Хотин-қизлар ва эркаклар учун тенг ҳуқуқ ҳамда имкониятларни таъминлаётган фуқароларнинг ўзини-ўзи бошқариш органларини эътироф этиш, бу борада фаол оммавий ахборот воситаларини кенгроқ қамраб олиш, шунингдек, «Гендер тенглик фаоли» миллий танлови Низомини янада такомиллаштириш мақсадида Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Олий Мажлиси Сенати Кенгашининг 2025 йил 16 апрелдаги КҚ-156-V-сонли Қарори билан тасдиқланган «Гендер тенглик фаоли» миллий танловини ташкил этиш ва ўтказиш тартиби тўғрисидаги низомга иловага мувофиқ ўзгартириш ва қўшимчалар киритилсин.

2. Ўзбекистон Республикаси Олий Мажлиси Сенатининг Ёшлар, хотин-қизлар, маданият ва спорт масалалари қўмитаси Ўзбекистон Республикаси Оила ва хотин-қизлар қўмитаси билан биргаликда:

«Гендер тенглик фаоли» миллий танловини ташкил этиш ва ўтказиш тартиби тўғрисидаги низомга киритилган ўзгартириш ва қўшимчаларни танлов иштирокчиларига етказиш бўйича зарур чораларни кўрсин;

республика ижро этувчи ҳокимият органлари ҳамда уларнинг ҳудудий ва туман (шаҳар) бўлинмалари, ҳокимликлар, нодавлат нотижорат ташкилотлари, тадбиркорлик субъектлари ҳамда оммавий ахборот воситалари ўртасида танловнинг мазмун-моҳияти ва аҳамиятини тарғиб қилишга қаратилган ишларни кучайтиришга алоҳида эътибор қаратсин.

3. Халқ депутатлари вилоят, туман, шаҳар Кенгашларига танлов комиссиялари таркибига депутатлар номзодини бериб бориш тавсия этилсин.

4. Ўзбекистон Республикаси Олий Мажлиси Сенати девонининг Ахборот хизмати ҳар йилнинг бошида оммавий ахборот воситалари ва Интернет жаҳон ахборот тармоғида танлов ҳақида эълон бериб борилишини таъминласин.

5. Мазкур Қарорнинг ижросини назорат қилиш Ўзбекистон Республикаси Олий Мажлиси Сенати Раисининг биринчи ўринбосари С. Сафоев зиммасига юклансин.

6. Мазкур Қарор қабул қилинган кундан эътиборан кучга киради.

Ўзбекистон Республикаси Олий Мажлис Сенати Кенгашининг 2025 йил 16 апрелдаги КҚ-156-V-сонли қарори билан тасдиқланган «Гендер тенглик фаоли» миллий танловини ташкил этиш ва ўтказиш тартиби тўғрисидаги низомга қуйидаги ўзгартириш ва қўшимчалар киритилсин:

1) 7-банднинг иккинчи хатбошисидаги «республика ижро этувчи ҳокимият органлари» деган сўзлар «Қорақалпоғистон Республикаси Жўқорғи Кенгеси, вилоятлар, туманлар ва шаҳарлар халқ депутатлари Кенгашлари депутатлари, республика ижро этувчи ҳокимият органлари» деган сўзлар билан алмаштирилсин;

2) 10-банди қуйидаги таҳрирда баён этилсин:

10. Танлов ҳар йили август — декабрь ойларида қуйидаги босқичларда ўтказилади:

биринчи босқич — август ойида туман ва шаҳарлар миқёсида;

иккинчи босқич — октябр ойида биринчи босқич ғолиблари ҳамда ҳудудий ташкилотлар ўртасида Қорақалпоғистон Республикаси, вилоятлар ва Тошкент шаҳри миқёсида;

учинчи босқич — декабрь ойида иккинчи босқич ғолиблари ҳамда республика ташкилотлари ўртасида республика миқёсида.

3) 11-банди қуйидаги таҳрирда баён этилсин:

«11. Танлов қуйидаги номинациялар бўйича ўтказилади:

«Гендер тенгликни таъминлашда энг фаол ҳудудий ташкилот»;

«Гендер тенгликни таъминлашда энг фаол республика ташкилоти»;

«Гендер тенгликни таъминлашда энг фаол ҳокимлик»;

«Гендер тенгликни таъминлашда энг фаол нодавлат нотижорат ташкилоти»;

«Гендер тенгликни таъминлашда энг фаол тадбиркорлик субъекти»;

«Гендер тенгликни тарғиб қилишда энг фаол телерадиоканал»;

