Tashqi iqtisodiy aloqalarni keng rivojlantirish va chuqurlashtirish, xorijiy investitsiyalarni jalb etishni faollashtirish va xorijiy sarmoyadorlarga ishonchli kafolatlarni taʼminlash, tashqi savdoni yanada erkinlashtirish, mamlakatimiz tovar ishlab chiqaruvchilari bilan chet el firmalari oʻrtasidagi uzoq muddatli barqaror sheriklik munosabatlarini shakllantirish maqsadida:

1. Oʻzbekiston Respublikasi Tashqi iqtisodiy aloqalar agentligi Oʻzbekiston Respublikasi Tashqi iqtisodiy aloqalar, investitsiyalar va savdo vazirligi etib qayta tashkil qilinsin.

2. Quyidagilar Tashqi iqtisodiy aloqalar, investitsiyalar va savdo vazirligining asosiy vazifalari etib belgilansin:

tashqi iqtisodiy faoliyat, eksportni ragʻbatlantirish, xorijiy investitsiyalar jalb etish, tashqi savdoni erkinlashtirish, tashqi savdo aloqalarini kengaytirish va mustahkamlash sohasida yagona davlat siyosati oʻtkazilishini taʼminlash;

jahon tovarlar (kapitallar, xizmatlar) bozorlarining kompleks marketing tadqiqotlarini amalga oshirish, ichki va tashqi bozorlar istiqbollarini hamda samaradorligini hisobga olgan holda ularning ahvolini chuqur tahlil etish va rivojlanishini prognoz qilish, xorijiy sheriklar bilan uzoq muddatli, barqaror savdo-iqtisodiy munosabatlarni oʻrnatishga qaratilgan chora-tadbirlar ishlab chiqish va amalga oshirish;

iqtisodiyotni rivojlantirish va raqobatbardoshligini oshirish hamda uning jahon iqtisodiy tizimiga integratsiyalashuvi boʻyicha amaliy chora-tadbirlar ishlab chiqish va amalga oshirish, respublikaning eksport salohiyatini rivojlantirish dasturlarini roʻyobga chiqarishga koʻmaklashish, mamlakatimiz tashqi iqtisodiy faoliyat subyektlarining huquq va manfaatlarini taʼminlash;

Oʻzbekiston Respublikasining xorijiy davlatlar, xalqaro iqtisodiy va moliyaviy institutlar, boshqa xalqaro huquq subyektlari bilan oʻzaro manfaatli asosda iqtisodiy va moliyaviy hamkorligini rivojlantirishni taʼminlash;

qulay investitsiya muhitini shakllantirishga va respublika iqtisodiyotiga xorijiy investitsiyalar jalb etilishiga koʻmaklashish, investitsiya loyihalari roʻyobga chiqarilishi monitoringini amalga oshirish, xorijiy investorlarga zarur axborot yordami koʻrsatish.

3. Ixtisoslashtirilgan tashqi savdo kompaniyalari faoliyatini muvofiqlashtirish hamda ular faoliyati samaradorligini oshirish masalalari Tashqi iqtisodiy aloqalar, investitsiyalar va savdo vazirligi zimmasiga yuklansin.

4. Qoraqalpogʻiston Respublikasi Tashqi iqtisodiy aloqalar agentligi Qoraqalpogʻiston Respublikasi Tashqi iqtisodiy aloqalar, investitsiyalar va savdo vazirligi etib;

Agentlikning viloyatlar va Toshkent shahridagi tashqi iqtisodiy aloqalar boʻyicha boshqarmalari viloyatlar va Toshkent shahridagi tashqi iqtisodiy aloqalar, investitsiyalar va savdo boshqarmalari etib qayta tashkil qilinsin.

5. Belgilab qoʻyilsinki, Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Qoraqalpogʻiston Respublikasi Tashqi iqtisodiy aloqalar, investitsiyalar va savdo vazirligi hamda viloyatlar va Toshkent shahridagi hududiy tashqi iqtisodiy aloqalar, investitsiyalar va savdo boshqarmalari tegishli ravishda Oʻzbekiston Respublikasi Tashqi iqtisodiy aloqalar agentligi, Qoraqalpogʻiston Respublikasi Tashqi iqtisodiy aloqalar agentligi hamda agentlik mintaqaviy boshqarmalarining huquq va majburiyatlari boʻyicha huquqiy voris hisoblanadilar.

6. Quyidagilar:

Oʻzbekiston Respublikasi Vazirlar Mahkamasi huzuridagi xorijiy investitsiyalar va kreditlar masalalari boʻyicha idoralararo kengash;

eksport salohiyatini rivojlantirishni ragʻbatlantirish boʻyicha Respublika kengashi tugatilsin.

Tugatilayotgan kengashlarning vazifalari Oʻzbekiston Respublikasi Tashqi iqtisodiy aloqalar, investitsiyalar va savdo vazirligi zimmasiga yuklansin.

7. Oʻzbekiston Respublikasi Prezidentining 2002-yil 21-oktabrdagi “Tashqi iqtisodiy aloqalar sohasida boshqaruv tizimini yanada erkinlashtirish va takomillashtirish toʻgʻrisida”gi PF-3151-sonli Farmoni oʻz kuchini yoʻqotgan deb hisoblansin.

8. Oʻzbekiston Respublikasi Adliya vazirligi manfaatdor idoralar bilan birgalikda bir oy muddatda amaldagi qonun hujjatlariga ushbu Farmondan kelib chiqadigan oʻzgartish va qoʻshimchalar kiritish toʻgʻrisidagi takliflarni Vazirlar Mahkamasiga taqdim etsin.

9. Oʻzbekiston Respublikasi Vazirlar Mahkamasi bir hafta muddatda Oʻzbekiston Respublikasi Tashqi iqtisodiy aloqalar, investitsiyalar va savdo vazirligini tashkil etish hamda uning faoliyati masalalari boʻyicha hukumat qarorini qabul qilsin.