Сўнгги йилларда давлат томонидан тўқимачилик саноати қўллаб-қувватланаётгани туфайли мамлакатимизда юқори сифатли, рақобатбардош маҳсулот ишлаб чиқарувчи замонавий тўқимачилик корхоналари ташкил этилди. Натижада тармоқда ишлаб чиқариш ҳажми ва халқаро стандартларга жавоб берадиган тўқимачилик маҳсулотлари экспорти барқарор ўсиб бормоқда.

Шу билан бирга, модернизациялаш, техник қайта жиҳозлаш ва тўқимачилик саноатига хорижий инвесторларни жалб қилиш суръатлари етарлича эмас. Бунинг оқибатида қимматбаҳо пахта толасининг анчагина қисми эскирган ускуналар билан жиҳозланган корхоналарда сифати паст маҳсулотларга айлантирилмоқда. Тармоқда зарар кўриб ишлаётган ва иқтисодий ночор корхоналар сони қисқармаяпти. Тўқимачилик саноати корхоналарининг пахта толасини етказиб берувчиларга ҳамда тижорат банкларининг кредитлари бўйича қарздорлиги юқорилигича қолмоқда.

Тармоқ корхоналарини модернизация қилиш ва техник қайта жиҳозлаш ишларини жадаллаштириш, техник қолоқ ва иқтисодий ночор корхоналарни қатъий тугатиш, қўшма тўқимачилик корхоналари фаолияти ҳамда техник қайта жиҳозлаш жараёнига хорижий инвесторларни жалб қилиш учун қулай шароит яратиш мақсадида:

1. Маълумот учун қабул қилинсинки:

ўтказилган инвентаризация натижасида эскирган ускуналарда ишлаётган сифатли рақобатбардош тўқимачилик маҳсулотлари ишлаб чиқаришни таъминламаётган ва ривожланиш истиқболларига эга бўлмаган корхоналар аниқланди (1-иловага* мувофиқ), уларнинг аксарияти бўйича Ўзбекистон Республикаси Монополиядан чиқариш, рақобат ва тадбиркорликни қўллаб-қувватлаш давлат қўмитаси, Давлат солиқ қўмитаси, «Ўзпахтасаноат» уюшмаси ва бошқа кредиторлар ташаббусига кўра белгиланган тартибда банкротлик тўғрисида ишлар қўзғатилди ва тугатиш амалиёти ўтказилмоқда;

хорижий инвесторлар билан биргаликда ташкил этилган ва банкларнинг кредитлари бўйича муддати ўтказиб юборилган қарзлари бор, иқтисодий ночор тўқимачилик корхоналарга (2-иловага* мувофиқ) нисбатан кредиторлар томонидан банкротлик жараёнлари бошланган ёки қонунда белгиланган тартибда уларнинг мулкидан жарима ундирилади.

2. Қуйидаги тартиб белгилаб қўйилсин:

1-иловада кўрсатилган корхоналарда замонавий технологик ускуналар асосида модернизация ва техник қайта жиҳозлаш ишлари амалга оширилмагунча эскирган технологик ускуналарда қайта ишлаш учун пахта толаси сотилишига йўл қўйилмайди;

ҳозирги вақтда модернизация ва қайта жиҳозлаш ишларини амалга ошираётган 3-иловада* кўрсатилган корхоналар учун 2007 йил 1 июлгача уларга пахта толаси сотишнинг амалдаги тартиби сақлаб қолинади;

илгари сотиб олинган пахта толаси учун муддати ўтказиб юборилган қарзлари бор республика қайта ишлаш корхоналари биржа савдоларига қатнашишига рухсат этилмайди.

3. Тўқимачилик саноати корхоналари учун инвесторлар ва бошқарувчи компанияларни танлаш бўйича ҳукумат комиссияси (қуйида — Комиссия) 4-иловага* мувофиқ тузилсин.

Комиссиянинг асосий вазифалари ва ваколатлари этиб қуйидагилар белгилансин:

бюджетга, Ўзбекистон Республикаси кафолатлари бўйича берилган банк кредитлари ҳамда пахта толаси учун ташқи савдо компаниялари олдида муддати ўтказиб юборилган қарзлар бўйича мулкига кредиторларнинг талаблари қаратилган иқтисодий ночор тўқимачилик корхоналарини сотиш ва бошқарувга бериш, инвесторлар ёки замонавий тўқимачилик корхоналари менежменти тажрибасига эга бошқарувчи компаниялар ўртасида очиқ танловларни ўтказиш;

эскирган технологик ускуналари бор тўқимачилик корхоналарини модернизация қилиш ва техник қайта жиҳозлаш дастурига киритиш ва ундан чиқариб ташлаш;

Ўзбекистон Республикаси товар-хом ашё биржасида пахта толасини сотиш бўйича ёпиқ кимошди савдоларига киритиладиган тўқимачилик корхоналари рўйхатига қўшиш ва бу рўйхатдан чиқариш тўғрисида қарорлар қабул қилиш;

тўқимачилик корхоналари модернизация ва техник қайта жиҳозлаш ишларини бажаргандан сўнг уларни Ўзбекистон Республикаси товар-хом ашё биржасида пахта толасини сотиб олишига рухсат бериш тўғрисида қарор қабул қилиш.

