Ички истеъмол бозорини ҳимоя қилиш, жумҳурият ташқарисига товар-моддий бойликларни ғайриқонуний ва асоссиз равишда олиб кетишга йўл қўймаслик мақсадида Вазирлар Маҳкамаси қарор қилади:

1. Ўзбекистон Республикаси Ички ишлар вазирлиги ҳузурида товар-моддий бойликларни олиб кетишни назорат қилувчи Давлат инспекцияси (бундан кейин — олиб кетишни назорат қилувчи Давлат инспекцияси) тузилсин.

2. Олиб кетишни назорат қилувчи Давлат инспекциясининг тузилиши ва унинг тўғрисидаги низом 1, 2-иловаларга мувофиқ тасдиқлансин. Давлат инспекцияси ходимларининг сони 1007 кишидан иборат қилиб, шу жумладан, 503 киши Ўзбекистон Республикаси ИИВ органлари бўлинмалари ходимлари сонини қисқартириш ҳисобига белгилансин.

3. Давлат инспекцияси барча хизматларининг ишларини мувофиқлаштиришни таъминлаш мақсадида Ўзбекистон Республикаси Ички ишлар вазирлиги ҳузурида мазкур қарорнинг 2-бандида белгиланган ходимлар сони доирасида 42 ходимдан иборат олиб кетишни назорат қилувчи Давлат инспекциясининг Бош бошқармаси тузилсин.

Олиб кетишни назорат қилувчи Давлат инспекцияси Бош бошқармасининг бошлиғи Ички ишлар вазирининг тақдимномаси бўйича Ўзбекистон Республикаси Президенти ҳузуридаги Вазирлар Маҳкамасининг қарори билан тайинланади ва ҳайъат аъзоси ҳамда Ўзбекистон Республикаси Ички ишлар вазирининг ўринбосари ҳисобланади.

Белгилансинки, олиб кетишни назорат қилувчи Давлат инспекциясининг Қорақалпоғистон Республикаси, вилоятлар ва Тошкент шаҳри бўйича бўлимлари (1-илова) Ўзбекистон Республикаси Ички ишлар вазирлиги ҳузуридаги Давлат инспекциясининг Бош бошқармасига бевосита бўйсунадилар.

Олиб кетишни назорат қилувчи Бош бошқарма Кенгашига ва республика ҳудудларидаги бўлимлар бошлиқларига ўз обрўсини тўккан ёки ишончни йўқотган ходимларни тегишли номенклатура бўйича ишдан бўшатиш тўғрисида узил-кесил қарорлар қабул қилиш ҳуқуқи берилсин.

4. Олиб кетишни назорат қилувчи Давлат инспекцияси ходимларининг лавозим маошлари СССР Меҳнат ва ижтимоий масалалар давлат қўмитасининг «Давлат солиқ инспекциялари ходимларининг меҳнатига ҳақ тўлаш шартлари ва лавозим маошлари тўғрисида» 1990 йил 8 февралдаги 54-сон қарорига мувофиқ белгилансин.

ССЖИ Вазирлар Маҳкамасининг «Ички ишлар органлари шахсий составининг пул таъминотини ошириш ҳақида» 1991 йил 12 февралдаги 28-сон қарори юзасидан Ўзбекистон ССЖ Президенти ҳузуридаги Вазирлар Маҳкамасининг 1991 йил 31 майдаги 151-сон қарорининг 4—11-бандларида ва 1-жадвалда назарда тутилган меҳнатга ҳақ тўлаш шартлари олиб кетишни назорат қилувчи Давлат инспекциясининг оддий ва бошлиқлар составига кирувчи шахсларга 3, 4, 5-иловаларга мувофиқ жорий қилинсин.

