O‘zbekiston Respublikasi Prezidentining “Respublikaga xorijiy turistlar oqimini keskin oshirish hamda ichki turizmni yanada jadallashtirish chora-tadbirlari to‘g‘risida” 2024-yil 12-yanvardagi PF-9-son Farmoni ijrosini ta’minlash hamda turizm sohasini raqamlashtirish maqsadida Vazirlar Mahkamasi qaror qiladi:

1. O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi hamda Raqamli texnologiyalar vazirligining xorijiy va mahalliy sayyohlar uchun qulaylik yaratish maqsadida masofadan turib joylashtirish vositalarini band qilish, turoperator hamda turagentlar tomonidan taklif etilayotgan xizmatlar, avtotransport vositalari ijarasi, gid-tarjimon va taksi xizmatlari hamda turizm sohasidagi boshqa xizmatlardan foydalanish imkoniyatini taqdim etuvchi Milliy turizm yagona platformasini (keyingi o‘rinlarda — platforma) ishga tushirish to‘g‘risidagi taklifiga rozilik berilsin.

2. O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi Raqamli texnologiyalar vazirligi hamda boshqa manfaatdor vazirlik va idoralar bilan birgalikda quyidagilarni amalga oshirish imkonini beruvchi platformani 2025-yil 1-sentabrdan boshlab sinov tariqasida, 2025-yil 1-dekabrdan boshlab to‘liq ishga tushirilishini ta’minlasin:

sayyohlarga joylashtirish vositalarini onlayn band qilish va sayyohlar tomonidan baholash;

respublikadagi turoperatorlar va turagentlar xizmatlari, shu jumladan, sayyohlarga gid, gid-tarjimon, yo‘riqchi-yo‘l boshlovchi, ekskursiya yetakchilari xizmatlaridan foydalanish;

yo‘nalishsiz taksi va avtotransport vositalari ijarasi xizmatlaridan foydalanish;

avtobus, avia va temir yo‘l chiptalari, madaniy meros obyektlari, muzeylar va boshqa diqqatga sazovor joylarga kirish chiptalarini xarid qilish;

xalqaro va milliy to‘lov tizimlari orqali turistik xizmatlar uchun to‘lovlarni amalga oshirish;

turizm sohasiga oid statistik hisobotlarni yuritish va real vaqt rejimida tahlil qilish.

3. Belgilansinki:

O‘zbekiston Respublikasi Turizm qo‘mitasi (keyingi o‘rinlarda — Turizm qo‘mitasi) platformani ishlab chiqish va joriy etish bo‘yicha buyurtmachi hisoblanadi;

platforma operatori qonunchilikda belgilangan tartibda xarid qilish tartib-tamoyillari natijalariga ko‘ra tanlab olinadi;

platformani ishlab chiqish, texnik qo‘llab-quvvatlash va takomillashtirib borish Turizm qo‘mitasi huzuridagi budjetdan tashqari Turizmni qo‘llab-quvvatlash jamg‘armasi mablag‘lari hisobidan amalga oshiriladi;

platformada joylashtiriladigan ma’lumotlar bazasi mutasaddi vazirlik va idoralarga tegishli axborot tizimlari va ma’lumotlar bazasi bilan integratsiyalashgan holda yuritiladi;

jismoniy va yuridik shaxslar o‘z xohishiga kura platformaga ulanishi va unda xizmatlarni joriy etishi mumkin;

platforma operatori tomonidan platforma ma’lumotlarining 14 ta xorijiy tilga tarjimasi ta’minlab boriladi.

4. Platformaning uzluksiz va samarali faoliyat ko‘rsatishini ta’minlash maqsadida Turizm qo‘mitasi:

a) O‘zbekiston Respublikasi Transport vazirligi bilan birgalikda “Uztrans” yagona interaktiv axborot tizimi, shuningdek, “O‘zbekiston temir yo‘llari” AJ, “Uzbekistan airways” AJ va boshqa yo‘lovchi tashish litsenziyasiga ega tashkilotlarning elektron chiptalarni xarid qilish tizimlari;

O‘zbekiston Respublikasi Madaniyat vazirligi hamda Madaniy meros agentligi bilan birgalikda madaniyat tashkilotlari, shu jumladan, madaniy meros obyektlari, muzeylar va boshqa diqqatga sazovor joylarga kirish chiptalarini xarid qilish tizimlari;

Soliq qo‘mitasi bilan birgalikda platformani Marketpleys reyestriga kiritgan holda Soliq qo‘mitasining tegishli axborot tizimlari bilan integratsiya qilinishini;

b) platformani ishlab chiqish va ishga tushirish hamda uni keyinchalik texnik qo‘llab-quvvatlash bo‘yicha texnik hujjatlarning ishlab chiqilishini hamda vakolatli organlarda ekspertizadan o‘tkazilishini;

joylashtirish vositalari, turoperator va turagentlar, gid (gid-tarjimon), yo‘riqchi-yo‘l boshlovchi va ekskursiya yetakchilari platforma orqali o‘z xizmatlarini yo‘lga qo‘yishlari uchun barcha sharoitlar yaratilishini;

platformani modernizatsiya qilish hamda uning uzluksiz faoliyat ko‘rsatishini;

turizm sohasi subyektlari hamda aholi o‘rtasida platforma imkoniyatlarini doimiy targ‘ib qilib borishni ta’minlasin.

5. Mazkur qarorning bajarilishini nazorat qilish O‘zbekiston Respublikasi ekologiya, atrof-muhitni muhofaza qilish va iqlim o‘zgarishi vaziri A.A. Abduxakimov zimmasiga yuklansin.