Ўзбекистон Республикаси Коррупцияга қарши курашиш агентлиги директорининг
буйруғи
Давлат органлари ва ташкилотларининг комплаенс ва коррупцияга қарши ички назорат тузилмалари томонидан коррупция ҳолатлари ҳамда уларнинг олдини олиш юзасидан текширувларни ташкил этиш тартиби тўғрисидаги низомни тасдиқлаш ҳақида
[Ўзбекистон Республикаси Адлия вазирлиги томонидан 2026 йил 18 ноябрда рўйхатдан ўтказилди, рўйхат рақами 3978]
Ўзбекистон Республикасининг «Коррупцияга қарши курашиш тўғрисида»ги Қонунига мувофиқ буюраман:
1. Давлат органлари ва ташкилотларининг комплаенс ва коррупцияга қарши ички назорат тузилмалари томонидан коррупция ҳолатлари ҳамда уларнинг олдини олиш юзасидан текширувларни ташкил этиш тартиби тўғрисидаги низом иловага мувофиқ тасдиқлансин.
2. Мазкур буйруқ Ўзбекистон Республикаси Бош прокуратураси, Иқтисодиёт ва молия вазирлиги, Ички ишлар вазирлиги, Рақамли технологиялар вазирлиги ҳамда Саноат кооперацияси ва давлат харидлари агентлиги билан келишилган.
3. Ушбу буйруқ расмий эълон қилинган кундан эътиборан кучга киради.
Директор А. БУРХАНОВ
Тошкент ш.,
2026 йил 17 ноябрь,
101-сон
Келишилди:
Иқтисодиёт ва молия вазири Ж. КУЧКАРОВ
2026 йил 28 октябрь
Рақамли технологиялар вазири Ш. ШЕРМАТОВ
2026 йил 28 октябрь
Бош прокурор биринчи ўринбосари Б. ВАЛИЕВ
2026 йил 23 октябрь
Ички ишлар вазири А. ТАШПУЛАТОВ
2026 йил 22 октябрь
Саноат кооперацияси ва давлат харидлари агентлиги директори Б. ХАЙДАРОВ
2026 йил 11 октябрь
Ўзбекистон Республикаси Коррупцияга қарши курашиш агентлиги директорининг 2026 йил 17 ноябрдаги 101-сон буйруғига
ИЛОВА
ИЛОВА
Давлат органлари ва ташкилотларининг комплаенс ва коррупцияга қарши ички назорат тузилмалари томонидан коррупция ҳолатлари ҳамда уларнинг олдини олиш юзасидан текширувларни ташкил этиш тартиби тўғрисидаги
НИЗОМ
Мазкур Низом комплаенс ва коррупцияга қарши ички назорат тузилмалари (бундан буён матнда ички назорат тузилмалари деб юритилади) томонидан давлат органлари ва ташкилотлари, давлат иштирокидаги корхоналарда (бундан буён матнда давлат органлари ва ташкилотлари деб юритилади) коррупция ҳолатларини келтириб чиқарувчи омилларни аниқлаш ва уларнинг олдини олиш юзасидан текширувларни (бундан буён матнда текширув деб юритилади) ташкил этиш тартибини белгилайди.
Ушбу Низом талаблари Ўзбекистон Республикаси Президенти Администрацияси, Ўзбекистон Республикаси Олий Мажлиси Қонунчилик палатаси ва Сенати, Қорақалпоғистон Республикаси Жўқорғи Кенгеси, Ўзбекистон Республикаси Вазирлар Маҳкамаси, Ўзбекистон Республикаси Марказий сайлов комиссияси, суд, прокуратура, ички ишлар, мудофаа ишлари, фавқулодда вазиятлар, божхона, Ўзбекистон Республикаси Миллий гвардияси, Давлат хавфсизлик хизмати ва Ўзбекистон Республикаси Президенти Давлат хавфсизлик хизмати органларига нисбатан татбиқ этилмайди.
1-боб. Текширувларни ташкил этиш
1. Текширув ички назорат тузилмалари томонидан давлат органи ва (ёки) ташкилотининг марказий аппарати, ҳудудий бўлинмалари, давлат органи ва (ёки) ташкилоти ҳузуридаги ташкилотлар (бундан буён матнда таркибий бўлинмалар деб юритилади) томонидан амалга ошириладиган функциялар доирасида коррупциявий омилларни аниқлаш ҳамда уларнинг олдини олиш чораларини белгилаш мақсадида ўтказилади.
2. Текширувлар режали ва режадан ташқари ўтказилади.
3. Режали текширувлар таркибий бўлинмалар томонидан амалга ошириладиган функциялардаги коррупциявий хавф-хатарлар даражасидан келиб чиқиб, қуйидаги даврийликда ташкил этилади:
коррупциявий хавф-хатарлар даражаси «паст» бўлган функцияларда — икки йилда бир марта;
коррупциявий хавф-хатарлар даражаси «ўрта» бўлган функцияларда — бир йилда бир марта;
коррупциявий хавф-хатарлар даражаси «юқори» бўлган функцияларда — бир йилда икки марта.
