Доимий ишловчи ярмарка савдоси тизимини ташкил этиш йўли билан бозор инфратузилмасини янада ривожлантириш, мамлакатимиз экспорт имкониятларини янада кенг тарғиб этиш, ватанимиз товар ишлаб чиқарувчилари ва тадбиркорлари томонидан ишлаб чиқарилаётган ишлаб чиқариш-техника ва истеъмол товарларини реклама қилиш мақсадида Вазирлар Маҳкамаси қарор қилади:

1. Вазирлар Маҳкамасининг 1999 йил 4 мартдаги 97-сон қарорига мувофиқ «Алпомиш» мажмуини реконструкция қилиш ишлари тугалланганлиги ва унинг негизида республика ярмарка савдоси маркази фаолиятини ташкил этиш учун шарт-шароитлар яратилганлиги маълумот учун қабул қилинсин.

2. «Ўзсавдомарказ» акциядорлик жамияти муассисларининг «Ўзсавдомарказ» акциядорлик жамиятини «Ўзкўргазмасавдо» республика ярмарка савдоси маркази акциядорлик жамиятига айлантириш тўғрисидаги таклифи қабул қилинсин.

Қуйидагилар «Ўзкўргазмасавдо» акциядорлик жамиятининг асосий вазифалари этиб белгилансин:

— халқаро стандартларга мувофиқ сертификацияланган, мамлакатимизда ишлаб чиқарилган экспортга мўлжалланган товарларнинг доимий ишловчи республика ва минтақавий кўргазма-ярмаркаларини ўтказиш;

— истеъмол товарлари, ишлаб чиқариш-техника мақсадларидаги товарлар ва қишлоқ хўжалиги маҳсулотларининг ички ва ташқи бозорлари конъюнктураси маркетинг тадқиқотларини амалга ошириш, ушбу ахборотни ярмарка савдолари қатнашчиларига бериш;

— Қорақалпоғистон Республикасидан, вилоятлар ва Тошкент шаҳридан экспортга мўлжалланган товарларни танлаб олишга ҳамда республика ва минтақавий ярмарка савдоларига қўйишга кўмаклашиш, кейинчалик ички бозорларда уларнинг маркетингини ташкил этиш;

— қишлоқ хўжалиги маҳсулотларини сотиш бўйича мавсумий савдо ярмаркалари ташкил этиш;

— мамлакатимизда ишлаб чиқарилган товарларни хорижий бозорларга олиб кириш мақсадида реклама-ахборот фаолиятига доир тадбирлар комплексини амалга ошириш:

— халқаро тажрибани ўрганиш асосида, электрон савдолар тизимидан фойдаланган ҳолда ярмарка савдосининг замонавий усулларини, шу жумладан, фьючерс-форвард битишувлари ва опционларни ишлаб чиқиш ва жорий этиш;

— ярмарка контрактларини экспертизадан ўтказиш, уларни тузиш, рўйхатдан ўтказиш, уларга молиявий хизмат кўрсатиш ва уларни бажариш бўйича ярмарка савдолари қатнашчиларига комплекс хизматлар кўрсатиш.

3. Фаолият кўрсатаётган савдо-кўргазма инфратузилмасидан самарали фойдаланиш ҳамда «Ўзкўргазмасавдо» акциядорлик жамияти билан Ўзбекистон Республикаси Ташқи иқтисодий алоқалар вазирлигининг «Ўзэкспомарказ РСКМ ўртасидаги функцияларни фарқлаш учун «Ўзэкспомарказ» РСКМ фаолияти халқаро ва хорижий мавзули кўргазмалар, шунингдек, чет элда республика кўргазмалари ўтказилишига жамланиши белгилансин.

4. «Ўзкўргазмасавдо» акциядорлик жамияти марказий аппаратининг, ходимларининг чекланган сони 47 кишидан (хизмат кўрсатувчи ходимларсиз) иборат бўлган ташкилий тузилмасига 1-иловага мувофиқ розилик берилсин, уларнинг харажатлари Марказнинг даромадлари ҳисобига амалга оширилади.

«Ўзкўргазмасавдо» акциядорлик жамияти кўрсатиладиган сервис хизматларининг юқори даражада бўлишини таъминлаш ва ярмарка фаолиятини ташкил этиш учун Марказ ҳузурида ихтисослаштирилган шуъба корхоналар ташкил этишни назарда тутсин.

