LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ўзбекистон Республикаси Президентининг «Сингапур Республикаси билан ҳамкорликни янада кенгайтириш чора-тадбирлари тўғрисида» 2007 йил 13 февралдаги ПҚ-581-сон қарорини бажариш юзасидан, шунингдек экспортга сотилаётган табиий газнинг сифатини халқаро талабларгача етказиш мақсадида Вазирлар Маҳкамаси қарор қилади:
Ўзбекистон Республикаси Президентининг Сингапурга 2007 йил январь ойидаги Давлат ташрифи давомида эришилган аҳдлашувлар доирасида «Ўзбекнефтгаз» МХК томонидан Сингапурнинг «CW Singapore» компанияси билан биргаликда йилига 13 млрд. куб метр газни қайта ишлаш қувватига эга бўлган, 2008 йилнинг IV чорагида фойдаланишга топшириладиган «Қўнғирот компрессор станциясида газни қуритиш қурилмасини қуриш» инвестиция лойиҳасини (кейинги ўринларда объект деб аталади) амалга ошириш бошланганлиги;
Ўзбекистон Республикаси Тикланиш ва тараққиёт жамғармасининг 25 млн. АҚШ доллари миқдоридаги маблағлари, шунингдек «Ўзбекнефтгаз» МХКнинг ўз маблағлари кўрсатиб ўтилган инвестиция лойиҳасини молиялаштириш манбалари этиб белгиланганлиги маълумот учун қабул қилинсин.
«ЎзЛИТИнефтгаз» институти ОАЖ — технология асбоб-ускуналари етказиб бериш бўйича пудратчи сифатида «CW Singapore» компаниясини жалб қилган ҳамда лойиҳанинг ТИАни «Ўзоғирнефтгазкимёлойиҳа» институти билан белгиланган тартибда келишган ҳолда — лойиҳа-смета ҳужжатларини ишлаб чиқиш бўйича бош лойиҳалаштирувчи этиб белгилансин.
3. Объектнинг стратегик аҳамиятини, молиялаштириш манбалари ва ишларни бажарувчилар мавжудлигини ҳисобга олган ҳолда «Ўзбекнефтгаз» МХКнинг ДТИА ишлаб чиқмасдан лойиҳанинг ТИАни ишлаб чиқиш ва тасдиқлаш учун киритиш ҳақидаги таклифига истисно тариқасида розилик берилсин.
4. Ўзбекистон Республикаси Иқтисодиёт вазирлиги, Молия вазирлиги, Ташқи иқтисодий алоқалар, инвестициялар ва савдо вазирлиги, Ўзбекистон Республикаси Тикланиш ва тараққиёт жамғармаси, Ўзбекистон Республикаси «Давархитектқурилиш» қўмитаси, Ташқи иқтисодий фаолият миллий банки «Қўнғирот компрессор станциясида газни қуритиш қурилмасини қуриш» инвестиция лойиҳасининг ТИАни бир ҳафта муддатда кўриб чиқсинлар ва белгиланган тартибда эксперт хулосаси берсинлар.