4. Комиссия (Азимов Р.С.):

берилган ваколатларга мувофиқ ўзига юклатилган вазифаларнинг тезкор ҳал этилишини таъминлаш ва ҳар чоракда Ўзбекистон Республикаси Президенти девонига амалга оширилаётган ишларнинг муайян натижаси ҳақида ҳисобот бериш;

2006 йилнинг 1 июлигача 2-иловада қайд этилган корхоналар учун инвесторлар ёки бошқарув компанияларини танлаш ишлари якунлансин.

5. «Ўзбекенгилсаноат» давлат акциядорлик компанияси Ўзбекистон Республикаси Иқтисодиёт вазирлиги, Ташқи иқтисодий алоқалар, инвестициялар ва савдо вазирлиги, Молия вазирлиги билан биргаликда уч ой муддатда 2006—2008 йилларда тўқимачилик саноати корхоналарини модернизация қилиш ва техник қайта жиҳозлаш дастурини ишлаб чиқсин ва Вазирлар Маҳкамасига тақдим этсин.

6. «Ўзбекенгилсаноат» давлат акциядорлик компаниясига ўз таркибига хорижий инвестициялар киритилган корхоналарни бирлашган аъзолар сифатида ушбу корхоналар таъсисчиларининг қарорига мувофиқ қабул қилиш ҳуқуқи берилсин.

7. Пахта толасини Ўзбекистон Республикаси Товар-хом ашё биржаси томонидан ўтказиладиган очиқ биржа савдоларида пахтани қайта ишлайдиган корхоналарга сотиш тартиби тўғрисидаги вақтинчалик низом 5-иловага* мувофиқ тасдиқлансин.

8. Ўзбекистон Республикаси Молия вазирлиги Давлат солиқ қўмитаси билан ҳамкорликда икки ҳафта ичида пахта толасини ЎзРТХБ орқали республика корхоналарига сотишда қўшимча қиймат солиғини ҳисоблаш ва тўлаш тўғрисидаги низомни белгиланган тартибда ишлаб чиқсин ва тасдиқласин.

10. Белгилансинки, тайёр тўқимачилик маҳсулоти экспортини кенгайтиришни рағбатлантириш учун ўз маҳсулотининг 80 ва ундан кўп фоизини эркин айирбошланадиган валютада экспорт қилувчи тўқимачилик саноати корхоналари 2006 йилнинг 1 майидан 2009 йилнинг 1 январигача мулк солиғидан озод этилади.

11. Ўзбекистон Республикаси ҳукуматининг айрим қарорларига 6-иловага мувофиқ ўзгартишлар киритилсин.

Ўзбекистон Республикаси Адлия вазирлиги манфаатдор вазирлик ва идоралар билан биргаликда бир ой муддатда қонунчиликка мазкур қарордан келиб чиқадиган ўзгартишлар ва қўшимчалар киритиш тўғрисидаги таклифни Вазирлар Маҳкамасига тақдим этсин.

12. Мазкур қарор ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.

Ўзбекистон Республикаси Вазирлар Маҳкамасининг 2004 йил 3 сентябрдаги «Пахта толасини сотиш ва ташқи савдо компанияларининг «Пахтасаноат» ҳудудий акциядорлик бирлашмалари билан ҳисоб-китоб қилиш тартиби тўғрисидаги низомни тасдиқлаш ҳақида»ги 414-қарорига қуйидаги ўзгартишлар киритилсин:

а) 3-банддаги «60 кун» сўзи «90 кун» деб ўзгартирилсин;

б) 2-илованинг 3 ва 35-бандлари қуйидаги сатрлар билан тўлдирилсин:

«Бунда ташқи савдо компанияларига хорижий инвестиция киритилган корхоналарга етказиб бериладиган пахта толаси қийматининг 85 фоизи, олдиндан тўлов ёки мазкур корхоналар маҳсулотларининг харидорлари томонидан ташқи савдо компаниялари фойдасига очиладиган ҳисоб рақамни кафолат таъминоти сифатида қабул қилишга рухсат этилади.

Ташқи савдо компаниялари ҳисоб-рақамларига хорижий инвестиция киритилган корхоналар маҳсулотининг экспортидан келиб тушадиган даромад ушбу корхоналарни етказиб берилган пахта толасининг қиймати белгиланган тартибда чегириб қолингач ва валюта даромадининг мажбурий 50 фоизи сотилганидан сўнг, уларнинг ҳисоб рақамига ўтказилади».

в) 2-илованинг 35-бандидаги «60 кун» сўзи «90 кун» деб алмаштирилсин.