LexUZ шарҳи
Мазкур Фармон Ўзбекистон Республикаси Президентининг 2020 йил 27 сентябрдаги ПФ-6075-сонли «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида»ги Фармонига асосан ўз кучини йўқотган.
Республиканинг иқтисодий манфаатлари ва мулкий ҳуқуқларини ҳимоя қилишга, тадбиркорликни ривожлантиришга, давлатнинг ягона солиқ ва божхона сиёсатини амалга оширишга қаратилган чора-тадбирларни рўёбга чиқариш мақсадида:
Олдинги таҳрирга қаранг.
1. Ўзбекистон Республикасининг Давлат солиқ қўмитаси ҳамда Давлат божхона қўмитаси солиқ ва божхона тўғрисидаги қонунларга риоя этилиши устидан назоратни кучайтириш борасида қўшимча чоралар кўрсин.
(1-банднинг биринчи хатбошиси Ўзбекистон Республикаси Президентининг 1998 йил 16 апрелдаги ПФ-1988-сон Фармони таҳририда)
Шу мақсадда катта ва жуда катта миқдорлардаги солиқларни, божлар ҳамда бошқа мажбурий тўловларни тўлашдан бўйин товлаш, товар-моддий бойликларни республикадан ташқарига ғайриқонуний равишда олиб чиқиб кетиш ва давлатнинг иқтисодий манфаатларига зиён етказадиган бошқача тарздаги қонунбузарлик фактлари бўйича ҳар томонлама текширув ўтказилиб, қонунларга мувофиқ жиноий ишлар қўзғатилсин, терговга кадар текширув ва суриштирув ўтказилсин ҳамда терговга тегишли материаллар ҳуқуқни муҳофаза қилувчи органларга топширилсин.
(1-банднинг иккинчи хатбошиси Ўзбекистон Республикаси Президентининг 2017 йил 30 ноябрдаги ПФ-5269-сонли Фармони таҳририда — Қонун ҳужжатлари маълумотлари миллий базаси, 01.12.2017 й., 06/17/5269/0340-сон)
2. Ўзбекистон Республикасининг Прокуратураси, Давлат хавфсизлик хизмати, Ички ишлар вазирлиги солиқ ва божхона тўғрисида қонунларга қандай риоя этилаётгани борасидаги жиноятлар ҳеч кечиктирилмай ва тезкорлик билан тергов қилинишини ташкил этиб, қилмиш учун жазонинг муқаррарлигини таъминласинлар.
(2-банд Ўзбекистон Республикаси Президентининг 2018 йил 5 июндаги ПФ-5456-сонли Фармони таҳририда — Қонун ҳужжатлари маълумотлари миллий базаси, 07.06.2018 й., 06/18/5456/1316-сон)
3. Республиканинг суд органларига мазкур тоифадаги жиноий ишлар судларда энг муҳим иш сифатида тезкорлик билан кўриб чиқилишини таъминлаш, чиқарилаётган ҳукмлар ва қарорларни оммавий ахборот воситалари орқали кенг ошкор қилиш тавсия этилсин.
4. Ўзбекистон Республикасининг Прокуратурасига солиқ ва божхона органларидан ҳуқуқни муҳофаза қилиш органларига топшириладиган материалларни кўриб чиқиш устидан таъсирчан назоратни таъминлаш, ушбу материаллар бўйича қўзғатиладиган жиноий ишлар терговининг бориши, тўлиқлиги, сифати ва муддатлари устидан қаттиқ назоратни жорий этиш таклиф қилинсин, судлар томонидан шундай ишлар кўриб чиқилиши чоғида прокурорларнинг албатта қатнашишлари таъминлансин.
Олдинги таҳрирга қаранг.
5. Ўзбекистон Республикасининг Бош прокурори, Олий суди раиси, Адлия вазири, Давлат солиқ қўмитасининг раиси ҳамда Давлат божхона қўмитасининг раиси сансалорлик, муросасозлик ва принципсизлик қилганликлари, шунингдек ишларни кўриб чиқишда белгиланган муддатларни бузганликлари учун солиқ ва божхона органларининг раҳбарларини, шунингдек шаҳар, туман прокурорлари ва судьяларини қонунларга мувофиқ қатъий жавобгарликка тортсинлар.
(5-банднинг биринчи хатбошиси Ўзбекистон Республикаси Президентининг 1998 йил 16 апрелдаги ПФ-1988-сон Фармони таҳририда)
Юқорида кўрсатилган органларнинг раҳбарлари мазкур Фармон бажарилишининг аҳволини ҳар кварталда умумлаштириб, Ҳукуматга зарур ахборотни бериб борсинлар.