Ғоят муҳим халқаро туризм йўналиши — Буюк Ипак йўлини қайта тиклаш, хорижий сайёҳларни кенг жалб этиш, шунингдек мамлакатда замонавий туризм саноатини вужудга келтириш мақсадида:
1. Буюк Ипак йўлидаги шаҳарлар — Самарқанд, Бухоро, Хива ва Тошкентда халқаро туризм бўйича махсус очиқ иқтисодий минтақалар ташкил қилинсин.
2. Мазкур шаҳарларнинг аэропортлари ва темир йўл вокзалларида хорижий сайёҳлар учун божхона расм-русумларининг халқаро меъёрларга мос соддалаштирилган тартиби, шунингдек транзит сайёҳлар учун махсус божхона зоналари жорий қилинсин.
Олдинги таҳрирга қаранг.
(3 ва 4-бандлар Ўзбекистон Республикаси Президентининг 2009 йил 17 июндаги ПФ-4116-сонли Фармонига асосан ўз кучини йўқотган — ЎР ҚҲТ, 2009 й., 25-сон, 282-модда)
5. Ташқи ишлар вазирлиги, Ички ишлар вазирлиги икки ой муддат ичида хорижий сайёҳлар учун Ўзбекистон Республикаси қонунларида белгиланган объектлардан ташқари республиканинг бутун ҳудудида амал қилувчи ягона визани ўрнатсин.
LexUZ шарҳи
Батафсил маълумот учун Ўзбекистон Республикасининг «Давлат сирларини сақлаш тўғрисида»ги Қонунининг 4-моддасига қаранг.
6. Тижорат банкларига тадбиркорлар хусусий меҳмонхоналарни ва меҳмонхона инфраструктураси иншоотларини барпо этишлари чоғида уларга камида беш йил муддат ичида тўлаш шарти билан кредитлар бериш тавсия қилинсин.
7. «Ўзбектуризм» Миллий компанияси Ташқи иқтисодий фаолият миллий банки билан биргаликда инвестиция банки — «Ўзсаёҳатинвестбанк»ни ташкил қилсин ва жамланаётган маблағлар қатъиян аниқ мақсад йўлида фойдаланилиши устидан назоратни таъминласин.
Ўзбекистон Республикасининг Марказий банки ва Молия вазирлиги 15 кун муддат ичида «Ўзсаёҳатинвестбанк»нинг устав жамғармасини шакллантириш манбалари ва уни қўллаб-қувватлаш чора-тадбирлари тўғрисидаги таклифларни киритсинлар.
8. Вазирлар Маҳкамаси ҳузурида туризм бўйича Идоралараро кенгаш тузилсин ва қуйидагилар шу кенгаш фаолиятининг асосий вазифалари қилиб белгилансин:
жаҳон андозалари даражасида кичик ва ўрта меҳмонхоналар, мотеллар ва кемпинглар тармоғи шакллантирилишини мувофиқлаштириш;
сайр-томошалар замонавий индустриясини, маданий ва спорт-соғломлаштириш марказларини барпо этишга кўмаклашиш;
ноёб туризм имкониятлари ва тарихий-маданий мерос кенг кўламда тарғиб қилиниши ва сақланишини ташкил этиш;
9. «Ўзбектуризм» Миллий компанияси, Маданият ишлари вазирлиги, Фанлар академияси, ёдгорликларни муҳофаза қилиш Республика жамияти манфаатдор ташкилотлар билан биргаликда Буюк Ипак йўлидаги кўҳна шаҳарларда жойлашган меъморий, археологик, тарихий ва маданий ёдгорликларни қайта тиклаш, ободонлаштириш ҳамда фойдаланиш бўйича миллий «Мерос» дастури лойиҳасини икки ой муддат ичида ишлаб чиқсинлар ва Идоралараро кенгаш муҳокамасига тақдим этсинлар.
10. Халқаро туризмни ривожлантириш билан боғлиқ барча масалаларнинг ўз вақтида ҳал этилиши учун шахсий жавобгарлик «Ўзбектуризм», «Ўзбекистон ҳаво йўллари», «Ўзбекистон темир йўллари» компанияларининг, Ички ишлар вазирлигининг, Ташқи ишлар вазирлигининг, чегара ва божхона хизматларининг раҳбарлари зиммасига юклансин.
11. Адлия вазирлиги қонунларга мазкур Фармондан келиб чиқадиган ўзгартиш ва қўшимчалар киритиш бўйича таклифларни ишлаб чиқиб, тақдим этсин.
12. Вазирлар Маҳкамаси икки ҳафта муддат ичида ушбу Фармонни ижро этиш юзасидан тегишли қарорлар қабул қилсин.
LexUZ шарҳи
Қаранг: Ўзбекистон Республикаси Вазирлар Маҳкамасининг 1995 йил 3 июндаги 210-сонли «Ўзбекистон Республикасида халқаро туризмнинг замонавий инфраструктурасини барпо этиш чора-тадбирлари тўғрисида»ги қарори.