Samarqand viloyatiga xorijiy va mahalliy turistlar oqimini koʻpaytirish, yangi turizm infratuzilmasi obyektlari salohiyatidan samarali foydalanish uchun zarur shart-sharoitlarni yaratish, shuningdek, yangidan modernizatsiya qilingan Samarqand xalqaro aeroportida xorijiy aviatashuvchi kompaniyalar uchun barcha imkoniyatlarni yaratish, hududning transport-logistika tizimini rivojlantirish, koʻrsatilayotgan xizmatlar sifatini yanada yaxshilash va diversifikatsiya qilish maqsadida:

1. 2021-yil 30-noyabr — 3-dekabr kunlari Ispaniya Qirolligining Madrid shahrida boʻlib oʻtgan BMTning Butunjahon turizm tashkiloti Bosh Assambleyasining 24-sessiyasida 2023-yilda Bosh Assambleyaning navbatdagi 25-sessiyasini Samarqand shahrida oʻtkazish belgilanganligi maʼlumot uchun qabul qilinsin.

2. Turizm va madaniy meros vazirligi, Transport vazirligi, Iqtisodiy taraqqiyot va kambagʻallikni qisqartirish vazirligi, Samarqand viloyati hokimligi hamda “Hunarmand” uyushmasining:

respublika hududlarida va xorijiy mamlakatlarda Samarqandning turizm salohiyati hamda Samarqand xalqaro aeroporti (keyingi oʻrinlarda — Aeroport) imkoniyatlarini namoyish etuvchi “Samarqand — Yangi Oʻzbekistonning turizm darvozasi” targʻibot kampaniyasini yoʻlga qoʻyish;

Samarqand viloyatini avia, temir yoʻl va avtomobil transporti bilan bogʻlangan hamda Aeroportni respublika hududlari bilan bogʻlash imkonini beruvchi yirik transport-logistika xabiga aylantirish;

Aeroportda xorijiy aviatashuvchilar uchun muqobil joylashtirish (bazirovka) tizimini joriy qilish;

Samarqand viloyatidagi turistik obyektlarning faoliyatini qoʻshimcha qoʻllab-quvvatlash tizimini yoʻlga qoʻyish toʻgʻrisidagi takliflari maʼqullansin.

3. Belgilab qoʻyilsinki:

a) Aeroportda:

2030-yil 1-yanvarga qadar xorijiy aviakompaniyalarning parvozlarini amalga oshirish uchun Aeroportni boshqarish boʻyicha xususiy sherik (keyingi oʻrinlarda — xususiy sherik) ham ruxsatnoma olish uchun Transport vazirligi huzuridagi Fuqaro aviatsiyasi agentligiga iltimosnoma bilan murojaat qiladi;

uchish uchun ruxsatnomani berish masalasi Transport vazirligi huzuridagi Fuqaro aviatsiyasi agentligi tomonidan aviaqatnovlarni amalga oshirish uchun xorijiy aviakompaniyalar tomonidan taqdim etilgan hujjatlar topshirilgan kundan boshlab koʻpi bilan 96 soat davomida, charter parvozlar uchun esa 24 soat davomida koʻrib chiqiladi;

turistlarga xizmat koʻrsatish uchun turizm axborot markazlari tashkil etiladi;

b) Oʻzbekiston Respublikasi Prezidentining 2021-yil 30-apreldagi “Fuqaro aviatsiyasi korxonalarini transformatsiya qilish va qoʻllab-quvvatlash chora-tadbirlari toʻgʻrisida”gi PQ-5100-son qarori 12-bandi qoidalari xususiy sherikka ham tatbiq etiladi;

v) 2026-yil 1-yanvarga qadar tadbirkorlik subyektlari:

belgilangan tartibda shakllantiriladigan roʻyxatlarga asosan 4 yulduzli va undan yuqori toifaga ega boʻlgan mehmonxonani tashkil qilish va/yoki faoliyatini amalga oshirish uchun asbob-uskunalar, maxsus texnikalar, yoqilgʻi-moylash materiallari, butlovchi buyumlar, ehtiyot qismlari, xomashyo va materiallar, oʻsimliklar, mebel, inventarlar va boshqa zarur boʻlgan tovarlarni olib kirganda bojxona bojini toʻlashdan;

Samarqand turistik markazi hududida obyektlarni qurish uchun “vaqtincha olib kirish” bojxona rejimiga olib kiriladigan maxsus texnikalar, mexanizmlar va texnologik uskunalar uchun davriy bojxona toʻlovlarini toʻlashdan ozod etiladi.