4. Режадан ташқари текширувлар ички ва ташқи манбалардан коррупциявий омиллар ҳақида келиб тушган ахборот, маълумот ва топшириқларга асосан ўтказилади.
5. Текширувлар давлат органи ва ташкилотининг биринчи раҳбари ёки унинг комплаенс ва коррупцияга қарши ички назорат бўйича ўринбосари (маслаҳатчиси) (ушбу лавозим мавжуд бўлган тақдирда) томонидан ҳар йили тасдиқланадиган коррупция ҳолатлари ҳамда уларнинг олдини олиш юзасидан текширувларни ташкил этиш чора-тадбирларига (бундан буён матнда текширувларни ташкил этиш тадбирлари деб юритилади) мувофиқ ўтказилади.
6. Текширув муддати текширувларни ташкил этиш тадбирларида белгиланади ва йигирма беш иш кунидан ошмаслиги лозим. Текширув муддати текширувларни ташкил этиш тадбирларида кўрсатилган бошланиш санасидан эътиборан ҳисобланади. Текширувларни ташкил этиш тадбирларида белгиланган муддатнинг охирги куни ёки ундан олдин текширув ҳаракатлари тугалланган кун текширув якунланган кун ҳисобланади.
Текширув давомида қўшимча ўрганишлар талаб этиладиган тақдирда, ички назорат тузилмасининг асослантирилган билдиргиси асосида давлат органи ва ташкилотининг биринчи раҳбарининг ёки унинг комплаенс ва коррупцияга қарши ички назорат бўйича ўринбосарининг (маслаҳатчисининг) (ушбу лавозим мавжуд бўлган тақдирда) топшириғи билан текширув муддати бир марта, кўпи билан йигирма беш иш кунига узайтирилиши мумкин.
2-боб. Текширувларни ўтказиш ва уларнинг натижаларини расмийлаштириш
7. Текширув ички назорат тузилмаси раҳбари томонидан шакллантириладиган ишчи гуруҳ томонидан ўтказилади. Ишчи гуруҳ таркиби ва унинг раҳбари ички назорат тузилмаси раҳбари томонидан белгиланади.
Ишчи гуруҳга ички назорат тузилмаси раҳбари ёки ички назорат тузилмасининг бошқа ходими раҳбарлик қилади.
Ишчи гуруҳ таркиби камида уч нафар аъзодан иборат бўлади. Ишчи гуруҳ таркибига бошқа таркибий бўлинмалар, шунингдек, бошқа давлат органлари ва ташкилотларининг мутахассислари жалб этилиши мумкин.
Бунда текширилаётган таркибий бўлинмада текширув доирасидаги функцияларни амалга оширувчи ходимларнинг ишчи гуруҳ таркибига киритилишига йўл қўйилмайди.
8. Ишчи гуруҳ аъзосида текширилаётган таркибий бўлинмада текширув доирасидаги функцияларни амалга оширувчи ходимлар билан яқин қариндошлик муносабатлари мавжуд бўлса ёки текширув натижаларидан бевосита манфаатдор бўлса ёхуд унинг холислигига шубҳа туғдирувчи бошқа ҳолатлар мавжуд бўлса, у ўзини ўзи рад этиши шарт.
Ишчи гуруҳ аъзоси ўзини ўзи рад этиш учун асос бўлувчи ҳолатлар юзага келган ёки унга маълум бўлган пайтдан эътиборан бу ҳақда ишчи гуруҳ раҳбарини шу вақтнинг ўзида ёзма равишда хабардор қилиши шарт.
Ишчи гуруҳ раҳбари ўзини ўзи рад этиш тўғрисидаги хабарномани олган кундан эътиборан тегишли ишчи гуруҳ аъзосини текширувда иштирок этишдан четлаштириш ҳамда унинг ўрнига бошқа шахсни ишчи гуруҳ таркибига киритиш чораларини кўради.
9. Текширув давомида ички назорат тузилмаси қуйидагиларга ҳақли:
давлат органи ва ташкилоти тизимидаги ўз зиммасига юклатилган вазифаларни амалга ошириш учун зарур бўлган ахборот ҳамда маълумотлар базаларидан фойдаланиш;
ўз зиммасига юклатилган вазифаларни амалга ошириш учун давлат органларидан ва бошқа ташкилотлардан, фуқаролардан маълумотларни ҳамда бошқа зарур ҳужжатларни ва материалларни сўраш ва олиш;
ваколатини амалга ошириш доирасида зарурат туғилганда тегишли ҳужжат ва материаллар билан танишиш мақсадида давлат органи ва ташкилотининг объектларига тўсқинликсиз кириш.
10. Текширув давомида ички назорат тузилмаси қуйидагиларга мажбурдир:
текширувни холисона, беғараз, ўз вақтида ва сифатли ўтказишга;
текширув доирасидан четга чиқмасликка;
касб этикаси ва одоб-ахлоқ қоидаларига қатъий риоя этишга;
текширув якунлари бўйича тузилган маълумотномада кўрсатилган фактларни асослантиришга;
текширув давомида ўзларига маълум бўлган хизмат сирини ва қонун билан қўриқланадиган бошқа сирларни ташкил этувчи маълумотларни учинчи шахсларга ошкор этмасликка.
