар жадвали 2-иловага* мувофиқ тасдиқлансин.

2. Ўзбекистон Республикаси Олий Мажлиси Қонунчилик палатаси Кенгашининг ва Ўзбекистон Республикаси Олий Мажлиси Сенати Кенгашининг 2018 йил 29 декабрда қабул қилинган «Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) Котибияти фаолиятини янада такомиллаштириш тўғрисида»ги 2282-III/КҚ-484-III-сонли Қўшма қарорнинг 1-банди (Ўзбекистон Республикаси Олий Мажлиси палаталарининг Ахборотномаси, 2018 йил, № 12, 889-модда) ўз кучини йўқотган деб топилсин.

3. Ўзбекистон Республикаси Молия вазирлиги 2019 йил 1 сентябрдан бошлаб Ўзбекистон Республикаси Давлат бюджети параметрларида Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) ва унинг Котибиятининг ходимлари меҳнатига хақ тўлаш фондини молиялаштириш учун тасдиқланган штат жадвалига мувофиқ зарур маблағларни назарда тутсин.

4. Ушбу Қўшма қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикери ўринбосари Н. Умаров ва Ўзбекистон Республикаси Олий Мажлиси Сенати Раисининг ўринбосари С. Артикова зиммасига юклансин.

5. Ушбу Қўшма қарор қабул қилинган кундан эътиборан кучга киради.