5. «Ўзкўргазмасавдо» акциядорлик жамияти томонидан ярмарка савдолари ўтказиш ва контрактлар тузиш тўғрисидаги низом 2-иловага мувофиқ тасдиқлансин.

Белгилансинки, «Ўзулгуржибиржасавдо» уюшмаси «Ўзкўргазмасавдо» акциядорлик жамияти томонидан амалга ошириладиган кўргазма-ярмарка фаолиятининг меъёрий-ҳуқуқий ва методология базаси халқаро стандартлар талабларига мувофиқ доимий равишда қўллаб-қувватланишини таъминлайди.

6. Рақобатни ривожлантириш, республика минтақаларида экспортга мўлжалланган маҳсулотлар ишлаб чиқариш ўсишини рағбатлантириш ва кичик ва ўрта бизнес субъектларининг товар-хом ашё ресурсларидан кенг фойдаланишларини таъминлаш учун «Ўзкўргазмасавдо» акциядорлик жамиятида Қорақалпоғистон Республикаси, вилоятлар ва Тошкент шаҳар ҳокимликларининг экспозициялар мунтазам равишда янгиланиб туриладиган доимий ишловчи павильонларини ташкил этиш мақсадга мувофиқ деб ҳисоблансин.

7. «Ўзкўргазмасавдо» акциядорлик жамияти тузилмасида реклама-ахборот маркази ташкил этилсин, қуйидагилар унинг асосий вазифалари этиб белгилансин:

халқаро савдонинг электрон тизимига уланган ҳолда экспортга мўлжалланган товарларнинг маълумотлар банкини ташкил этиш;

Ўзбекистон товарларининг халқаро бозорларга киритиш мақсадида коммуникацияларнинг замонавий воситалари асосида йирик хорижий биржалар, кўргазмалар ва ярмарка марказлари билан тўғридан-тўғри алоқалар ўрнатиш;

экспортга таклиф қилинаётган товарлар тўғрисида буклетлар, ахборот бюллетенлари ва бошқа реклама маҳсулотлари тайёрлаш ва нашр этиш.

«Ўзкўргазмасавдо» акциядорлик жамияти тушумидан бир йилга рекламага харажатлар нормативи истисно тариқасида 10 фоиз миқдорида белгилансин.

8. «Ўзкўргазмасавдо» акциядорлик жамиятига:

республика минтақаларида маҳсулотлар ва товарларни танлаш бўйича тижорат агентлари тармоғи ташкил этиш, бунда ярмарка савдоларига қўйиш учун кичик ва ўрта бизнес субъектлари томонидан ишлаб чиқариладиган маҳсулотларга асосий эътиборни қаратиш, агентларнинг иш ҳақини шартнома асосида сотиладиган товарлар ҳажмига қараб воситачилик ҳақи ҳисобига шакллантириш;

савдо айланмалари кенгайишига қараб кўрсатилаётган сервис хизматлари инфратузилмасини омборхона терминаллари, сақланадиган жойлар, совуткичлар ташкил этиш йўли билан ярмарка савдолари қатнашчилари учун янада кенгайтириш тавсия этилсин.

10. Ярмарка контрактларини расмийлаштириш, сертификациялаш, рўйхатдан ўтказиш, транспорт экспедицияси бўйича консалтинг хизматлари кўрсатиш, шунингдек, банк хизмати ва суғурта ҳимояси хизмати кўрсатиш мақсадида Ташқи иқтисодий алоқалар вазирлиги, Давлат божхона қўмитаси ва «Ўздавстандарт» маркази бир ой муддатда «Ўзкўргазмасавдо» акциядорлик жамияти ҳудудида маслаҳат шохобчаларини жойлаштирсин, Ўзбекистон Республикаси Ташқи иқтисодий фаолият миллий банки, «Ўзбекинвест» компанияси ва бошқа молиявий муассасалар эса филиаллар ва бўлинмалар очсинлар.

11. Ташқи иқтисодий алоқалар вазирлиги хорижий мамлакатларнинг фирмалари ва компанияларини, савдо-саноат палаталари аъзоларини «Ўзкўргазмасавдо» акциядорлик жамиятининг кўргазма-ярмаркаларига кенг жалб қилиш масалалари бўйича «Ўзкўргазмасавдо» акциядорлик жамиятига ёрдам кўрсатсин.