5. Олиб кетишни назорат қилувчи Давлат инспекцияси Бош бошқармасида Ўзбекистон Республикаси қонунлари билан белгиланган ундирилган жарималар йиғиндисидан 15 фоиз миқдорида ажратмалар ҳисобига шакллантириладиган ходимларга моддий ёрдам бериш ва мазкур хизматни ривожлантириш фонди тузилсин.

Ўзбекистон Республикаси Ички ишлар вазирлиги Вазирлар Маҳкамаси ҳузуридаги Бош солиқ бошқармаси билан биргаликда бир ой муддат ичида кўрсатилган фондни тузиш ва ундан фойдаланиш тартиби тўғрисидаги низомни ишлаб чиқсин ва тасдиқласин.

6. Ўзбекистон Республикаси Молия вазирлиги мазкур қарорнинг 2—4-бандларига мувофиқ 1991 йил ва кейинги йилларда олиб кетишни назорат қилувчи Давлат инспекциясини таъминлаш учун зарур пул маблағларини республика бюджетидан ажратсин.

7. Олиб кетишни назорат қилувчи Давлат инспекцияси тизимини, шу жумладан, Бош бошқарма аппаратини ва унинг республикадаги бўлимларини моддий-техник жиҳатдан таъминлаш мақсадида қуйидагиларни ажратиш таъминлансин:

Қорақалпоғистон Республикаси Вазирлар Кенгаши, вилоят ижроия қўмиталари, Тошкент шаҳар ижроия қўмитаси томонидан аппаратларнинг бўлимларини жойлаштириш учун жойлар;

Ўзбекистон Республикаси Иқтисодиёт қўмитаси томонидан — автобуслар, юк ташувчи ва енгил автомобиллар, шунингдек, 50 та вагончалар;

Ўзбекистон Республикаси Нефть маҳсулотлари билан таъминлаш давлат қўмитаси томонидан — ёнилғи-мойлаш материаллари;

Ўзбекистон Республикаси Моддий-техника таъминоти давлат-кооператив қўмитаси ва Алоқа вазирлиги томонидан—биркитилган номенклатура бўйича радиоэлектроника ва алоқа симлари воситалари;

Ўзбекистон Республикаси Автомобиль транспорти вазирлиги ва Автомобиль йўллари вазирлиги, Ўзбекистон фуқаро авиацияси бошқармаси ва Ўрта Осиё темир йўли бошқармаси томонидан — бинолар, постларни ободонлаштириш учун тўсиқ бордюрлар ва шлагбаумлар;

Ўзбекистон фуқаро авиацияси бошқармаси томонидан — ижара шартларида вертолётлар;

Ўзбекистон Республикаси Алоқа вазирлиги томонидан — олиб кетишни назорат қилувчи Давлат инспекцияси Бош бошқармаси, унинг минтақалардаги бўлимлари ва доимий постлари ўртасида ижара шартлари бўйича махсус бевосита алоқа каналини ўрнатиш.

8. Ўзбекистон Республикаси Ички ишлар вазирлиги бир ой муддат ичида:

Ўзбекистон Республикасининг чегара районларидаги барча ишлаб турган доимий Давлат автомобиль инспекцияси постларини олиб кетишни назорат қилувчи Давлат инспекцияси балансига топширишни амалга оширсин;

халқ депутатлари Кенгашлари ижроия қўмиталари, республиканинг қурилиш вазирликлари ва идоралари билан биргаликда 1991 йилда олиб кетишни назорат қилувчи Давлат инспекциясининг зарур миқдордаги доимий постлари биноларини қуриш тўғрисида Вазирлар Маҳкамасига таклиф киритсин;

Тошкент махсус ўрта милиция мактаби негизида олиб кетишни назорат қилувчи Давлат инспекцияси учун кадрлар тайёрлашни ва қайта тайёрлашни ташкил этсин.

