LexUZ шарҳи
Мазкур Фармон Ўзбекистон Республикаси Президентининг 2020 йил 27 сентябрдаги ПФ-6075-сонли «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида»ги Фармонига асосан ўз кучини йўқотган.
Республикада тери хом ашёсидан самарали фойдаланиш, терипойабзал саноати корхоналарининг халқ истеъмоли моллари ишлаб чиқаришини кўпайтириш, шунингдек бу хом ашёнинг Ўзбекистондан ташқарига назоратсиз ташиб кетилишининг олдини олиш мақсадида:
1. «Ўзбекенгилсаноат» давлат уюшмаси ва «Ўзтайёрловсавдо» уюшмаси бир ой муддат ичида корхоналар ва ташкилотлар, жамоа хўжаликлари, ижарачилар, деҳқон хўжаликлари ва якка тартибда тайёрловчилар билан тери хом ашёсини харид қилиш, шунингдек унга бирламчи ишлов бериш ҳамда сақлаш учун омборхоналар ва бошқа бинолардан фойдаланиш тўғрисидаги шартномаларни белгиланган тартибда қайтадан тузишни ташкил қилсинлар.
(1-банднинг биринчи хатбошиси Ўзбекистон Республикаси Президентининг 2000 йил 23 февралдаги ПФ-2552-сон Фармони билан ўз кучини йўқотган — Олий Мажлис Ахборотномаси, 2000 й., 2-3-сон, 96-модда)
2. «Ўзбекенгилсаноат» давлат уюшмаси Ўзбекистон Республикасининг Марказий банки, Молия вазирлиги, бошқа манфаатдор вазирликлари ва идоралари билан биргаликда тайёрланадиган тери хом ашёси учун ҳисоб-китоб қилиш тартибини ўн кун муддат ичида ишлаб чиқсин, бунда моддий жиҳатдан рағбатлантириш чора-тадбирлари, шу жумладан аҳолига халқ истеъмол молларини топширилган хом ашё ҳажмига қараб сотиш кўзда тутилсин.
3. Ўзбекистон Республикасининг Адлия вазирлиги бир ой муддатда Ўзбекистон Республикасининг қонун ҳужжатларига мазкур Фармондан келиб чиқадиган ўзгартишларни киритиш тўғрисида таклифлар тайёрласин.
4. Ушбу Фармоннинг бажарилишини назорат қилиш Ўзбекистон Республикаси Вазирлар Маҳкамасининг зиммасига юклансин.