Трансафғон темир йўл коридорини янада ривожлантириш, «Тошгузар — Бойсун — Қумқўрғон» темир йўл линияси бўйича транзит ташишлар ҳажмини ошириш, республика корхоналарининг экспорт салоҳиятини кенгайтириш мақсадида Вазирлар Маҳкамаси қарор қилади:

1. Қуйидагилар:

«Ўзбекистон темир йўллари» ДАЖКнинг «Ўзбектемирйўлекспедициа» унитар корхонасига қарашли «Соғдиана Транс» шўба корхонаси (бундан кейин — Оператор) ва Афғонистон Ислом Республикаси Жамоат ишлари вазирлиги ўртасида 2011 йил 27 июлда тузилган шартномага мувофиқ 3 йил давомида «Ҳайратон — Мозори-Шариф» темир йўл линиясини эксплуатация қилиш ва техник хизмат кўрсатиш амалга оширилган, Оператор томонидан 7,8 миллион тонна юк ташилгани;

Оператор ва Афғонистон Ислом Республикаси Жамоат ишлари вазирлиги ўртасида «Ҳайратон — Мозори-Шариф» темир йўл линиясини кейинги 3 йил давомида эксплуатация қилиш ва техник хизмат кўрсатишни давом эттириш тўғрисида янги шартнома тасдиқлангани маълумот учун қабул қилинсин.

Тасдиқланган янги шартномага кўра:

Операторга, ташиш ҳажмидан қатъи назар, шартнома амал қиладиган бутун давр мобайнида, Оператор томонидан Афғонистон Ислом Республикасида тўланадиган солиқлар, тўловлар ва божлар суммасини ҳисобга олган ҳолда, ҳар йили 19 миллион АҚШ доллари миқдорида тўлов амалга оширилади;

Афғонистон Ислом Республикаси ҳудудидаги темир йўл ташувлари учун ташиш ҳақи Оператор томонидан 100 фоизлик олдиндан тўлов асосида ундирилади ва Ўзбекистон Республикасининг ваколатли банкида очилган Операторнинг алоҳида даромад ҳисоб рақамида тўпланади ҳамда шартнома шартларига мувофиқ ҳар ойда Афғонистон Ислом Республикаси Жамоат ишлари вазирлигининг Афғонистон Ислом Республикаси ваколатли банкида очилган ҳисоб рақамига ўтказиб борилади.

2. «Ўзбекистон темир йўллари» акциядорлик жамияти қуйидагиларни таъминласин:

Оператор ва Афғонистон Ислом Республикаси Жамоат ишлари вазирлиги ўртасида «Ҳайратон — Мозори Шариф» темир йўл линиясини эксплуатация қилиш ва техник хизмат кўрсатиш бўйича 3 йил муддатга янги шартнома тузиш;

Оператор ва «Ўзбекинвест» экспорт-импорт миллий суғурта компанияси ўртасида лойиҳада иштирок этаётган Оператор ходимларининг Афғонистон Ислом Республикасида бўлган даврида уларнинг ҳаёти ва соғлиғини суғурталаш бўйича шартномалар тузиш.

3. «Ўзбекистон темир йўллари» АЖ «Ўзбектемирйўлекспедициа» УК « Согдиана Транс» шўба корхонасига қуйидагиларга рухсат берилсин:

Афғонистон Ислом Республикаси ҳудудида «Ҳайратон — Мозори Шариф» темир йўл линиясини эксплуатация қилиш ва техник хизмат кўрсатиш учун зарур бўлган ёнилғи-мойлаш материаллари, электр энергиясини харид қилиш;

«Ҳайратон — Мозори Шариф» темир йўл линиясини эксплуатация қилиш ва техник хизмат кўрсатиш ишларини бажариш учун Афғонистон Ислом Республикаси фуқаролари билан меҳнат шартномалари тузиш;

4. Ўзбекистон Республикаси Марказий банки Операторнинг Мозори-Шариф шаҳридаги «Афгҳанистан Интернатионал банк»да очилган жорий ҳисобварағи амал қилиш муддатини 3 йилга узайтирсин. Бу ҳисоб солиқлар, тўловлар ва божларни тўлаш, шунингдек, Афғонистон Ислом Республикаси фуқаролари билан тузилган меҳнат шартномалари ҳамда Афғонистон Ислом Республикаси ҳудудида Операторга товарлар, ишлар ва хизматларни етказиб берувчилар билан тузилган шартномалар бўйича ҳисоб-китоблар учун ишлатилади.

5. Ўзбекистон Республикаси Ички ишлар вазирлиги ва Ташқи ишлар вазирлиги Оператор талабномалари асосида «Ҳайратон — Мозори-Шариф» темир йўл линиясини эксплуатация қилиш ва унга хизмат кўрсатишда қатнашувчи мутахассисларга чиқиш ҳужжатларини расмийлаштириш ишларини таъминласин.

6. Қуйидагилар белгилаб қўйилсин:

«Ҳайратон — Мозори-Шариф» темир йўл линиясини эксплуатация қилиш, унга хизмат кўрсатиш ва таъмирлаш билан боғлиқ таъмирлаш-тиклаш, режали ва бошқа ишларни бажариш мақсадида Афғонистон Ислом Республикаси ҳудудига жўнатилаётган Операторнинг махсус техникаси, механизмлари, ускуналари, товарлари, материаллари ва хизмат кўрсатувчи ходимларини фавқулодда вазиятлар юз берганда «Ғалаба» чегара пунктидан ўтказиш «Ўзбекистон темир йўллари» АЖнинг Ўзбекистон Республикаси Миллий хавфсизлик хизмати ва Давлат божхона қўмитаси билан ҳамкорликда илгари ишлаб чиққан соддалаштирилган тартиб асосида амалга оширилади;

Янги шартноманинг амал қилиш муддати давомида лойиҳани амалга ошириш доирасида Операторнинг Афғонистон Ислом Республикасига юборилаётган ходимларига белгиланган меъёрлардан ортиқ тўланадиган хизмат сафари харажатларига қўшимча тўловлар суммалари, шунингдек хизмат сафари даврида уч маҳал овқатланиш харажатлари суммалари юридик шахслардан олинадиган фойда солиғи, ягона ижтимоий тўлов ва жисмоний шахслардан олинадиган даромад солиғи ҳамда фуқароларнинг бюджетдан ташқари Пенсия жамғармасига суғурта бадалларини ҳисоблашда солиқ солинадиган базага киритилмайди.

7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклатилсин.