Oʻzbekiston Respublikasi Prezidentining 2005-yil 1-dekabrdagi PQ-229-sonli “Tibbiyot xodimlari mehnatiga haq toʻlash tizimini takomillashtirish toʻgʻrisida”gi qarori (Oʻzbekiston Respublikasi Qonun hujjatlari toʻplami, 2005-yil, 47-48-son, 354-modda) Oʻzbekiston Respublikasi Vazirlar Mahkamasining 2005-yil 21-dekabrdagi 276-sonli “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi qarori (Oʻzbekiston Respublikasi Qonun hujjatlari toʻplami, 2005-yil, 51-son, 380-modda) ijrosini taʼminlash maqsadida qaror qilamiz:

1. Ilova qilinayotgan Tibbiyot muassasalarini moddiy ragʻbatlantirish va rivojlantirish Jamgʻarmasi toʻgʻrisida nizom tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab, oʻn kun oʻtgandan keyin kuchga kiradi.

Mazkur Nizom Oʻzbekiston Respublikasi Prezidentining 2005-yil 1-dekabrdagi PQ-229-sonli “Tibbiyot xodimlari mehnatiga haq toʻlash tizimini takomillashtirish toʻgʻrisida”gi qarori (Oʻzbekiston Respublikasi Qonun hujjatlari toʻplami, 2005-yil, 47-48-son, 354-modda) Oʻzbekiston Respublikasi Vazirlar Mahkamasining 2005-yil 21-dekabrdagi 276-sonli “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi qaroriga (Oʻzbekiston Respublikasi Qonun hujjatlari toʻplami, 2005-yil, 51-son, 380-modda) muvofiq tibbiyot muassasalarining moddiy-texnik bazasini rivojlantirish va tibbiyot xodimlari mehnatini moddiy ragʻbatlantirish uchun tibbiyot muassasalarini moddiy ragʻbatlantirish va rivojlantirish Jamgʻarmasini shakllantirish va uning mablagʻlarini sarflash tartibini belgilaydi.

1. Tibbiyot muassasalarini moddiy ragʻbatlantirish va rivojlantirish Jamgʻarmasi (keyingi oʻrinlarda — Jamgʻarma) 2006-yil 1-yanvardan rivojlantirish Jamgʻarmasi negizida barcha budjet tibbiyot muassasalarida tashkil etiladi.

2. Jamgʻarma mablagʻlari:

ishga vijdonan munosabati va koʻrsatilayotgan tibbiy yordamning yuqori sifati uchun tarif stavkasi bazasiga oylik ustamalar belgilash, bir yoʻla moddiy yordam va mukofotlar toʻlash shaklida tibbiyot va farmatsevtika xodimlarni ragʻbatlantirishga;

tibbiyot muassasasining moddiy-texnika bazasini rivojlantirishga, modernizatsiya qilishga va taʼmirlashga yoʻnaltiriladi.

3. Quyidagilar Jamgʻarmaning manbalari hisoblanadi:

tibbiyot muassasasi uchun ajratiladigan budjet mablagʻlari umumiy hajmining 5 foizigacha boʻlgan qismi;

homiylik va donorlik tashkilotlaridan hamda pulli davolash va xizmatlar koʻrsatishdan tushadigan mablagʻlar;

tibbiyot xodimlarining mehnatiga haq toʻlashda tejalgan budjet mablagʻlari.

4. Tibbiyot muassasalari Jamgʻarma xarajatlarini sarflashning ikki mustaqil yoʻnalishi boʻyicha mablagʻlarning alohida hisobini yuritadilar:

tibbiyot muassasasi xodimlarini moddiy ragʻbatlantirishga;

tibbiyot muassasasining moddiy-texnik bazasini rivojlantirishga, modernizatsiya qilish va taʼmirlashga.

