Ўзбекистон Республикаси Президентининг «Ўзбекистон Республикаси Президенти ҳузурида Давлат ва жамият қурилиши академиясини ташкил этиш тўғрисида» 1995 йил 19 апрелдаги Фармонига мувофиқ ҳамда Ташқи ишлар вазирлиги раҳбар кадрлари бўғинининг, вазирликлар, идоралар, ҳокимликлар, жамоат ва хўжалик тузилмаларининг ташқи алоқалар соҳасида қатнашувчи мутахассисларининг сиёсий ва касбий тайёрлашни тубдан яхшилаш ва уларни қайта тайёрлаш, шунингдек, Ўзбекистон Республикасининг ташқи сиёсий ва ташқи иқтисодий алоқаларини ривожлантириш истиқболлари бўйича илмий тадқиқотларни мувофиқлаштириш ва чуқурлаштириш мақсадида Вазирлар Маҳкамаси қарор қилади:

1. Ўзбекистон Республикаси Президенти ҳузуридаги Давлат ва жамият қурилиши академиясида «Давлатлараро муносабатлар ва ташқи иқтисодий алоқалар» факультети ташкил этилсин.

Ўзбекистон Республикаси Президенти ҳузуридаги Давлат ва жамият қурилиши академиясининг «Давлатлараро муносабатлар ва ташқи иқтисодий алоқалар» факультети тўғрисидаги низом иловага мувофиқ тасдиқлансин.

2. Қуйидагилар Академиянинг «Давлатлараро муносабатлар ва ташқи иқтисодий алоқалар» факультетининг асосий вазифалар ва фаолият йўналишлари этиб белгилансин:

дипломатик кадрларни, Ташқи ишлар вазирлиги ва иқтисодий алоқалар вазирлиги тизимидаги, давлат ҳокимияти бошқаруви органларидаги, жамоат ва хўжалик тузилмаларидаги халқаро муносабатлар билан шуғулланувчи мутахассисларни тайёрлаш, қайта тайёрлаш ва уларнинг малакасини ошириш;

давлат дастурлари ва буюртмаларига мувофиқ ташқи алоқалар соҳасидаги илмий тадқиқотларни мувофиқлаштириш ва чуқурлаштириш, оператив-таҳлилий материаллар тайёрлаш;

ташқи сиёсат, давлатлараро муносабатлар ва ташқи иқтисодий алоқалар масалалари бўйича дарсликлар, ўқув қўлланмалари ва илмий-методик ишланмалар ва тадқиқотлар тайёрлаш ҳамда нашр этиш;

ташқи сиёсат ва ташқи иқтисодий алоқалар соҳасидаги концепциялар, дастурлар, лойиҳалар, тавсияларни илмий экспертиза қилиш.

3. Белгилаб қўйилсинки, Академиянинг «Давлатлараро муносабатлар ва ташқи иқтисодий алоқалар» факультети тингловчилигига Ташқи ишлар вазирлиги ва Ташқи иқтисодий алоқалар тизимининг, давлат ҳокимияти ва бошқаруви органларини, жамоат ва хўжалик тузилмаларининг олий маълумотли, чет тилларни биладиган, ташқи алоқалар соҳасида иш стажига эга бўлган Ўзбекистон Республикаси фуқароси бўлган юқори ва ўрта бўғин раҳбарлари, халқаро муносабатлар билан шуғулланувчи мутахассислари қабул қилинадилар.

4. Академия ректори:

бир ой муддатда «Давлатлараро муносабатлар ва ташқи иқтисодий алоқалар» факультети ташкил этилишини ҳисобга олиб Академиянинг штат жадвалини, тузилмасини қайта кўриб чиқсин ва тасдиқласин;

Ўзбекистон Республикаси Президентининг Ташкилий-кадрлар сиёсати бўйича ҳамда Давлатлараро муносабатлар ва ташқи иқтисодий алоқалар масалалари бўйича Давлат маслаҳатчилари билан келишган ҳолда бир ой муддатда ташқи сиёсий ва ташқи иқтисодий алоқалар соҳасида тайёрланиши, қайта тайёрланиши ва малакаси оширилиши зарур бўлган мансабдор шахслар рўйхатини қабул қилиш тартибини ва кейинчалик ўқиш тамомлангандан кейин ишга юбориш тартибини ишлаб чиқсин;