12. «Ўздавстандарт» маркази Ташқи иқтисодий алоқалар вазирлиги ва Ўзбекистонда аккредитация қилинган сертификациялаш бўйича халқаро инспекция компаниялари билан биргаликда «Ўзкўргазмасавдо» акциядорлик жамияти томонидан ўтказиладиган ярмарка-кўргазмалар орқали сотиладиган товарларни сертификациялашни ташкил этсин.

13. Мазкур қарорнинг бажарилишини назорат қилиш Ўзбекистон Республикаси Бош вазири Ў.Т. Султонов зиммасига юклансин.

1.1. Мазкур Низом «Ўзкўргазмасавдо» республика ярмарка савдоси маркази акциядорлик жамияти ва унинг шуъба тузилмалари (кейинги ўринларда «Ўзкўргазмасавдо» акциядорлик жамияти деб юритилади)да ярмарка савдосини ташкил этиш ва ўтказишни ва ярмарка контрактлари тузиш хусусиятларини тартибга солади.

1.2. «Ўзкўргазмасавдо» акциядорлик жамияти томонидан ярмарка савдоларини ўтказиш ва контрактлар тузиш Ўзбекистон Республикаси қонунларига, Ўзбекистон Республикаси Президенти фармонлари ва фармойишларига, Вазирлар Маҳкамасининг қарорларига, Ўзбекистон Республикасининг бошқа қонун ҳужжатларига ва мазкур Низомга мувофиқ амалга оширилади.

1.3. Товарлар (ишлар ва хизматлар)ни, технология асбоб-ускуналарини, илмий-техник ишланмаларни сотиш бўйича ярмаркалар, кўргазмалар ўтказиш учун «Ўзкўргазмасавдо» акциядорлик жамияти қатнашчиларга махсус жиҳозланган ўринлар тақдим этади.

2.1. Юридик ва жисмоний шахслар, шу жумладан, хорижий юридик ва жисмоний шахслар (норезидентлар) мазкур Низомга мувофиқ «Ўзкўргазмасавдо» акциядорлик жамияти томонидан ўтказилаётган ярмаркаларда товарларни сотиш ва харид қилишлари мумкин, сотиш тақиқланган товарлар бундан мустасно.

2.2. Ярмарка савдолари қатнашчилари (сотувчилар) ўринни олиш тўғрисидаги кафолат хати асосида Ярмарка савдолари қатнашчисининг гувоҳномасини оладилар. Каталоглар, намуналар, моделлар, реклама проспектлари, товар мавжудлиги тўғрисида маълумотнома, сифат сертификати ва бошқа зарур ҳужжатларни тақдим этадилар. Шундан кейин сотувчилар ярмарка савдоларида иштирок этиш ҳамда «Ўзкўргазмасавдо» акциядорлик жамияти томонидан кўрсатиладиган барча хизматлардан фойдаланиш ҳуқуқини оладилар.

Ярмарка савдолари қатнашчилари шартнома асосида «Ўзкўргазмасавдо» акциядорлик жамиятига ўзларининг манфаатларини ифодалаш ҳуқуқини беришлари мумкин.

2.3. Корхоналар (сотувчилар ва харидорлар)нинг вакиллари контрактлар тузиш учун биринчи шахснинг (ёки унинг вазифаларини бажарувчи шахснинг) имзоси қўйилган, корхонанинг муҳри билан тасдиқланган зарур даражада расмийлаштирилган ваколатга эга бўлишлари керак.

3.1. Ярмарка савдоларида нақд (реал) товарлар билан битишувлар, шунингдек, фьючерс-форвард битишувлар — товарларни ҳам ички бозорда миллий валюта — сўмга, ҳам экспортга, шу жумладан, эркин алмаштирадиган валютага битишув тузилган пайтда қайд этилган нарх бўйича ва операцияларни муайян давр оралиғидан кейин бажарган ҳолда товарлар олди-сотдисини ифодаловчи битишувлар амалга оширилиши мумкин.