5. Agar homiy, donor tomonidan boshqa hollar maxsus koʻrsatilmagan boʻlsa, homiylik va donorlik tashkilotlarining mablagʻlari, shuningdek pulli davolash va xizmatlar koʻrsatishdan tushgan mablagʻlar tibbiyot muassasasi tomonidan ulardan keyinchalik xodimlarni moddiy ragʻbatlantirishda va moddiy-texnik bazani rivojlantirish, modernizatsiya qilish va taʼmirlashda foydalanish uchun belgilangan mutanosiblikka muvofiq bank muassasasida alohida hisob raqamlariga oʻtkaziladi.

6. Mazkur Nizomning 3-bandida koʻrsatilgan budjet mablagʻlari ulardan keyinchalik xodimlarni moddiy ragʻbatlantirishda va moddiy-texnik bazani rivojlantirish, modernizatsiya qilish va taʼmirlashda foydalanish uchun belgilangan mutanosiblikka muvofiq har bir chorak yakunlari boʻyicha tibbiyot muassasasi tomonidan bank muassasasida alohida hisob raqamlariga oʻtkaziladi.

7. Jamgʻarma mablagʻlaridan xodimlarni moddiy ragʻbatlantirishda va tibbiyot muassasasining moddiy-texnik bazasini rivojlantirish, modernizatsiya qilish va taʼmirlashda foydalanish tegishli ravishda ushbu maqsadlar uchun belgilangan mablagʻlar qoldigʻi va bank muassasalaridagi alohida hisob raqamlaridagi mavjud mablagʻ doirasida belgilangan tartibda amalga oshiriladi.

8. Jismoniy shaxslarning Jamgʻarma mablagʻlari hisobidan olgan daromadiga soliq solish qonun hujjatlarida belgilangan tartibda amalga oshiriladi.

9. Jamgʻarma mablagʻlari tibbiyot muassasasi qaysi guruhga mansubligiga qarab quyidagi mutanosiblikda taqsimlanadi va sarflanadi:

10. Barcha tibbiyot muassasalarida mehnatga vijdonan munosabati, koʻrsatilayotgan tibbiy yordamning yuqori sifati uchun xodimning tarif stavkasiga oylik ustamalar belgilash uchun mezonlarni aniqlash qismida yagona yondashuvga rioya qilinishi taʼminlanadi.

Tibbiyot xodimlarining ishga vijdonan munosabati va koʻrsatayotgan tibbiy yordamning yuqori sifati uchun tarif stavkalariga oylik ustamalar tegishli xodimning tarif stavkasidan 5 dan 20 foizgacha miqdorda belgilanadi.

11. Oylik ustamalar xodimlarning lavozimiga va tibbiyot muassasalari guruhiga qarab quyidagi doiralarda belgilanadi:

12. Alohida tibbiyot xodimlari uchun ustamalar belgilash quyidagi asosiy koʻrsatkichlarni albatta hisobga olgan holda amalga oshiriladi:

koʻrsatilayotgan tibbiy yordamning sifati — davolash usullarini qoʻllashdan asorat qolishining past darajasi, bemor holatining ijobiy muttasil oʻsishi, tibbiy yordam sifatiga bemorlar tomonidan shikoyat qilinmaganligi, retsidivlarning past darajasi, qoʻllanilayotgan davolashning tasdiqlangan standartlarga muvofiqligi. Ambulatoriya-poliklinika boʻgʻinida — biriktirilgan kontingentning dispanserlashtirish bilan toʻliq qamrab olinganligi va sogʻligi holati koʻrsatkichlarining yaxshilanishi;

mehnat bilan bandligi — xodimning amalda bandligi, ish vaqti davomida xizmat koʻrsatish meʼyorlarini hisobga olgan holda mansab majburiyatlarini bajarishi; belgilangan xizmat koʻrsatish meʼyorlariga muvofiq xizmat koʻrsatilgan bemorlarning, laboratoriya analizlari va boshqa davolash-diagnostika tadbirlarining miqdor maʼlumotlari boʻyicha aniqlanadigan tibbiy yordam koʻrsatish hajmi;