9. Халқ истеъмоли моллари, савдо ва пулли хизматлар комплекси бошқа комплекслар, тегишли вазирликлар ва идоралар билан биргаликда 10 кун муддат ичида республика ташқарисига барча турдаги транспорт воситаларида товар-моддий бойликларни олиб кетиш ва рухсатнома бериш тартиби тўғрисида Вазирлар Маҳкамаси қарорининг лойиҳасини тайёрласин ва тақдим этсин.

10. Ўзбекистон Республикаси Ички ишлар вазирлигининг мазкур қарорнинг қандай бажарилаётганлиги тўғрисидаги ҳисоботи 1991 йилнинг октябрь ойида тинглансин.

Ўзбекистон Республикаси Ички ишлар вазирлиги ҳузуридаги товар-моддий бойликларни олиб кетишни назорат қилувчи Давлат инспекциясининг Бош бошқармаси.

Олиб кетишни назорат қилувчи Давлат инспекциясининг Қорақалпоғистон Республикаси бўлими.

Олиб кетишни назорат қилувчи Давлат инспекциясининг Андижон вилояти бўлими.

Олиб кетишни назорат қилувчи Давлат инспекциясининг Бухоро вилояти бўлими.

Олиб кетишни назорат қилувчи Давлат инспекциясининг Жиззах вилояти бўлими.

Олиб кетишни назорат қилувчи Давлат инспекциясининг Қашқадарё вилояти бўлими.

Олиб кетишни назорат қилувчи Давлат инспекциясининг Наманган вилояти бўлими.

Олиб кетишни назорат қилувчи Давлат инспекциясининг Самарқанд вилояти бўлими.

Олиб кетишни назорат қилувчи Давлат инспекциясининг Сурхондарё вилояти бўлими.

Олиб кетишни назорат қилувчи Давлат инспекциясининг Сирдарё вилояти бўлими.

Олиб кетишни назорат қилувчи Давлат инспекциясининг Тошкент вилояти бўлими.

Олиб кетишни назорат қилувчи Давлат инспекциясининг Фарғона вилояти бўлими.

Олиб кетишни назорат қилувчи Давлат инспекциясининг Хоразм вилояти бўлими.

Олиб кетишни назорат қилувчи Давлат инспекциясининг Тошкент шаҳар бўлими.

Доимий ва кўчма постлар.

1. Товар-моддий бойликларни олиб кетишни назорат қилувчи Давлат инспекцияси (бундан кейин олиб кетишни назорат қилувчи Давлат инспекцияси деб аталади) Ўзбекистон Республикаси Ички ишлар вазирлиги ҳузурида тузилади.

Олиб кетишни назорат қилувчи Давлат инспекцияси юридик шахс ҳисобланади ҳамда, ўз номи ўзбек ва рус тилларида ёзилган ва Ўзбекистон Республикасининг Давлат герби акс этган муҳрга эга бўлади.

Давлат инспекциясига юклатилган вазифаларни келишиб ҳал қилиш ва функцияларни зудлик билан амалга ошириш учун коллектив орган — Кенгаш тузилади. Кенгаш тўғрисидаги низом ва унинг таркиби Ўзбекистон Республикаси Ички ишлар вазирлиги ҳайъати томонидан тасдиқланади.

Олиб кетишни назорат қилувчи Давлат инспекциясини молиявий ва моддий-техникавий таъминлаш белгиланган тартибда республика бюджети ҳисобидан амалга оширилади.

2. Олиб кетишни назорат қилувчи Давлат инспекциясининг фаолияти қонунийликка қатъий амал қилишга асосланади. Унинг фаолиятининг ҳуқуқий асосини Ўзбекистон Республикасининг қонунлари, Ўзбекистон Республикаси Олий Кенгашининг бошқа қарорлари, Ўзбекистон Республикаси Президентининг фармонлари, Ўзбекистон Республикаси Президенти ҳузуридаги Вазирлар Маҳкамасининг қарорлари ва фармойишлари, шунингдек, мазкур Низом ташкил этади.

