Ўзбекистон Республикаси Олий Мажлиси Сенати Кенгашининг 2005 йил 21 июлдаги 10-сонли Қарори билан тасдиқланган Ўзбекистон Республикаси Олий Мажлиси Сенатининг фаолиятида умумдавлат манфаатлари билан минтақавий манфаатлар мутаносиблигини таъминлашга қаратилган чора-тадбирларни амалга ошириш Дастурининг 6-бандини бажариш мақсадида Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Олий Мажлиси Сенати қўмиталарининг халқ депутатлари маҳаллий Кенгашлари доимий комиссиялари ва ижро этувчи ҳокимият органлари билан ҳамкорлиги қуйидаги йўллар билан амалга оширилади:

халқ депутатлари маҳаллий Кенгашлари доимий комиссиялари ва ижро этувчи ҳокимият органлари вакилларини Ўзбекистон Республикаси Олий Мажлиси Сенати қўмиталарининг назорат ваколатларини амалга ошириш учун шакллантирилган ишчи гуруҳлар таркибига киритиш;

Ўзбекистон Республикаси қонунлари, Ўзбекистон Республикаси Олий Мажлиси Сенатининг қарорлари ва Сенат қўмиталарининг қарорлари ижро этилишини ўрганиш натижаларини халқ депутатлари маҳаллий Кенгашларининг қўшма мажлислари – «Бирлашган сессия»ларда кўриб чиқиш;

халқ депутатлари маҳаллий Кенгашлари фаолиятини такомиллаштиришга қаратилган тавсияларни тайёрлаш ва минтақалар билан функционал алоқаларни ривожлантириш бўйича таклифлар ишлаб чиқиш;

Ўзбекистон Республикаси Олий Мажлиси Сенати қўмиталарининг мажлисларида минтақаларни ривожлантириш масалаларини муҳокама қилиш, зарур ҳолларда эса бу масалаларни Ўзбекистон Республикаси Олий Мажлиси Сенатининг ялпи мажлислари муҳокамасига киритиш;

халқ депутатлари маҳаллий Кенгашларини Ўзбекистон Республикаси Олий Мажлиси Сенатининг ялпи мажлисларида кўриладиган масалалар ҳақида мунтазам хабардор этиб туриш.

2. Қорақалпоғистон Республикаси Жўқорғи Кенгесига, халқ депутатлари вилоят ва Тошкент шаҳар Кенгашларига минтақалардаги мавжуд долзарб муаммоларни аниқлаш ва муҳокама қилиш соҳасидаги ишларни кучайтириб, бу муаммоларни Ўзбекистон Республикаси Олий Мажлиси Сенати тегишли қўмиталари мажлисларида кўриб чиқиш ҳақида таклифлар киритиш тавсия этилсин.

3. Ўзбекистон Республикаси Олий Мажлиси Сенатининг халқ депутатлари маҳаллий Кенгашлари ва ижро этувчи ҳокимият органлари билан ҳамкорлигини таъминлаш мақсадида Сенат қўмиталари томонидан халқ депутатлари маҳаллий Кенгашларининг намунавий регламенти, халқ депутатлари маҳаллий Кенгашларининг доимий комиссиялари тўғрисидаги намунавий низом, Ўзбекистон Республикаси қонунлари, Сенат (Сенат Кенгаши) ва Сенат қўмиталари қарорларининг давлат ҳокимияти ва бошқарув органлари томонидан ижро этилишини назорат қилиш тартиби тўғрисидаги низом, Ўзбекистон Республикаси Олий Мажлиси Сенатининг қўмиталари томонидан конференциялар, давра суҳбатлари ва семинарларни ташкил этиш ва ўтказиш тартиби тўғрисидаги низом, Ўзбекистон Республикаси Олий Мажлиси Сенати, Сенат аъзоси томонидан парламент сўровини юбориш Тартиби ишлаб чиқилганлиги маълумот учун қабул қилинсин.