«Гендер тенгликни тарғиб қилишда энг фаол босма нашр»;

«Гендер тенгликни тарғиб қилишда энг фаол интернет нашри»;

4) 12-банди чиқариб ташлансин;

5) 13 — 28-бандлари тегишинча 12 — 27-бандлари деб ҳисоблансин;

6) 12 ва 14-бандларидаги «1 — 5-иловаларидаги» деган сўзлар «1 — 7-иловаларидаги» деган сўзлар билан алмаштирилсин;

7) 1-илованинг номидан «Гендер тенгликни таъминлашда энг фаол туман (шаҳар) ташкилоти» деган сўзлар чиқариб ташлансин;

8) 5-илова қуйидаги таҳрирдаги 5 — 7-иловалар билан алмаштирилсин:

1. Телерадиоканал томонидан гендер тенглик, хотин-қизлар ҳуқуқлари ва имкониятлари мавзусида тайёрланган махсус кўрсатув, эшиттириш, репортаж ва бошқа медиа маҳсулотлар ҳамда уларнинг эфир вақтидаги улуши.

2. Материалларнинг долзарблиги, таҳлилий ёндашув мавжудлиги, холислик, журналистик стандартларга риоя қилиниши, экспертлар иштирокининг таъминланганлиги.

3. Кўрсатув ва эшиттиришларнинг томошабин ва тингловчилар орасидаги қамров даражаси, ижтимоий фикрга таъсири, аудитория фаоллиги (фикрлар, мулоҳазалар, муҳокамалар).

4. Гендер тенгликни тарғиб қилишга қаратилган миллий ва халқаро тарғибот кампанияларида (акция ва лойиҳаларда) иштирок этилганлиги.

5. Тегишли давлат органлари, нодавлат нотижорат ташкилотлар, халқаро ташкилотлар билан ҳамкорликда лойиҳа ва кўрсатувлар тайёрланганлиги.

6. Муайян материаллар, кўрсатув ёки чиқиш натижасида ижтимоий фикрнинг шаклланишига ёки муаммоларнинг ҳал этилишига таъсир даражаси».

1. Босма нашрда хотин-қизлар ҳуқуқлари, гендер тенглик ва тенг имкониятлар мавзусида мақола, интервью ва бошқа таҳлилий материаллар чоп этилганлиги.

2. Мақолаларнинг долзарблиги, муаммоларнинг чуқур таҳлил қилинганлиги, холислик, далилларга асосланганлиги ва журналистик стандартларга мувофиқлиги.

3. Материалларда соҳа мутахассислари, ҳуқуқшунослар, олимлар, психологлар фикрлари ва изоҳларидан самарали фойдаланилганлиги.

4. Жамиятдаги салбий стереотипларни йўқотиш, тенглик ғояларини шакллантиришга хизмат қилувчи материаллар мавжудлиги.

5. Хотин-қизлар, ёшлар, ижтимоий ҳимояга муҳтож қатламлар муаммоларининг ёритилганлиги ва уларга ечим таклиф этилганлиги.

6. Тегишли давлат органлари, нодавлат нотижорат ташкилотлар ва халқаро ташкилотлар билан ҳамкорликда материаллар тайёрланганлиги.

7. Материаллар орқали аҳоли хабардорлигининг оширилганлиги ва жамоатчиликда ижобий фикр шаклланишига хизмат қилганлиги».

1. Интернет нашрда хотин-қизлар ҳуқуқлари, гендер тенглик ва тенг имкониятлар масалаларига оид мақола, янгилик, таҳлилий материаллар бериб борилганлиги.

2. Материалларнинг чуқур таҳлилга асосланганлиги, холислиги, ишончли манбаларга таянилганлиги ҳамда журналистик стандартларга мувофиқлиги.

3. Гендер тенгликка оид воқеа ва жараёнларнинг тезкор ҳамда доимий равишда ёритиб борилганлиги.

4. Обуначилар ва улар томонидан сайтдаги материалларнинг кўрилганлиги сони.

5. Контентнинг ижтимоий тармоқларда тарқалиши, ёқтириш, муносабат, изоҳ ва репостлар сони.

6. Жамиятдаги салбий қарашларни бартараф этиш, тенглик маданиятини шакллантиришга хизмат қилувчи контентлар мавжудлиги.

7. Изоҳлар, сўровномалар, жонли муҳокамалар, муносабатлар орқали ўқувчилар билан мулоқот механизмининг йўлга қўйилганлиги.

8. Тегишли ташкилотлар билан ҳамкорликда лойиҳалар, материаллар ва ахборот кампанияларини амалга оширганлиги».