Meva-sabzavot mahsulotlarining eksport narxlarini sun’iy pasaytirib ko‘rsatish holatlarining oldini olish, valyuta tushumlari o‘z vaqtida va to‘liq ta’minlanishini nazorat qilish hamda ushbu sohada yashirin iqtisodiyot ulushini keskin qisqartirish maqsadida Vazirlar Mahkamasi qaror qiladi:

1. Meva-sabzavot mahsulotlariga eksport narxlari shakllantirilishi ustidan nazoratni ta’minlash maqsadida 2024-yil 1-maydan boshlab belgilangan tartibda tasdiqlangan ro‘yxat bo‘yicha respublikadan eksport qilinadigan meva-sabzavot mahsulotlari bo‘yicha shartnomalar qiymatini monitoring qilish va eksport narxlari shakllantirilishi ustidan nazorat o‘rnatish tartibi joriy etilsin.

2. Belgilansinki, minimal eksport narxlari belgilanadigan meva-sabzavot mahsulotlari ro‘yxati (keyingi o‘rinlarda — ro‘yxat) Savdo-sanoat palatasi, Qishloq xo‘jaligi vazirligi huzuridagi O‘simliklar karantini va himoyasi agentligi hamda Investitsiyalar, sanoat va savdo vazirligi takliflariga asosan Investitsiyalarni jalb qilish, sanoatni rivojlantirish va savdoni tartibga solish bo‘yicha Hukumat komissiyasi tomonidan tasdiqlanadi.

Bunda Savdo-sanoat palatasiga Qishloq xo‘jaligi vazirligi huzuridagi O‘simliklar karantini va himoyasi agentligi hamda Investitsiyalar, sanoat va savdo vazirligi bilan birgalikda belgilangan tartibda tasdiqlangan ro‘yxatga kiritilgan meva-sabzavot mahsulotlari bo‘yicha minimal eksport narxlarini belgilash vakolati berilsin.

3. Shunday tartib o‘rnatilsinki, unga muvofiq:

a) Savdo-sanoat palatasi Qishloq xo‘jaligi vazirligi huzuridagi O‘simliklar karantini va himoyasi agentligi hamda Investitsiyalar, sanoat va savdo vazirligi bilan birgalikda doimiy ravishda meva-sabzavot mahsulotlari bo‘yicha ichki va tashqi bozor konyunkturasini o‘rganib boradi hamda har haftada respublikadagi yirik ulgurji bozorlarda shakllangan meva-sabzavotlarning eng past narxlari asosida ro‘yxatda ko‘rsatilgan meva-sabzavot mahsulotlariga minimal eksport narxlarini tasdiqlaydi.

Bunda zarur hollarda ichki va tashqi bozor konyunkturasida bo‘lgan o‘zgarishlardan kelib chiqqan holda, minimal eksport narxlari har kuni e’lon qilib borilishi mumkin;

b) Savdo-sanoat palatasi har hafta (zarur hollarda har kuni) meva-sabzavot mahsulotlari uchun minimal eksport narxlari Tashqi savdo operatsiyalarining yagona elektron axborot tizimiga kiritilishini ta’minlaydi, Palataning hamda Qishloq xo‘jaligi vazirligi huzuridagi O‘simliklar karantini va himoyasi agentligining rasmiy veb-saytlarida ularni e’lon qilib boradi.

Bunda meva-sabzavot mahsulotlariga minimal eksport narxlari Savdo-sanoat palatasining hamda Qishloq xo‘jaligi vazirligi huzuridagi O‘simliklar karantini va himoyasi agentligining rasmiy veb-saytlarida e’lon qilingan kundan 2 ish kuni o‘tgach amalga kiritiladi;

v) meva-sabzavot mahsulotlarining eksport narxi minimal eksport narxlaridan pasaytirib ko‘rsatilganligi aniqlaganda, Iqtisodiyot va moliya vazirligi huzuridagi Bojxona qo‘mitasi tomonidan ushbu holat bo‘yicha yigirma to‘rt soat ichida elektron axborot almashinuvi tizimi orqali Vazirlar Mahkamasi huzuridagi Soliq qo‘mitasi hamda Bosh prokuratura huzuridagi Iqtisodiy jinoyatlarga qarshi kurashish departamentiga xabar beriladi.

Soliq qo‘mitasi va Bosh prokuratura huzuridagi Iqtisodiy jinoyatlarga qarshi kurashish departamenti tomonidan aniqlangan dalillar yuzasidan qonunchilik hujjatlariga muvofiq choralar ko‘rib boriladi.

4. Iqtisodiyot va moliya vazirligi huzuridagi Bojxona qo‘mitasi (A. Mavlonov) Qishloq xo‘jaligi vazirligi huzuridagi O‘simliklar karantini va himoyasi agentligi (I. Ergashev) bilan birgalikda bir oy muddatda bojxona xizmati organlarining tegishli axborot tizimlarini Qishloq xo‘jaligi vazirligi huzuridagi O‘simliklar karantini va himoyasi agentligining axborot tizimlari bilan o‘zaro integratsiya qilish choralarini ko‘rsin.

5. Savdo-sanoat palatasi (D. Vahobov) Qishloq xo‘jaligi vazirligi huzuridagi O‘simliklar karantini va himoyasi agentligi (I. Ergashev) hamda manfaatdor vazirlik va idoralar bilan birgalikda:

uch kun muddatda ushbu qaror bilan joriy etilayotgan yangi tizimning mazmun-mohiyati va ahamiyatini yoritish bo‘yicha tadbirkorlik subyektlari, shu jumladan meva-sabzavot mahsulotlarining eksporti bilan shug‘ullanuvchi tadbirkorlik subyektlari ishtirokida brifing tashkil etsin;

bir oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga taklif kiritsin.

6. Savdo-sanoat palatasi raisi D. Vahobov hamda Qishloq xo‘jaligi vazirligi huzuridagi O‘simliklar karantini va himoyasi agentligi direktori I. Ergashev hamda investitsiyalar, sanoat va savdo vaziri L. Kudratov mazkur qaror bilan joriy etilayotgan yangi tizimning samarali faoliyati uchun mas’ul va shaxsan javobgar etib belgilansin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari J.A. Xodjayev zimmasiga yuklansin.