Республика иқтисодиётининг чарм-пойабзал тармоғини бошқаришни такомиллаштириш, бозор муносабатларини чуқурлаштириш, рақобатбардош маҳсулот ишлаб чиқаришни кўпайтириш мақсадида:

1. Ўзбекистон Республикаси Давлат мулки қўмитасининг, «Ўзбекенгилсаноат» уюшмасининг, «Ўзбек чарми» акциядорлик компаниясининг, чарм, мўйна (қоракўлдан ташқари) хом ашёсини тайёрлаш, сақлаш, қайта ишлаш, чармдан фойдаланган ҳолда пойабзал, чарм-галантерея ҳамда тикувчилик буюмлари ишлаб чиқариш бўйича хўжалик юритувчи субъектларнинг қуйидаги таклифлари қабул қилинсин:

«Ўзбек чарми» акциядорлик компаниясининг «Ўзбекенгилсаноат» уюшмаси таркибидан чиқиш;

«Ўзбек чарми» акциядорлик компаниясини «Ўзбекчармпойабзали» уюшмаси этиб қайта ташкил қилиш, қайта ташкил этилаётган «Ўзбек чарми» акциядорлик компаниясининг чарм, мўйна (қоракўлдан ташқари) хом ашёсини тайёрлаш, сақлаш, қайта ишлаш бўйича хўжалик юритувчи субъектларни, шунингдек, сунъий чарм, чарм-галантерея буюмлари, пойабзал, чармга ишлов бериш учун ошловчи моддалар ишлаб чиқариш бўйича «Ўзбекенгилсаноат» уюшмаси таркибида бўлган корхоналарни ихтиёрийлик асосида унинг таркибига киритиш.

2. «Ўзбекчармпойабзали» уюшмаси республикада чарм хом ашёсининг бош тайёрловчиси этиб белгилансин ва «Ўзбекенгилсаноат» уюшмаси мана шу ишларни амалга оширишдан озод қилинсин.

3. Қуйидагилар «Ўзбекчармпойабзали» уюшмасининг асосий вазифалари деб ҳисоблансин:

уюшма таркибига кирган тармоқ хўжалик юритувчи субъектларининг чарм, мўйна (қоракўлдан ташқари) хом ашёсини тайёрлаш, сақлаш, қайта ишлаш бўйича фаолиятини мувофиқлаштириш, ана шу хом ашёдан рақобатбардош маҳсулот — пойабзал, тикувчилик ва чарм-галантерея буюмлари ишлаб чиқариш;

ягона техникавий ва инвестиция сиёсатини ўтказиш, хорижий сармояларни кенг жалб этиш, илғор технологияларни жорий қилиш, кооперациянинг янги ташкилий шаклларини ривожлантириш, рақобатбардош чарм-пойабзал, галантерея ва мўйна маҳсулотлари ишлаб чиқариш учун корхоналарни модернизациялаш ҳамда техника билан қайта жиҳозлаш;

ички ва ташқи бозорларнинг маркетинг тадқиқотларини амалга ошириш, экспортга мўлжалланган рақобатбардош маҳсулотлар ишлаб чиқариш ҳажми ва турларини кўпайтириш;

уюшма таркибига, шунингдек Озиқ-овқат саноати корхоналари уюшмаси таркибига кирувчи корхоналар ва ташкилотлар, қишлоқ хўжалик кооперативлари (ширкатлари), фермер ва деҳқон хўжаликлари ўртасидаги хўжалик ҳамда технологик алоқаларни шартномавий муносабатлар тизимини такомиллаштириш йўли билан мустаҳкамлаш;

чарм, мўйна хом ашёсини тайёрлаш, корхоналарни зарур моддий, техникавий ресурслар билан таъминлаш, тайёр маҳсулотни сотиш соҳасида агросаноат интеграцияси ва кооперациялашувнинг янги ташкилий шаклларини ривожлантириш жараёнларини чуқурлаштириш.

4. Ўзбекистон Республикаси Президентининг «Республикада чарм хом ашёси тайёрлаш тизимини такомиллаштириш тўғрисида» 1994 йил 21 декабрдаги ПФ-1025-сон Фармони 1-бандининг биринчи хатбоши ўз кучини йўқотган деб ҳисоблансин.

5. Ўзбекистон Республикаси Вазирлар Маҳкамаси ўн кунлик муддатда ушбу Фармонни амалга ошириш юзасидан қарор қабул қилсин.