Qonunchilikka muvofiq, fuqarolar oliy harbiy taʼlim muassasasini tamomlagandan soʻng besh kalendar yil mobaynida ofitserlar tarkibi lavozimlarida harbiy xizmatni oʻtashi, xizmatni oʻtamagan taqdirda esa oʻqitish uchun sarflangan mablagʻlarni Davlat budjetiga qaytarishi lozimligi belgilangan.

Shu bilan birga bugungi kunda oliy harbiy taʼlim muassasalarining bitiruvchilari nafaqat harbiy xizmatchi boʻlib, balki xodim sifatida ham xizmatni oʻtash uchun boshqa vazirlik va idoralarga yuborilayotgani sababli ushbu bitiruvchilarning xodim sifatida besh kalendar yil davomida xizmatni oʻtashga majburligini qonunchilikda belgilash zarurati yuzaga kelmoqda.

Yuqoridagilarga koʻra Davlat budjetidan sarflangan mablagʻlar samarali boʻlishini taʼminlash va yosh ofitser kadrlar qoʻnimsizligining oldini olish maqsadida qaror qilaman:

1. Oʻzbekiston Respublikasi Prezidentining 2019-yil 12-sentabrdagi PQ-4447-son qarori bilan tasdiqlangan Oʻzbekiston Respublikasi fuqarolarining harbiy xizmatni oʻtash tartibi toʻgʻrisidagi nizomga ilovaga muvofiq oliy harbiy taʼlim muassasalari bitiruvchilari oʻqishni bitirgandan soʻng ofitser lavozimlarida besh kalendar yil davomida xizmatni oʻtamaganda, ulardan oʻqitish uchun sarflangan mablagʻlar undirib olinishini nazarda tutuvchi oʻzgartirish va qoʻshimcha kiritilsin.

2. Milliy gvardiya, Ichki ishlar vazirligi, Mudofaa vazirligi, Favqulodda vaziyatlar vazirligi, Davlat xavfsizlik xizmati va boshqa manfaatdor tashkilotlar:

(a) ushbu qarorning ijrosini, ijrochilarga yetkazilishini hamda mohiyati va ahamiyati shaxsiy tarkib oʻrtasida tushuntirilishini taʼminlasin;

(b) oliy harbiy taʼlim muassasalari kursantlari bilan mazkur qaror bilan kiritilayotgan oʻzgartirish va qoʻshimchaga muvofiq qoʻshimcha kontraktlar tuzsin.

3. Milliy gvardiya manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

4. Mazkur qarorning ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.

1. 304-band quyidagi tahrirda bayon etilsin:

“304. Oliy harbiy taʼlim muassasasini bitirgandan keyin oʻqishni tugatgandan soʻng tuzilgan kontrakt boʻyicha koʻzda tutilgan muddat tugamasdan yoki besh kalendar yil mobaynida ofitserlar tarkibi lavozimlarida xizmatni oʻtamasdan harbiy xizmatni (xizmatni) oʻtashdan bosh tortgan, shuningdek, kontrakt shartlarini bajarmaganligi, sodir etgan jinoyati uchun sudlanganligi sababli boʻshatilayotgan yoki bunday kontraktni tuzishdan bosh tortgan harbiy xizmatchi (xodim) Oʻzbekiston Respublikasi qonunchiligiga muvofiq uni oʻqitish uchun sarflangan budjet mablagʻlarini davlatga qoplab beradi”.

2. 3-ilovaning 2-bandi “v” kichik bandi “besh yil muddatga kontrakt tuzish” soʻzlaridan keyin “yoki besh kalendar yil davomida ofitserlar tarkibi lavozimlarida xizmatni oʻtash” soʻzlari bilan toʻldirilsin.