“Oʻzbekiston Respublikasining xalqaro shartnomalari toʻgʻrisida” Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Oʻzbekiston Respublikasining idoralararo tusdagi xalqaro shartnomalarini tuzish, bajarish, toʻxtatib turish, toʻxtatish va bekor qilishning ilova qilinayotgan Tartibi tasdiqlansin.

2. Oʻzbekiston Respublikasi vazirliklari va idoralari ushbu Tartibni bajarishga qabul qilsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari zimmasiga yuklansin.

1. Oʻzbekiston Respublikasining idoralararo tusdagi xalqaro shartnomalari ushbu shartnomalar bilan tartibga solinadigan masalalar vakolatiga kiruvchi hamda buning uchun zarur huquqqa ega boʻlgan Oʻzbekiston Respublikasi vazirliklari va idoralari nomidan xorijiy davlatlarning tegishli davlat organlari va xalqaro tashkilotlar bilan tuziladi.

2. Oʻzbekiston Respublikasining tabiatni muhofaza qilish va tabiiy resurslardan foydalanish bilan bogʻliq boʻlgan idoralararo tusdagi xalqaro shartnomalarini tuzish toʻgʻrisidagi takliflar Oʻzbekiston Respublikasi Oliy Majlisiga Oʻzbekiston Respublikasi Davlat tabiatni muhofaza qilish qoʻmitasi tomonidan, ayni bir vaqtda Oʻzbekiston Respublikasi Tashqi ishlar vazirligini xabardor qilgan holda, taqdim etiladi.

3. Oʻzbekiston Respublikasining idoralararo tusdagi xalqaro shartnomalarini tuzish toʻgʻrisidagi takliflar va ularning loyihalari Vazirlar Mahkamasiga belgilangan tartibda Oʻzbekiston Respublikasi Adliya vazirligi, Tashqi ishlar vazirligi, shuningdek boshqa manfaatdor vazirliklar va idoralar bilan kelishilgan holda quyidagi tartibda kiritiladi:

huquqiy masalalar — Tashqi ishlar vazirligi bilan;

tashqi iqtisodiy faoliyat masalalari, shu jumladan savdo-iqtisodiy va moliyaviy hamkorlik, texnikaviy yordam koʻrsatish masalalari — Tashqi iqtisodiy aloqalar vazirligi bilan;

valyuta-moliyaviy hamkorlik masalalari — Moliya vazirligi bilan;

soliq masalalari — Moliya vazirligi va Davlat soliq qoʻmitasi bilan;

bojxona masalalari — Davlat bojxona qoʻmitasi bilan;

davlat mulkini uning ixtiyoridan olish va undan foydalanish, mulkchilik huquqini eʼtirof etish va mulkchilik munosabatlarini tartibga solish masalalari — Davlat mulki qoʻmitasi bilan;

ilmiy-texnikaviy hamkorlik, shuningdek huquqiy muhofaza hamda intellektual mulk obyektlaridan foydalanish shartlari (ixtirolar, sanoat namunalari, foydali modellar, EHM uchun dasturlar va maʼlumotlar bazalari, integral sxemalar topologiyasi, “nou-xau”) masalalari — Fan va texnika davlat qoʻmitasi, Tashqi iqtisodiy aloqalar vazirligi bilan;

Havo transportida tashishlarni tashkil etish masalalari — “Oʻzbekiston havo yoʻllari” milliy aviakompaniyasi bilan;

aloqa va telekommunikatsiyalar sohasidagi masalalar — Oʻzbekiston pochta va telekommunikatsiyalar agentligi bilan;

temir yoʻl transportida tashishlarni tashkil etish masalalari — “Oʻzbekiston temir yoʻllari” davlat-aksiyadorlik kompaniyasi bilan;

avtomobil va daryo transportida tashishlarni tashkil etish masalalari — “Oʻzavtotrans” davlat-aksiyadorlik korporatsiyasi bilan;

turizm va turistik faoliyat sohasidagi masalalar — “Oʻzbek-turizm” milliy kompaniyasi bilan;

