Валюта сиёсатини янада эркинлаштириш, биржадан ташқари валюта бозорини ривожлантириш ва мустаҳкамлаш, унинг фаолият кўрсатиши самарадорлигини ошириш, қатнашчилар сонини кенгайтириш ҳамда банклараро савдо сессияларида чет эл валютасини сотиб олиш ва сотиш ҳажмини кўпайтириш мақсадида, шунингдек валюта операциялари бўйича бухгалтерия ҳисоби ва ҳисоботини юритиш, ташқи савдо операциялари бўйича божхона тўловлари ва ҳисобларини ҳисоблаб чиқариш тартибини мақбуллаштириш учун Вазирлар Маҳкамаси қарор қилади:

1. Ўзбекистон Республикаси Марказий банки ва Молия вазирлигининг чет эл валютасига талаб ва таклифдан келиб чиққан ҳолда вужудга келган биржадан ташқари валюта бозорини 2001 йил 1 ноябрдан бошлаб:

Ўзбекистон Республикаси Ҳукумати томонидан ёки унинг кафолати остида 2001 йил 1 июлгача жалб этилган чет эл валютасидаги кредитларга хизмат кўрсатиш;

корхоналарнинг марказлаштирилган ресурсларни экспорт қилиш ҳисобига тушадиган валюта тушумларини мажбурий сотиш операциялари бўйича валютани сотиш ва сотиб олишни эркин курсга ўтказиш тўғрисидаги таклифи қабул қилинсин.

2. Белгилаб қўйилсинки, 2001 йил 1 ноябрдан бошлаб республика ҳудудида валюта операциялари бўйича бухгалтерия ҳисоби, статистика ҳисоботи ва бошқа ҳисоботлар, шунингдек божхона тўловларини ва бошқа мажбурий тўловларни ҳисоблаб чиқариш Ўзбекистон Республикаси Марказий банкининг биржадан ташқари валюта бозоридаги алмашув курсини, пул массаси ва инфляция даражасини ҳисобга олган ҳолда белгиланадиган курси бўйича амалга оширилади.

3. Ўзбекистон Республикаси Молия вазирлиги, Давлат солиқ қўмитаси Макроиқтисодиёт ва статистика вазирлиги билан биргаликда ўн кун муддатда чет эл валютасидаги операцияларни бухгалтерия ҳисобида, статистика ҳисоботида ва бошқа ҳисоботларда акс эттириш тартибини ишлаб чиқсинлар ва тасдиқласинлар ҳамда хўжалик юритувчи субъектларга етказсинлар.

4. Ўзбекистон Республикаси Ҳукуматининг 1-иловага мувофиқ қарорларига ўзгартириш ва қўшимчалар киритилсин.

5. Ўзбекистон Республикаси Марказий банки, Молия вазирлиги, бошқа манфаатдор вазирликлар ва идоралар Адлия вазирлиги билан биргаликда икки ҳафта муддатда ўз норматив ҳужжатларини мазкур қарорга мувофиқлаштирсинлар.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов ва Ўзбекистон Республикаси Марказий банкининг раиси Ф.М. Муллажонов зиммасига юклансин.

I. Қуйидагилар:

Ўзбекистон Республикаси Вазирлар Маҳкамасининг «Валюта ва экспорт-импорт операциялари бўйича ҳисоб ва ҳисобот тартибини такомиллаштириш тўғрисида» 2000 йил 28 апрелдаги 171-сон қарори (Ўзбекистон Республикаси ҚТ 2000 й., 6-сон, 31-модда);

Ўзбекистон Республикаси Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар ва қўшимчалар киритиш тўғрисида» 2000 йил 24 октябрдаги 412-сон қарорига илованинг 12-банди (Ўзбекистон Республикаси ҚТ 2000 й., 10-сон, 69-модда) ўз кучини йўқотган деб ҳисоблансин.

II. Ўзбекистон Республикаси Ҳукуматининг қуйидаги қарорларига ўзгартириш ва қўшимчалар киритилсин:

1. Ўзбекистон Республикаси Вазирлар Маҳкамасининг «2001-2002 йилларда хорижий инвесторларни жалб этган ҳолда корхоналарни давлат тасарруфидан чиқариш ва хусусийлаштириш бўйича келгусидаги чора-тадбирлар тўғрисида» 2001 йил 9 мартдаги 119-сон қарорига 5-илованинг 49-бандидаги «банклараро валюта бозорида белгиланадиган биржадан ташқари валюта бозори курси бўйича» сўзлари «Марказий банк курси бўйича» сўзлари билан алмаштирилсин.

2. Ўзбекистон Республикаси Вазирлар Маҳкамасининг «Биржадан ташқари валюта бозори фаолиятини ташкил этиш чора-тадбирлари тўғрисида» 2001 йил 10 июлдаги 294-сон қарорига 2-иловада (Ўзбекистон Республикаси ҚТ 2001 й., 7-сон, 38-модда):

2-банднинг «а» кичик банди қуйидаги таҳрирда баён қилинсин:

«а) корхоналар ва ташкилотларнинг марказлаштирилган ва марказлаштирилмаган экспортдан олинган валюта тушумини мажбурий сотиш»;

2-банднинг «г» кичик бандидаги «жалб этиладиган» сўзлари чиқариб ташлансин;

7-банд қуйидаги таҳрирда баён қилинсин:

«7. Биржадан ташқари валюта бозорида хорижий валютани барча мижозлар – савдо-воситачилик фаолияти билан шуғулланувчи субъектлардан ташқари, хўжалик юритувчи субъектлар томонидан хорижий валютани сотиб олиш ва сотиш бўйича операциялар ваколатли банклар орқали амалга оширилади (ижтимоий аҳамиятга эга бўлган халқ истеъмол товарлари ва дори-дармонларни импорт қилувчи корхоналар, шунингдек вазирликлар, муассасалар ва ҳокимликларнинг уларнинг марказлаштирилган моддий-техника таъминоти билан шуғулланувчи идоравий корхоналари бундан мустасно)»;

14-банднинг биринчи хатбоши қуйидаги таҳрирда баён қилинсин:

«14. Олдиндан бериладиган буюртманомаларга биноан хорижий валютани сотиб олиш ёки сотиш учун етарли бўлган сўмдаги ва хорижий валютадаги пул маблағларини Ўзбекистон Республикаси Марказий банкидаги махсус ҳисоб рақамларига депонентга ўтказиш банклараро савдо сессияларини ўтказиш бошланишидан бир соат олдин тугалланади».

2-банднинг «а» кичик банди қуйидаги таҳрирда баён қилинсин:

«Ваколатли банклар ва уларнинг мижозлари ўртасида хорижий валютани сотиб олиш ва сотиш бўйича операцияларни ўтказишда олдинги ҳафта мобайнида ўтказилган банклараро савдо сессияларида қайд қилинган курсларнинг ўртача миқдоридан фойдаланилади».