Ўзбекистон Республикаси Ташқи ишлар вазирлиги ҳамда Ташқи иқтисодий алоқалар вазирлигининг тавсиялари бўйича 1997-1998 ўқув йилида Академиянинг «Давлатлараро муносабатлар ва ташқи иқтисодий алоқалар» факультетига 40 нафар тингловчи шу жумладан, «Давлатлараро муносабатлар» бўлимига — 20 киши «Ташқи иқтисодий алоқалар» бўлимига — 20 кишини қабул қилсин;

Ташқи ишлар вазирлиги Ташқи иқтисодий алоқалар вазирлиги, Олий ва ўрта махсус таълим вазирлиги, Фанлар академияси билан биргаликда «Давлатлараро муносабатлар ва ташқи иқтисодий алоқалар факультетида ўқитувчиликка Ўзбекистон Республикаси олий ўқув юртлари, илмий-тадқиқот институтлари, вазирликлари ва идораларининг халқаро муносабатлар билан шуғулланувчи етакчи мутахассисларини, шунингдек хорижий мамлакатлардан олимлар ва мутахассисларни жалб этсин.

5. Ўзбекистон Республикаси Молия вазирлиги ҳар йили, 1997 йилдан бошлаб, «Давлатлараро муносабатлар ва ташқи иқтисодий алоқалар факультети ташкил этилиши муносабати билан Ўзбекистон Республикаси Президенти ҳузуридаги Давлат ва жамият қурилиши академиясига қўшимча маблағлар ажратилишини назарда тутсин.

6. Ўзбекистон Республикаси Ташқи ишлар вазирлиги ва Ташқи иқтисодий алоқалар вазирлиги Академиянинг «Давлатлараро муносабатлар ва ташқи иқтисодий алоқалар» факультети моддий-техника базасини мустаҳкамлашда ҳамда ўзларининг таркибий бўлинмаларида, Ўзбекистон Республикасининг хорижий мамлакатлардаги элчихоналари ва ваколатхоналарида факультет тингловчиларининг стажировкасини ўтказишда кўмаклашсинлар.

1. «Давлатлараро муносабатлар ва ташқи иқтисодий алоқалар факультети (кейинги ўринларда — Академия факультети деб аталади) Ўзбекистон Республикаси Президенти ҳузуридаги Давлат ва жамият қурилиши академиясининг олий ўқув юртидан сўнг халқаро муносабатлар ва дипломатия, халқаро иқтисодий муносабатлар, сиёсат, ҳуқуқ ва иқтисодиёт соҳасидаги касбий таълим жараёнини халқаро таълим стандартларига мувофиқ амалга оширувчи ўқув бўлинмаси ҳисобланади.

2. Академия факультети давлатлараро муносабатлар, ташқи иқтисодий алоқалар, дипломатия, халқаро сиёсат ва ҳуқуқ соҳасидаги етакчи ўқув, илмий ва услубий марказ ҳисобланади.

3. Академия факультети ўз фаолиятида Ўзбекистон Республикаси Конституциясига, қонунлар ва Ўзбекистон Республикаси Олий Мажлисининг бошқа қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, Академия Устави ва мазкур Низомга амал қилади.

4. Академия факультети:

а) дипломатик кадрлар, олий маълумотли, чет тилларни биладиган, ташқи алоқалар соҳасида иш стажига эга бўлган Ўзбекистон Республикаси фуқаролари орасидан Ташқи ишлар вазирлиги ва Ташқи иқтисодий алоқалар вазирлиги тизими, давлат ҳокимияти бошқаруви органлари, жамоат ва хўжалик тузилмалари учун халқаро муносабатлар билан шуғулланувчи мутахассислар тайёрлаш, қайта тайёрлаш ва уларнинг малакасини оширишни;

б) давлат дастурлари ва буюртмаларига мувофиқ ташқи алоқалар соҳасидаги илмий тадқиқотларни мувофиқлаштириш ва чуқурлаштиришни, оператив-таҳлилий материалларни тайёрлашни;

в) ташқи сиёсат, давлатлараро муносабатлар ва ташқи иқтисодий алоқалар масалалари бўйича дарсликлар, ўқув қўлланмалари илмий-услубий ишланмалар ва тадқиқотларни тайёрлаш ва нашр этишни амалга оширади.