badiiy jamoalar, guruhlar, alohida ijrochilarning konsert faoliyati, shuningdek tasviriy, dekorativ-amaliy sanʼat asarlarini respublikadan chetga chiqarish, tarix va madaniyat yodgorliklarini chet ellarda vaqtinchalik namoyish qilish masalalari — Madaniyat ishlari vazirligi bilan;

tabiatni muhofaza qilish va tibbiy resurslardan foydalanish masalalari — Davlat tabiatni muhofaza qilish qoʻmitasi bilan;

sogʻliqni saqlash masalalari — Sogʻliqni saqlash vazirligi bilan;

standartlash, metrologiya, sertifikatlash va mahsulot sifatini boshqarish masalalari — Oʻzbekiston Respublikasi Vazirlar Mahkamasi huzuridagi Oʻzbekiston davlat standartlash, metrologiya va sertifikatsiya markazi bilan kelishiladi.

4. Oʻzbekiston Respublikasining idoralararo tusdagi xalqaro shartnomasini tuzish toʻgʻrisidagi taklifda shartnoma loyihasi boʻlishi, uni tuzishning maqsadga muvofiqligi asoslanishi, shuningdek, zarurat boʻlganda, shartnomani tuzishning moliyaviy-iqtisodiy va ijtimoiy oqibatlari baholanishi kerak.

5. Oʻzbekiston Respublikasining idoralararo tusdagi xalqaro shartnomalarini tuzish toʻgʻrisidagi qaror Oʻzbekiston Respublikasi Vazirlar Mahkamasi tomonidan qabul qilinadi.

Oʻzbekiston Respublikasining tabiatni muhofaza qilish va tabiiy resurslardan foydalanish bilan bogʻliq boʻlgan idoralararo tusdagi xalqaro shartnomalarini tuzish toʻgʻrisidagi qaror belgilangan tartibda Oʻzbekiston Respublikasi Oliy Majlisi tomonidan qabul qilinadi.

Idoralararo shartnomalar bilan tartibga solib boriladigan masalalar vakolatiga kiruvchi vazirliklar va idoralarning rahbarlari Oʻzbekiston Respublikasi Vazirlar Mahkamasining koʻrsatib oʻtilgan qarori asosida, Oʻzbekiston Respublikasi Tashqi ishlar vazirligi bilan kelishilgan holda, muzokaralar oʻtkazish va Oʻzbekiston Respublikasining idoralararo tusdagi xalqaro shartnomalarini imzolash toʻgʻrisida qarorlar qabul qiladilar.

6. Vazirliklar va idoralarning rahbarlari vazirliklar va idoralar toʻgʻrisidagi Nizom bilan belgilangan vakolatlar doirasida, maxsus vakolatlarsiz muzokaralar olib boradilar va idoralararo shartnomalarni imzolaydilar, Vazirlik yoki idora rahbari muzokaralar olib borish va idoralararo shartnomani imzolash vakolatini yozma shaklda oʻz oʻrinbosariga berishga haqlidir.

7. Oʻzbekiston Respublikasining idoralararo tusdagi xalqaro shartnomalarini ularning tasdiqlangandan (qabul qilingandan) keyin kuchga kirishini nazarda tutuvchi tasdiqlash (qabul qilish) Oʻzbekiston Respublikasining bunday shartnomalar oʻzlarining nomidan imzolangan vazirliklar va idoralar tomonidan amalga oshiriladi.

8. Oʻzbekiston Respublikasining idoralararo tusdagi xalqaro shartnomalarga qoʻshilishi toʻgʻrisidagi qaror ushbu Tartib 5-bandining birinchi xatboshida nazarda tutilgan tartibda qabul qilinadi.

9. Oʻzbekiston Respublikasining idoralararo tusdagi xalqaro shartnomalariga vazirliklar va idoralar tomonidan Oʻzbekiston Respublikasi qonun hujjatlariga va xalqaro huquq normalariga muvofiq soʻzsiz rioya qilinishi kerak.