3. Олиб кетишни назорат қилувчи Давлат инспекцияси таркибига қуйидагилар киради:

Ўзбекистон Республикаси Ички ишлар вазирлиги ҳузуридаги олиб кетишни назорат қилувчи Давлат инспекциясининг Бош бошқармаси;

Ўзбекистон Республикаси Ички ишлар вазирлиги ҳузуридаги олиб кетишни назорат қилувчи Давлат инспекциясининг Бош бошқармасига бевосита бўйсунувчи, олиб кетишни назорат қилувчи Давлат инспекциясининг Қорақалпоғистон Республикаси, вилоятлар ва Тошкент шаҳар бўлимлари;

республика йўлларидаги, автомагистралларидаги, авто, аэро, темир йўл вокзалларидаги ҳамда дарё портларидаги доимий ва кўчма постларнинг бўлинмалари.

4. Ўзбекистон Республикаси Ички ишлар вазирлиги ҳузуридаги олиб кетишни назорат қилувчи Давлат инспекциясининг Бош бошқармасига Ички ишлар вазирининг тақдимномаси бўйича Вазирлар Маҳкамаси қарори билан тайинланадиган ва унинг ўринбосари ҳамда Ўзбекистон Республикаси Ички ишлар вазирлигининг ҳайъат аъзоси ҳисобланувчи бошлиқ бошчилик қилади.

Ўзбекистон Республикаси Ички ишлар вазирлиги ҳузуридаги олиб кетишни назорат қилувчи Давлат инспекцияси Бош бошқармаси бошлиғининг биринчи ўринбосари ва ўринбосарлари ҳамда олиб кетишни назорат қилувчи Давлат инспекциясининг Қорақалпоғистон Республикаси, вилоятлар ва Тошкент шаҳар бўлимларининг бошлиқлари олиб кетишни назорат қилувчи Давлат инспекцияси Бош бошқармаси бошлиғининг тақдимномаси бўйича Ўзбекистон Республикаси Ички ишлар вазири томонидан тайинланади.

Олиб кетишни назорат қилувчи Давлат инспекцияси бош бошқармаси марказий аппаратининг ходимларини тайинлаш ва бўшатиш унинг бошлиғи томонидан, Қорақалпоғистон Республикаси, вилоятлар ва Тошкент шаҳар бўлимларининг ходимларини тайинлаш ва бўшатиш эса тегишли бўлимлар раҳбарлари томонидан амалга оширилади.

5. Олиб кетишни назорат қилувчи Давлат инспекцияси ходимлари томонидан хизматни ўташ тартиби ва шартлари СССР ички ишлар органлари шахсий составининг хизматни ўташи тўғрисидаги низом билан белгиланади.

Олиб кетишни назорат қилувчи Давлат инспекцияси мансабдор шахсларининг ўз вазифаларини бажармаганликлари ёки керакли даражада бажармаганликлари учун улар СССР ички ишлар органлари интизомий уставига ва амалдаги қонунларга мувофиқ жавобгарликка тортиладилар.

Бош бошқарма Кенгаши ва республика ҳудудларидаги бўлимлар бошлиқлари ўз обрўсини тўккан ёки ишончни йўқотган ходимларни тегишли ходимлар номенклатураси бўйича ишдан бўшатиш тўғрисида узил-кесил қарор қабул қилиш ҳуқуқига эгадирлар.

6. Олиб кетишни назорат қилувчи Давлат инспекциясининг бош вазифаси ички истеъмол бозорини ҳимоя қилиш ҳамда республика ташқарисига Ўзбекистон Республикаси Президенти ҳузуридаги Вазирлар Маҳкамасининг қарорлари билан тасдиқланадиган рўйхатга мувофиқ хом ашё, материаллар, қишлоқ хўжалиги маҳсулотлари, моддий-техника бойликлари ва бошқа товарларни ғайриқонуний ёки асоссиз равишда олиб кетишга йўл қўймасликдан иборатдир.