Юридик ва жисмоний шахслар томонидан товар-хом ашё биржалари орқали қонун ҳужжатларига мувофиқ фақат эркин алмаштириладиган валютага экспортга сотиладиган товарлар рўйхати «Ўзкўргазмасавдо» акциядорлик жамиятининг ярмарка савдоларида содир этиладиган экспорт битишувларига ҳам татбиқ этилади.

3.2. Ярмаркада товар (ишлар, хизматлар)ни сотиш учун контрактлар корхоналар томонидан тақдим этилган намуналар, маҳсулот моделлари, каталоглар, проспектлар, реклама бюллетенлари ва маҳсулотни тавсифловчи бошқа ҳужжатлар бўйича тузилиши мумкин.

3.3. Нақд (реал) товар сотишга тақдим қилинганда сотувчи (ишлаб чиқарувчи ёки хўжалик фаолиятининг бошқа субъекти) ярмаркага:

ушбу товар ҳақиқатдан ҳам сотувчининг мулки (ёки корхона, хўжалик ихтиёрида қоладиган унинг бир қисми) ҳисобланишини тасдиқловчи товар эгасининг ҳужжатини, шунингдек, унинг мавжудлиги тўғрисида биринчи шахс (ёки унинг вазифаларини бажарувчи шахс) томонидан ва бош бухгалтер томонидан имзоланган муҳр билан тасдиқланган ҳужжатни;

сифат сертификатини;

қонун ҳужжатларида назарда тутилган ҳолларда Ўзбекистон Республикаси Фан ва техника давлат қўмитаси, Давлат табиатни муҳофаза қилиш қўмитаси, Соғлиқни сақлаш вазирлиги ва бошқа ваколатли органларнинг хулосасини тақдим этади.

3.4. Фьючерс-форвард битишувлар бўйича сотувчи томонидан кўрсатиб ўтилган товар ишлаб чиқарилишини кафолатловчи ҳужжатлар тақдим этилади, улар белгиланган тартибда раҳбар ва бош бухгалтер томонидан тасдиқланади.

3.5. Ярмаркада контрактлар бўйича сотиб олинган товарлар учун:

республика ичида товарлар етказиб бериш бўйича — Ўзбекистон Республикаси валютаси «сўмлар»да;

экспорт контрактлари бўйича — қоидага кўра эркин алмаштириладиган валютада, қонун ҳужжатларида назарда тутилган ҳолларда эса — миллий валюта «сўмларда» белгиланган тартибда ҳисоб-китоб қилинади.

Контрактлар эркин алмаштириладиган валютада тузилган ҳолларда валюта тушумини мажбурий сотиш республика қонун ҳужжатларига мувофиқ амалга оширилади.

3.6. Ўзбекистон Республикаси норезидентлари ярмарка савдоларида сотиб олинган товар учун:

республика ички валюта бозорида хорижий валютани сотишдан;

Ўзбекистон Республикасида инвестиция фаолияти даромадларидан;

импорт контрактлар бўйича товарларни сотиш, шу жумладан, консигнация шартларида, ишларни бажариш, хизматлар кўрсатиш йўли билан олинган маблағлар ҳисобига ҳам ҳақ тўлашлари мумкин.

3.7. Ярмаркада контрактлар тузишда харидор-норезидент Ўзбекистон Республикаси валютасининг келиб чиқиши қонунийлигини тасдиқловчи қуйидаги ҳужжатларни тақдим этади (маблағлар манбаига боғлиқ равишда):

хорижий валюта конвертация қилинганлиги тўғрисида ваколатли банкнинг маълумотномаси;

ички бозорда сотиш учун товарни олиб кириш учун контракт (шу жумладан, Ўзбекистон Республикасининг товар-хом ашё биржалари биржа савдоларида тузилган контрактлар)ни ва олиб кирилган товарга юк божхона декларациясини;

сўмларнинг келиб чиқиши қонунийлигини тасдиқловчи бажарилган ишлар, кўрсатилган хизматлар тўғрисидаги ҳужжатлар;

олинган дивидендларни тасдиқловчи ҳужжатлар.

3.8. Реал товар билан битишувлар бўйича харидор контрактда келишилган муддатларда товарнинг ҳар бир туркуми учун олдиндан ҳақ тўлайди. Товарни ортиш олдиндан тўланган ҳақ ҳажмига қараб амалга оширилади.

