Ўзбекистон Республикаси Президентининг «Ер қаъри участкаларидан фойдаланиш ҳуқуқи учун лицензиялар бериш тартибини такомиллаштириш чора-тадбирлари тўғрисида» 2007 йил 7 июндаги ПҚ-649-сон қарорига мувофиқ Вазирлар Маҳкамаси қарор қилади:

1. Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин.

2. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Қ.С. Санақулов зиммасига юклансин.

1. Вазирлар Маҳкамасининг 1997 йил 13 январдаги 19-сон қарори (Ўзбекистон Республикаси ҚТ, 1997 й., 1-сон, 1-модда) билан тасдиқланган Ер қаъридан фойдаланиш ва уни муҳофаза қилиш, ер қаърини геологик жиҳатдан ўрганиш ва минерал ресурслардан оқилона фойдаланиш устидан давлат назорати тўғрисидаги Низомнинг 8-бандида:

иккинчи хатбоши чиқариб ташлансин;

учинчи хатбоши қуйидаги таҳрирда баён қилинсин:

«ер қаъри участкаларидан фойдаланишнинг лицензияларда, ер қаъри участкалари маҳсулот тақсимотига оид битим шартларида берилганда эса — маҳсулот тақсимотига оид битимларда белгиланган шартларига риоя қилган ҳолда».

2. Вазирлар Маҳкамасининг «Ер ости бойликлари тўғрисида»ги Ўзбекистон Республикаси Қонунига мувофиқ норматив ҳужжатларни тасдиқлаш ҳақида» 1997 йил 13 январдаги 20-сон қарорида:

а) Фойдали қазилмаларни кавлаб олиш учун кон ажратмалари бериш тартиби тўғрисидаги Низомда:

I бўлимнинг 6-бандида:

биринчи хатбошидаги биринчи жумла қуйидаги таҳрирда баён қилинсин:

«Фойдали қазилмаларни тажриба-саноат кўламида кавлаб олиш кон ажратмаси бермасдан (нефть ва газ конларидан ташқари) геологик жиҳатдан ўрганишни ўтказиш муддатига, бироқ 5 йилдан кўп бўлмаган муддатга бериладиган лицензия ҳамда белгиланган тартибда тасдиқланган ва кон муносабатларини тартибга солиш соҳасидаги махсус ваколатли органлар билан келишилган лойиҳа асосида амалга оширилади»;

иккинчи хатбошидаги биринчи жумла қуйидаги таҳрирда баён қилинсин:

«Нефть ва газни тажриба-саноат кўламида кавлаб олиш Ўзбекистон Республикаси Давлат геология ва минерал ресурслар қўмитаси томонидан уч йилдан кўп бўлмаган муддатга бериладиган лицензия ҳамда «Саноатконтехназорат» давлат инспекцияси томонидан бериладиган кон ажратмаси асосида амалга оширилади»;

б) Фойдали қазилмаларни кавлаб олишда ер қаърини муҳофаза қилишнинг ягона қоидалари I бўлимида:

7-банд қуйидаги таҳрирда баён қилинсин:

«7. Фойдали қазилмаларни тажриба-саноат кўламида кавлаб олиш лицензия асосида, кон ажратмаси бермасдан (нефть ва газ конларидан ташқари), фойдали қазилмаларни бойитиш ва қайта ишлаш технологиясини ишлаб чиқиш ёки такомиллаштириш, фойдали қазилмалар конларини саноат йўли билан ишга туширишнинг оқилона усуллари ва методларини танлаш, шунингдек техноген минерал ҳосилалардан фойдаланиш мақсадида ер қаърини геологик жиҳатдан ўрганиш жараёнида амалга оширилади.

Тажриба-саноат кўламида кавлаб олиш Ўзбекистон Республикаси Давлат табиатни муҳофаза қилиш қўмитаси ва «Саноатконтехназорат» давлат инспекцияси билан келишилган мустақил лойиҳа бўйича амалга оширилади».

3. Вазирлар Маҳкамасининг 2007 йил 5 февралдаги 26-сон қарори (Ўзбекистон Республикаси ҚТ, 2007 й., 2-3-сон, 8-модда) билан тасдиқланган Ўзбекистон Республикаси Давлат геология ва минерал ресурслар қўмитаси тўғрисидаги Низомнинг 6-банди ўн тўққизинчи хатбоши қуйидаги таҳрирда баён қилинсин:

«тадбиркорлик таваккалчилиги шароитларида геологик ўрганиш, фойдали қазилмаларни кавлаб олиш, техноген минерал ҳосилалардан фойдаланиш, фойдали қазилмаларни кавлаб олиш билан боғлиқ бўлмаган ер ости иншоатлари қуриш ва улардан фойдаланиш учун ер қаъри участкаларидан фойдаланиш (чиқиндиларни сақлаш ва кўмиш мақсадида ер ости иншоатлари қуриш ва улардан фойдаланиш учун лицензиялардан ташқари), алоҳида қўриқланадиган геологик объектлар ҳосилаларидан фойдаланиш ҳамда товланадиган тош хом ашё, палеонтологик қолдиқлар намуналарини тўплаш ҳуқуқини берувчи лицензияларни қонун ҳужжатларида белгиланган тартибда беради».