koʻrsatilayotgan tibbiy yordamning murakkabligi — koʻrsatilayotgan tibbiy yordamning umumiy hajmida murakkab (yuksak kasb bilimlarini, yuqori darajada aniqlikni, yuksak texnologiyalardan foydalanishni talab qiladigan) tibbiy aralashuvlar, manipulatsiyalarning yuqori salmogʻi;

ixtisoslik tarmogʻida koʻrsatilayotgan tibbiy yordamning oʻxshashi yoʻqligi — eng kam hajmda boʻlgan jarrohlik aralashuvlari va oqilona sarf qilgan holda bemorlarning yanada tezroq sogʻayishiga koʻmaklashadigan jahon standartlari darajasidagi yangi texnologiyalar va zamonaviy uskunalar qoʻllanilgan holda bajarilgan tibbiy yordam hajmi.

13. Tibbiyot muassasalarining oʻrnak koʻrsatgan xodimlarini bir yoʻla mukofotlash muassasani rivojlantirishga qoʻshgan shaxsiy hissasi va faoliyatida yuqori koʻrsatkichlarga erishganligi uchun unga bir lavozim maoshigacha miqdorda mukofot tayinlash yoʻli bilan amalga oshiriladi.

14. Tibbiyot muassasalari xodimlariga moddiy yordam favqulodda hollarda ularning murojaatiga koʻra yoki tegishli tibbiyot muassasasi kasaba uyushmasi tashkilotining tashabbusi bilan (yaqin qarindoshlarning vafot etishi, ogʻir jarohatlar olish, kasal boʻlish, tabiiy ofatlar oqibatlari va boshqa shunga oʻxshash hollarda) koʻrsatiladi.

15. Tibbiyot xodimlarining mehnatga vijdonan munosabati va yuqori sifatli tibbiy yordam koʻrsatganligi uchun tarif stavkalariga oylik ustamalar belgilash, mukofotlash va moddiy yordam koʻrsatish Jamgʻarma mablagʻlarini tasarruf etish boʻyicha maxsus komissiya qarori asosida amalga oshiriladi.

16. Jamgʻarma hisobidan ustamalar, mukofotlar va moddiy yordamlar toʻlash Jamgʻarma mablagʻlarini tasarruf etish boʻyicha maxsus komissiyaning tegishli qarori asosida qabul qilingan tibbiyot muassasasi rahbarining buyrugʻiga muvofiq amalga oshiriladi. Buyruqda alohida xodimlarga beriladigan moddiy ragʻbatlantirishning aniq turlari, uning miqdori va toʻlash muddatlari koʻrsatiladi.

17. Jamgʻarma mablagʻlari hisobidan ustamalar va boshqa moddiy ragʻbatlantirish turlarini toʻlash ish haqi toʻlanishi bilan bir vaqtda amalga oshiriladi.

18. Tibbiyot muassasasining moddiy-texnika bazasini rivojlantirish, modernizatsiya qilish va taʼmirlash maqsadida Jamgʻarma mablagʻlarini sarflash Jamgʻarma mablagʻlarini tasarruf etish boʻyicha maxsus komissiyaning qarori asosida amalga oshiriladi.

19. Jamgʻarma mablagʻlarini tasarruf etish boʻyicha maxsus komissiyaning qarori asosida tibbiyot muassasasi rahbari mablagʻlarni sarflashning aniq maqsadlari, yoʻnalishlarini va uning miqdorini koʻrsatgan holda buyruq chiqaradi.

20. Sogʻliqni saqlash yuqori turuvchi boshqaruv organlarining rahbarlari, maxsus komissiya aʼzolari, shuningdek, tibbiyot muassasasi rahbarlari Jamgʻarma mablagʻlarini shakllantirish va sarflash tartibiga rioya qilinishi, xolisligi va haqqoniyligi uchun javobgardirlar.

21. Moliya vazirligining Bosh nazorat-taftish boshqarmasi va uning hududiy boʻlinmalari Jamgʻarma mablagʻlaridan maqsadli foydalanilishini qonunchilikda koʻrsatilgan tartibda tekshiradilar.