3.9. Фьючерс битишувлари тузишда харидор контракт расмийлаштирилгандан кейин 10 кун ичида сотувчига аванс ўтказади. Битишув бўйича аванс миқдори томонларнинг келишувига кўра белгиланади ва контракт қийматининг камида 15 фоизини ташкил этиши керак.

3.10. Битишув тузилгандан кейин ярмарка контрактларни муҳр билан тасдиқлайди ва уларни ярмарка савдолари қатнашчиларига беради.

3.11. Ярмаркада тузилган барча контрактлар тегишли равишда рўйхатдан ўтказилиши ва ярмаркада ҳисобга олиниши керак. Бунда контракт тузилган кундаги Ўзбекистон Республикаси Марказий банки белгилаган курс бўйича АҚШ долларидаги эквивалент кўрсатиб ўтилади.

3.12. Республика ташқарисига олиб чиқишга мўлжалланаётган маҳсулот ва товарлар бўйича контрактлар муҳр, штамп билан тасдиқланади ва чопар орқали Ўзбекистон Республикаси Давлат божхона қўмитасига ёки унинг ҳудудий божхона хизматларига юборилади, агар контрактлар вилоят бўлинмалари савдоларида тузилган бўлса.

Божхона органлари келишилган жадвал бўйича ярмарка курьеридан тасдиқланган контрактларни реестр бўйича қабул қиладиган, имзолайдиган, уларни муҳр билан тасдиқлайдиган ва курьерга қайтарадиган масъул ходимларни белгилайди.

Бир реестрдаги контрактларни божхона органлари улар тушган пайтдан бошлаб икки кеча-кундуз ичида расмийлаштиришлари шарт.

3.13. Ўзбекистон Республикаси Давлат божхона қўмитаси ёки унинг ҳудудий органи томонидан тасдиқланган контрактга ўзгартиришлар ва қўшимчалар ярмарканинг ёзма ҳолдаги аризасига кўра киритилади, бунда ўзгартиришлар киритиш сабаблари кўрсатиб ўтилади. Ўзгартиришлар ва қўшимчалар киритиш тўғрисидаги масалаларни кўриб чиқиш тартиби контрактларни тасдиқлашдаги тартиб кабидир.

3.14. Ўзбекистон Республикаси Давлат божхона қўмитаси ёки унинг ҳудудий хизматлари томонидан тасдиқланган контрактлар олинган пайтдан бошлаб ярмарка бир иш куни мобайнида уларни ярмарка савдолари қатнашчиларига беради.

Кўрсатиб ўтилган контрактлар юк божхона декларацияларини тўлдириш учун асос бўлиб ҳисобланади.

3.15. Ўзбекистон Республикаси Давлат божхона қўмитаси ёки унинг ҳудудий органи томонидан расмийлаштирилган экспорт контрактлари бўйича товарлар олиб кетилаётганда юк ортилаётган жойдаги божхона бўлинмаларига мазкур Тартибнинг 3.7-бандида кўрсатиб ўтилган ҳужжатларнинг нусхаларидан ташқари қуйидаги ҳужжатлар ҳам тақдим этилади:

товар ҳақи тўланганлигини тасдиқловчи тўлов ҳужжатининг нусхаси;

мувофиқлик сертификати;

товарнинг келиб чиқиш сертификати;

юк божхона декларацияси.

3.16. Божхона органларига тақдим этилган ҳужжатлардаги маълумотларнинг ишончлилиги учун контрактда кўрсатиб ўтилган юк жўнатувчи жавоб беради.

3.17. Товарларни олиб кетиш учун контрактларни расмийлаштирувчи ва рўйхатдан ўтказувчи органлар харидор ва сотувчидан битишувга тегишли бўлмаган бошқа ҳужжатларни талаб қилишга ҳақли эмас.

3.18. Юк жўнатувчи белгиланган тартибда божхона йиғимлари тўлайди.

4.1. Ярмарка савдоларида товарлар (ишлар, хизматлар) ва хомашё харид қилиш бўйича импорт контрактларини тузиш тартиби улар бўйича Ўзбекистон Республикасининг миллий валютаси — сўмда ҳақ тўлаш ва ҳисоб-китоб қилиш назарда тутиладиган контрактларга татбиқ этилади.