10. Oʻzbekiston Respublikasining idoralararo tusdagi xalqaro shartnomalari bilan tartibga solib boriladigan masalalar vakolatiga kiruvchi Oʻzbekiston Respublikasi vazirliklari va idoralari shartnoma boʻyicha Oʻzbekiston tomoni qabul qilgan majburiyatlarning bajarilishini taʼminlaydilar, bunday shartnomalardan kelib chiqadigan Oʻzbekiston tomoniga tegishli huquqlarining amalga oshirilishini hamda shartnomalarning boshqa qatnashchilari tomonidan ular majburiyatlarining bajarilishini kuzatib boradilar.

11. Oʻzbekiston Respublikasi vazirliklari va idoralari idoralararo shartnomalar boʻyicha majburiyatlarning qanday bajarilayotgani haqida Oʻzbekiston Respublikasi Vazirlar Mahkamasini har yili kamida bir marta xabardor qilib turadilar.

12. Oʻzbekiston Respublikasining idoralararo tusdagi xalqaro shartnomalari boʻyicha majburiyatlar uning boshqa qatnashchilari tomonidan buzilgan taqdirda Oʻzbekiston Respublikasining bunday shartnomalar oʻzlarining nomidan tuzilgan tegishli vazirliklari va idoralari, Oʻzbekiston Respublikasi Tashqi ishlar vazirligi bilan kelishilgan holda, Oʻzbekiston Respublikasi Vazirlar Mahkamasiga xalqaro huquq normalariga muvofiq zarur chora-tadbirlar koʻrish toʻgʻrisida takliflar taqdim etadilar.

13. Oʻzbekiston Respublikasining roʻyxatdan oʻtkazish kerakligi eʼtirof etilgan idoralararo tusdagi xalqaro shartnomalarini roʻyxatdan oʻtkazish Oʻzbekiston Respublikasining bunday shartnomalar oʻzlarining nomidan tuzilgan vazirliklari va idoralari tomonidan tegishli xalqaro tashkilotlarda, ushbu tashkilotlarning amaldagi qoidalariga muvofiq, amalga oshiriladi.

14. Oʻzbekiston Respublikasining idoralararo tusdagi xalqaro shartnomalarining amalda boʻlishini toʻxtatib turish yoki bekor qilish Oʻzbekiston Respublikasining bunday shartnomalar oʻzlarining nomidan tuzilgan vazirliklari va idoralari tomonidan, Oʻzbekiston Respublikasi Tashqi ishlar vazirligi bilan, shuningdek, ushbu Tartibning 3-bandida koʻrsatilgan vazirliklar va idoralar bilan kelishilgan holda hamda shartnomani tuzish toʻgʻrisida qaror qabul qilgan organning ruxsati bilan amalga oshiriladi.

15. Idoralararo tusdagi xalqaro shartnomalarning amalda boʻlishini toʻxtatish, ushbu shartnomalar qoidalariga muvofiq, boshqa ahdlashuvchi tomonlar bilan maslahatlashuvlar asosida ham amalga oshirilishi mumkin.

16. Idoralararo shartnomalarning asl nusxalari tegishli vazirliklar va idoralarning arxivlarida saqlanadi, ushbu shartnomalarning tasdiqlangan nusxalari esa ular imzolangan (tasdiqlangan nusxalari, rasmiy tarjimalari depozitariydan olingan) kundan boshlab ikki hafta muddatda Oʻzbekiston Respublikasi Tashqi ishlar vazirligiga va ushbu Tartibning 3-bandiga binoan kelishilgan organlarga joʻnatiladi.

17. Oʻzbekiston Respublikasi uchun kuchga kirgan idoralararo tusdagi xalqaro shartnomalar Oʻzbekiston Respublikasining bunday shartnomalarni tuzgan vazirliklari va idoralari qaroriga koʻra, Oʻzbekiston Respublikasi Tashqi ishlar vazirligi bilan kelishgan holda, belgilangan tartibda idora nashrlarida eʼlon qilinadi.

Idoralararo tusdagi xalqaro shartnomani imzolash toʻgʻrisida qaror qabul qilgan organning taqdimnomasi boʻyicha ushbu shartnoma belgilangan tartibda Oʻzbekiston Respublikasi ommaviy axborot vositalarida eʼlon qilinishi mumkin.