Олиб кетишни назорат қилувчи Давлат инспекцияси мансабдор шахсларининг ўз хизмат вазифаларини бажариб турган пайтдаги талаблари барча мансабдор шахслар ва фуқаролар учун мажбурий ҳисобланади.

Олиб кетишни назорат қилувчи Давлат инспекцияси ўз ваколатларини амалга оширишда жамоат тартибини муҳофаза қилиш ва жиноятчиликка қарши курашиш бўйича ҳудудий ички ишлар органлари билан ҳамжиҳатликда ишлайди.

7. Олиб кетишни назорат қилувчи Давлат инспекциясининг бўлимлари ўзларига юклатилган вазифаларга мувофиқ қуйидагиларни амалга оширадилар:

республикадан олиб кетиладиган юкларнинг ёрлиғини кўриш, уларни олиб кетишнинг қонунийлигини тасдиқловчи ҳужжатларни текшириш;

республика ташқарисига юкларни олиб кетувчи автотранспорт воситаларини, ҳаракатдаги темир йўл составини, авиация ва дарё кемаларини кўрикдан ўтказиш;

республикадан юкларни ташиш қоидаларини бузишлар тўғрисидаги ишлар бўйича суриштирув олиб бориш;

ушлаб қолинган юкларнинг бут-бутунлигини таъминлаш ва белгиланган тартибда уларни тегишли органларга бериш юзасидан кечиктириб бўлмайдиган ҳаракатларни амалга ошириш.

8. Олиб кетишни назорат қилувчи Давлат инспекцияси бўлимларининг ходимлари ўзларига юклатилган вазифаларни амалга ошириш мақсадида қуйидаги ҳуқуқларга эгадирлар:

юкларни кўздан кечириш учун барча турдаги транспорт воситаларини тўхтатиш;

фуқаролардан ва мансабдор шахслардан республикадан ташқарига олиб кетиладиган юкларни кўрсатишни, шунингдек, уларни олиб кетишнинг қонунийлигини тасдиқловчи ҳужжатларни талаб қилиш;

республикадан чиқиб кетаётган барча турдаги транспорт воситаларининг юкдонларини, юк бўлимлари, кункалар, кузовлар, контейнерлар, вагонлар ва бошқа ташиш идишларидаги пломбаларни, қулфлаш мосламаларини очиш (Ўзбекистон Республикаси ҳудудидан транзит декларация бўйича олиб ўтиладиган юклар бундан мустасно);

ғайриқонуний олиб кетилаётган юкларни, шунингдек, транспорт воситаларини ушлаб қолиш ва уларни тегишли ташкилотларга уч кунгача муддат ичида топшириш;

зарурат туғилганда автотранспортни мажбурий тўхтатиш учун махсус техника воситаларини қўлланиш;

маст ҳолда бўлган ёки мазкур турдаги транспорт воситасини бошқариш ҳуқуқига эга бўлмаган шахсларни транспорт воситаларини бошқаришдан четлатиш;

товарларни, моддий бойликларни ва бошқа нарсаларни олиб кетишнинг белгиланган тартиб ва қоидаларини бузишда айбдор бўлган фуқаролар ва мансабдор шахсларга Ўзбекистон Республикаси қонунларида белгиланган миқдорларда ва тартибда жарималар солиш.

9. Олиб кетишни назорат қилувчи Давлат инспекцияси мансабдор шахсларининг ҳаракатлари устидан юқори турувчи органларга ёки суд тартибида шикоят қилиниши мумкин. Шикоятнинг берилиши шикоят қилинаётган ҳаракатларни тўхтатиб турмайди.

Олиб кетишни назорат қилувчи Давлат инспекцияси мансабдор шахсларининг маъмурий жазо белгилаш билан боғлиқ ҳаракатлари устидан шикоят қилиш Ўзбекистон Республикасининг қонунларига мувофиқ амалга оширилади.