4.2. Ярмарка савдоларига сотиш учун импорт товарлар (ишлар, хизматлар)ни қўйишда сотувчи — норезидент ярмаркага қуйидагиларни тақдим этади:

сотиш учун қўйилган товар ҳақиқатдан ҳам сотувчининг мулки эканлигини ҳамда унда нақд мавжудлигини тасдиқловчи, раҳбар ёки мулк эгаси томонидан имзоланган ҳужжат (маълумотнома, кафолат хати);

ишлаб чиқарувчи томонидан имзоланган товар тайёрланиши тўғрисидаги кафолат хати (агар товар мавжуд бўлмаса);

импорт товарни ярмарка савдоси орқали сотишга буюртманома, унда контракт тузиш учун зарур бўлган барча шартлар кўрсатилади (товарнинг тўлиқ номи, ўлчов бирлиги, миқдори, сифат сертификати, бир бирликнинг нархи, келиб чиқиш сертификати ва зарурият бўлса бошқа маълумотлар);

Ўзбекистон Республикаси қонун ҳужжатларида назарда тутилган ҳолларда Ўзбекистон Республикаси Фан ва техника давлат қўмитаси, Давлат табиатни муҳофаза қилиш қўмитаси, Соғлиқни сақлаш вазирлиги ва бошқа ваколатли органларнинг хулосалари.

4.3. Кафиллик шартномалари, банкларнинг, бошқа кредит муассасалари ва суғурта ташкилотларининг белгиланган тартибда берилган кафолатлари ярмарка савдоларида сўмларда ҳақ тўлаш асосида тузилган импорт контрактларини таъминлаш шакллари ҳисобланади.

4.4. Ярмарка савдоларида тузилган импорт контрактлари бўйича нархлар даражаси тўғрисида консалтинг хизматларининг эксперт хулосаси талаб қилинмайди.

4.5. Белгиланган ҳужжатлар тақдим этилгандан кейин «Ўзкўргазмасавдо» акциядорлик жамияти импорт контрактини рўйхатдан ўтказади, ярмарка савдоларида тузиладиган контрактларга идентификация рақамлари беришнинг белгиланган Тартибига мувофиқ уни тасдиқлайди. Ярмарка импорт контракти бўйича маълумотлар ва тақдим этиладиган ҳужжатларнинг ишончлилиги учун ушбу маълумотларни тақдим этган шахс жавоб беради.

4.6. «Ўзкўргазмасавдо» акциядорлик жамиятининг ярмарка савдоларида рўйхатдан ўтказилган импорт контрактлари икки иш куни мобайнида уларни ҳисобга қўйиш учун чопар орқали Ўзбекистон Республикаси Давлат божхона қўмитасига ёки унинг ҳудудий органларига юборилади, агар кўрсатиб ўтилган контрактлар вилоят бўлинмалари савдоларида тузилган бўлса.

4.7. Божхона органлари келишилган жадвал бўйича ярмарка курьеридан тасдиқланган контрактларни реестр бўйича қабул қилиб оладиган, имзолайдиган, муҳр билан тасдиқлайдиган ва курьерга қайтарадиган масъул ходимларни белгилайди. Бир реестрдаги контрактларни божхона органлари улар тушган пайтдан бошлаб икки иш куни мобайнида расмийлаштиришлари шарт.

4.8. Импорт контрактлари божхона органларида рўйхатдан ўтказилгандан кейин ваколатли банклар уларни тегишли хизмат кўрсатишга қабул қилиб олади. Ярмарка савдоларида тузилган импорт контрактларига контракт шартлари ва импорт битишув паспорти асосида ҳақ тўланади. Факсимил алоқа орқали олинган ва «Ўзкўргазмасавдо» акциядорлик жамияти муҳри билан тасдиқланган кафолат хатларидан, кейинчалик навбатдаги ўн календарь кун мобайнида асл нусхани тақдим этиш шарти билан фойдаланишга йўл қўйилади.

4.9. Ярмарка савдоларида тузилган импорт контрактлари бўйича импорт битишув паспорти белгиланган шаклда расмийлаштирилади.

4.10. Тузилган импорт контрактлари бўйича ҳисоб-китоблар «Ўзкўргазмасавдо» акциядорлик жамиятининг ҳисоб-китоб-клиринг палатаси орқали амалга оширилади.