5. Академия факультети таълим жараёнининг мақсади тингловчилар томонидан ташқи сиёсат ва ташқи иқтисодий алоқалар соҳасидаги зарур назарий ва амалий билимларнинг, ташқи алоқалар ташкилотчилик ва бошқарувчилик ишлари кўникмалари соҳасидаги ватанимиз ва чет эл фанининг энг янги ютуқларини ўзлаштириш, шу жумладан, янги ахборот тизимларидан фойдаланиш, илмий-тадқиқот ишлари кўникмаларини мустаҳкамлаш ва ривожлантириш, мутахассисликка оид ишлар учун зарур бўлган ҳажмдаги хорижий тилларни эгаллаш ҳисобланади.

6. Академия факультети қуйидаги йўналишлар бўйича касбий тайёргарликни амалга оширади:

халқаро муносабатлар тарихи, ташқи сиёсат ва дипломатия;

халқаро иқтисодий муносабатлар;

халқаро молия;

жаҳон ва минтақавий иқтисодиёт;

халқаро ҳуқуқ

дипломатия ва консуллик хизмати;

политология.

7. Факультетдаги таълим мазмуни давлат таълими стандартлари асосида ишлаб чиқиладиган ва қабул қилинадиган «Халқаро муносабатлар» ва «Халқаро иқтисодий муносабатлар» мутахассисликлари бўйича касбий намунавий таълим дастурлари билан белгиланади.

8. Таълим жараёни давлат таълими стандартлари асосида ишлаб чиқилган ўқув режаларига мувофиқ амалга оширилади.

9. Академия факультетида;

ташқи сиёсат ва дипломатия;

жаҳон иқтисодиёти ва замонавий халқаро иқтисодий муносабатлар;

халқаро ҳуқуқ;

халқаро молия институтлари;

Дипломатия ва консуллик хизмати;

хорижий тиллар кафедралари фаолият кўрсатади.

Академия ректори кафедраларни ташкил этиш, қайта ташкил этиш ва тугатиш тўғрисида қарорлар қабул қилиш ҳуқуқига эгадир.

Ўқув жараёни факультет деканати томонидан ташкил этилади.

10. Факультетда машғулотларни ўтказишнинг қуйидаги шакллари белгиланади: лекциялар; семинарлар; видео дарслар; амалий ўйинлар (шу жумладан, ШЭХМдан фойдаланган ҳолда ясама (имитацион) ва таркибий моделлаштириш ўйинлари); рефери бўйича маслаҳатлар; контроль, курс, диплом ишлари; ишлаб чиқариш ва тил амалиёти; якуний тест имтиҳонлари; тингловчиларининг мустақил машғулотлари.

11. Академия факультети тингловчиларини тайёрлаш, қайта тайёрлаш ва уларнинг малакасини ошириш ўқитишнинг юзма-юз сўраш шакли бўйича олиб борилади. Ўқитиш шакли ва муддати мақсадига қараб Академия томонидан белгиланади.

12. Ўқитувчилик ишига ўриндошлик тартибида ва соатбай тўлаш шартларида республика олий ўқув юртларининг етакчи олимлари, илмий-тадқиқот институтларининг, вазирликлар ва идораларнинг мутахассислари, шунингдек чет мамлакатлардан олимлар таклиф этилади. Чет мамлакатлардан олимлар ва мутахассислар контракт асосида ишлашга таклиф этиладилар.

13. Академия факультетининг тингловчилари этиб энг аввал юқори ва ўрта бўғин раҳбарлари, Ташқи ишлар вазирлиги ва Ташқи иқтисодий алоқалар вазирлиги, — вазирликлар, идоралар тизими ва ҳокимликларнинг халқаро муносабатлар билан шуғулланувчи мутахассислари, шунингдек ҳақ тўлаш-контракт асосида чет тилларни биладиган ва ташқи алоқаларни амалга оширадиган жамоат хўжалик тузилмалари ходимлари қабул қилинадилар.

14. Академиянинг мазкур факультетига қабул қилинадиган тингловчилар сони Вазирлар Маҳкамасининг қарори билан белгиланади.

15. Академиянинг мазкур факультетига қабул қилиш тартиби Ўзбекистон Республикаси Президентининг Ташкилий-кадрлар сиёсати бўйича ва Давлатлараро муносабатлар ва ташқи иқтисодий алоқалар масалалари бўйича Давлат маслаҳатчилари билан келишилган ҳолда Академия ректори томонидан тасдиқланган қабул қилиш қоидалари билан белгиланади.