11. Текширув давомида текширилаётган таркибий бўлинма томонидан амалга ошириладиган функциялар доирасида коррупциявий омилларнинг мавжудлиги, шунингдек, коррупциявий хавф-хатарларни камайтириш ёки бартараф этишга қаратилган чора-тадбирларнинг амалга оширилиши ва уларга риоя этилиши ўрганилади.
12. Ички назорат тузилмаси текширув давомида аниқланган коррупцияга оид ҳуқуқбузарлик фактлари бўйича тўпланган материалларни қонуний чора кўриш учун тегишли ҳуқуқни муҳофаза қилувчи органларга ёки бевосита уларнинг ички назорат тузилмаларига тақдим этади.
13. Давлат органлари ва ташкилотлари мансабдор шахслари, бошқарув ходимлари ва бошқа мутахассислар текширув доирасида ички назорат тузилмаси томонидан сўралган маълумот, ахборот ва ҳужжатларни, улар сўралган кундан бошлаб уч иш куни ичида ички назорат тузилмасига тақдим этишлари лозим.
14. Текширув якунлари бўйича ишчи гуруҳ томонидан текширув якунланган кундан бошлаб уч иш куни ичида маълумотнома тузилади.
Маълумотномада қуйидагилар акс эттирилади:
текширув ўтказилган таркибий бўлинма номи;
текширув ўтказилган давр;
ишчи гуруҳ таркиби;
аниқланган ҳолатларни тасдиқловчи ҳужжатлар ва бошқа далиллар;
аниқланган камчиликларни бартараф этиш ҳамда келгусида уларнинг олдини олиш юзасидан таклифлар.
15. Маълумотнома ишчи гуруҳ аъзолари томонидан имзоланади. Ишчи гуруҳ аъзоларидан бири маълумотномада акс эттирилган хулосаларга рози бўлмаган тақдирда, ўзининг алоҳида фикрини ёзма равишда баён этишга ҳақли ҳамда ушбу ёзма фикр маълумотномага илова қилинади.
Маълумотнома имзоланган кундан бошлаб бир иш куни ичида текширилган таркибий бўлинма раҳбарига танишиш ва имзолаш учун тақдим этилади.
Текширилган таркибий бўлинма раҳбари маълумотномани имзолашдан бош тортган тақдирда, бу ҳақда ишчи гуруҳ томонидан далолатнома расмийлаштирилади. Далолатномада имзолашдан бош тортиш ҳолати ва унинг сабаблари кўрсатилади.
Текширилган таркибий бўлинма раҳбари маълумотнома билан танишган кундан бошлаб икки иш куни ичида маълумотномага нисбатан эътирозларини ёзма равишда тақдим этишга ҳақли. ЭЪтирозлар маълумотномага илова қилинади.
16. Текширув якунлари бўйича тузилган маълумотнома эътирозлар (улар мавжуд бўлганда) билан бирга текширилган таркибий бўлинма раҳбарининг эътироз билдириш муддати тугаган кундан бошлаб бир иш куни ичида ички назорат тузилмаси томонидан давлат органи ва ташкилотининг биринчи раҳбарига ёки унинг комплаенс ва коррупцияга қарши ички назорат бўйича ўринбосарига (маслаҳатчисига) (ушбу лавозим мавжуд бўлган тақдирда) кўриб чиқиш учун киритилади.
Маълумотнома у киритилган кундан бошлаб икки иш куни ичида давлат органи ва ташкилотининг биринчи раҳбари ёки унинг комплаенс ва коррупцияга қарши ички назорат бўйича ўринбосари (маслаҳатчиси) (ушбу лавозим мавжуд бўлган тақдирда) томонидан кўриб чиқилади ҳамда маълумотномада қайд этилган камчиликларни бартараф этиш учун коррупциявий омилларни аниқлаш ҳамда уларнинг олдини олиш бўйича чора-тадбирлар дастурини (бундан буён матнда чора-тадбирлар дастури деб юритилади) ишлаб чиқиш юзасидан текширилган таркибий бўлинмага топшириқ берилади.
Текширилган таркибий бўлинма топшириқ берилган кундан бошлаб уч иш куни ичида чора-тадбирлар дастурини ишлаб чиқади ва уни ички назорат тузилмаси билан келишган ҳолда тасдиқлаш учун давлат органи ва ташкилотининг биринчи раҳбарига ёки унинг комплаенс ва коррупцияга қарши ички назорат бўйича ўринбосарига (маслаҳатчисига) киритади. Тасдиқланган чора-тадбирлар дастурининг ижроси ички назорат тузилмаси томонидан назорат қилинади.
3-боб. Якуний қоида
17. Мазкур Низом талабларининг бузилишида айбдор бўлган шахслар белгиланган тартибда жавобгар бўладилар.
(Қонунчилик маълумотлари миллий базаси, 19.11.2026 й., 10/26/3978/1142-сон)