Импорт контракти тузилгандан кейин харидор 3 банк куни ичида контрактда кўрсатилган ҳақ тўлаш шартларига мувофиқ, бироқ битишув суммасининг 15 фоизидан ортиқ бўлмаган пул маблағларини сотувчи-норезидентнинг «Ўзкўргазмасавдо» акциядорлик жамияти ҳисоб-китоб-клиринг палатасида очилган ҳисоб рақамига ўтказади. Ҳақ тўланиши контракт божхона органида рўйхатдан ўтказилиши учун етарлидир.

4.11. Ўзбекистон Республикаси Давлат божхона қўмитаси ва унинг ҳудудий органлари томонидан рўйхатдан ўтказилган ярмарка импорт контрактлари бўйича товарни келтиришда товар тушган жойдаги божхона бўлинмаларига қуйидаги ҳужжатлар ҳам тақдим этилади:

товарнинг келиб чиқиш сертификати;

юк божхона декларацияси.

Ўзбекистон Республикаси божхона органларига тақдим этилган ҳужжатларнинг ишончлилиги учун ушбу ҳужжатларни тақдим этган шахслар жавоб беради.

4.12. Товар ярмарка импорт контрактлари бўйича Ўзбекистон Республикасига келгандан ва у белгиланган тартибда харидор томонидан қабул қилиб олингандан кейин Ўзбекистон Республикасининг миллий валютаси — «сўмлардаги» маблағлар сотувчи — норезидентнинг «Ўзкўргазмасавдо» акциядорлик жамиятининг ҳисоб-китоб-клиринг палатасида очилган ҳисоб рақамига ўтказилади, уларга сотувчи ярмарка ва биржа савдоларида товарлар (ишлар, хизматлар) ва хом ашё харид қилиши мумкин.

5.1. «Ўзкўргазмасавдо» акциядорлик жамияти истеъмолчиларнинг айрим гуруҳлари эҳтиёжларини қондириш ёки бир хил гуруҳдаги товарларни сотиш мақсадида ихтисослаштирилган ярмаркалар ташкил этиши мумкин.

Ихтисослаштирилган ярмарка савдолари ташкил этишдан олдин «Ўзкўргазмасавдо» акциядорлик жамияти корхоналар, ташкилотлар, тадбиркорлар, бошқа бозор тузилмалари, шу жумладан, хорижий бозор тузилмалари билан биргаликда ихтисослаштирилган ярмарка савдоларига қўйиладиган товарга бўлган таклифни ўрганиш, товар ишлаб чиқарувчиларнинг таклифларини аниқлаш бўйича олдиндан иш олиб боради.

5.2. Ихтисослаштирилган ярмарка савдоларига товарлар (ишлар, хизматлар)нинг ҳар қандай турлари қўйилиши мумкин, сотиш тақиқланган товарлар (ишлар, хизматлар) бундан мустасно.

5.3. Ихтисослаштирилган ярмаркаларни ташкил этиш ва уларга тезкор раҳбарлик қилиш учун ярмарка қўмиталари (ярмаркақўм) ташкил этилади. Ярмаркақўм таркибига «Ўзкўргазмасавдо» акциядорлик жамияти вакилларидан ташқари давлат ва тижорат тузилмалари вакиллари киритилиши мумкин. Ярмаркақўм таркиби манфаатдор томонларнинг вакиллари иштирокида «Ўзкўргазмасавдо» акциядорлик жамияти томонидан белгиланади ва тасдиқланади.

5.4. Ярмаркақўм:

ихтисослаштирилган ярмарка савдолари муддатлари ва уларни ўтказиш жойларини белгилайди ҳамда савдони ўтказишнинг барча масалаларини ҳал этади, пайдо бўлувчи низоли масалаларни кўриб чиқади;

ихтисослаштирилган ярмарка савдоларининг ишчи органларини (ҳисобга олиш, рўйхатдан ўтказиш гуруҳлари ва ҳоказоларни) ташкил этади.

5.5. Ихтисослаштирилган ярмарка савдоларини ташкил этиш ва ўтказиш харажатлари Ярмаркақўм томонидан тасдиқланадиган тартибда ва миқдорларда қатнашчилар ҳисобига амалга оширилади.