Paxta tolasini xorijiy sarmoya ishtirokidagi korxonalarga sotish mexanizmini takomillashtirish, shuningdek xorijiy investitsiyalarni respublika yengil sanoatiga jalb etishni yanada kengaytirish maqsadida Vazirlar Mahkamasi qaror qiladi:

1. Vazirlar Mahkamasining 2003-yil 16-oktabrdagi 447-son qaroriga muvofiq paxta tolasini xorijiy investitsiyalar ishtirokidagi korxonalarga yetkazib berish ular bilan tashqi savdo kompaniyalari oʻrtasida imzolangan shartnomalarga qatʼiy muvofiq holda, “Kotton Outluk”da eʼlon qilinadigan “A” indeksi va uning Oʻzbekistondagi komponenti kotirovkalariga muvofiq yuklab joʻnatish sanasida vujudga keladigan jahon narxlari boʻyicha, 15 foiz miqdoridagi chegirma bilan amalga oshirilishi maʼlumot uchun qabul qilinsin.

Belgilansinki, 2005-yili hosilidan boshlab paxta tolasini xorijiy investitsiyalar ishtirokidagi korxonalarga sotish banklar, Oʻzbekiston “Sifat” markazi, paxta terminallari tomonidan koʻrsatilgan xizmatlar boʻyicha qoʻshimcha toʻlovlarni, shu jumladan toʻlovi tashqi savdo kompaniyalari ixtiyorida qoladigan mablagʻlar hisobiga amalga oshiriladigan terminallarda paxta tolasini saqlash va sugʻurta qilish xarajatlarini undirmasdan amalga oshiriladi.

2. Belgilab qoʻyilsinki, paxta tolasini xorijiy investitsiyalar ishtirokidagi korxonalarga Oʻzbekiston Respublikasi Tashqi iqtisodiy aloqalar, investitsiyalar va savdo vazirligining tashqi savdo kompaniyalari orqali sotish 2005-yil paxta xomashyosi hosilidan boshlab schyot-fakturalarda qoʻshilgan qiymat soligʻi summasini paxta tolasining ulgurji sotish narxida ajratib koʻrsatgan holda amalga oshiriladi.

Oʻzbekiston Respublikasi Moliya vazirligi Davlat soliq qoʻmitasi bilan birgalikda Paxta tolasini erkin almashtiriladigan valyutaga xorijiy investitsiyalar ishtirokidagi korxonalarga sotishda qoʻshilgan qiymat soligʻini hisoblab chiqarish va toʻlash toʻgʻrisidagi nizomni bir hafta muddatda ishlab chiqsin va belgilangan tartibda tasdiqlasin.

3. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda Oʻzbekiston Respublikasi Vazirlar Mahkamasiga ushbu qarorning qabul qilinishi munosabati bilan amaldagi qonun hujjatlariga oʻzgartirish va qoʻshimchalar toʻgʻrisida takliflar kiritsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari V.A. Golishev zimmasiga yuklansin.