4. Samarqand viloyatining Payariq, Samarqand va Toyloq tumanlari Oʻzbekiston Respublikasi Prezidentining 2022-yil 27-yanvardagi PQ-104-son qarori bilan tasdiqlangan Mehmonxona (joylashtirish), savdo, umumiy ovqatlanish, koʻngilochar, turoperator va turagent xizmatlarini koʻrsatayotgan tadbirkorlik subyektlari uchun maxsus soliq rejimi joriy etiladigan tuman va shaharlar roʻyxatiga kiritilsin.

Xalq deputatlari Samarqand viloyati Kengashiga Turizm va madaniy meros vazirligi hamda Iqtisodiy taraqqiyot va kambagʻallikni qisqartirish vazirligining hududiy bosh boshqarmalari xulosalari asosida Payariq, Samarqand va Toyloq tumanlarida turistik zona chegaralarini belgilash tavsiya etilsin.

5. Turizm va madaniy meros vazirligi uch oy muddatda:

2023-yilda Samarqand shahrida Butunjahon turizm tashkiloti Bosh Assambleyasining 25-sessiyasini (keyingi oʻrinlarda — Bosh Assambleya 25-sessiyasi) yuqori saviyada tashkil etish va oʻtkazishni;

“Samarqand — Yangi Oʻzbekistonning turizm darvozasi” targʻibot kampaniyasini tashkil etish va Butunjahon turizm tashkiloti bilan kelishuv asosida Bosh Assambleya 25-sessiyasining logotipini ishlab chiqishni;

2023-yilda Samarqand shahrida oʻtkaziladigan tadbirlar va anjumanlar grafigini hamda 2024-yilda Xiva shahri “Islom dunyosining turizm poytaxti” hamda Shahrisabz shahri “Iqtisodiy hamkorlik tashkiloti turizm poytaxti” maqomini olganligi munosabati bilan oʻtkaziladigan chora-tadbirlar rejasini tasdiqlashni nazarda tutuvchi qaror loyihalarini ishlab chiqsin va Vazirlar Mahkamasiga kiritsin.

Belgilansinki:

Bosh Assambleya 25-sessiyasini oʻtkazish bilan bogʻliq xarajatlar Vazirlar Mahkamasining zaxira jamgʻarmasi mablagʻlari;

“Samarqand — Yangi Oʻzbekistonning turizm darvozasi” targʻibot kampaniyasini tashkil etish va Bosh Assambleya 25-sessiyasining logotipini tayyorlash bilan bogʻliq xarajatlar Davlat budjetidan Turizm va madaniy meros vazirligi huzuridagi budjetdan tashqari Turizmni qoʻllab-quvvatlash jamgʻarmasiga ajratiladigan mablagʻlar hisobidan amalga oshiriladi.

6. Turizm va madaniy meros vazirligi Transport vazirligi va “Uzbekistan Airports” AJ bilan birgalikda 2023-yilning birinchi choragida ixtisoslashtirilgan kompaniyalarni jalb qilgan holda Samarqand shahrida “Aviation & Logistics Forum” II xalqaro aviatsiya forumining oʻtkazilishini taʼminlasin.

7. “Uzbekistan Airports” AJ xususiy sherik bilan birgalikda bir hafta muddatda slotlarni tasdiqlash toʻgʻrisidagi reglamentni ishlab chiqib, tasdiqlasin. Bunda, aviakompaniyalarning parvozlarni amalga oshirishni rejalashtirish uchun arizalari (soʻrovlari) “Uzbekistan Airports” AJ tomonidan xususiy sherik bilan kelishilgandan soʻng vakolatli organga taqdim etilishi tartibi nazarda tutilsin.

8. Turizm va madaniy meros vazirligi Davlat bojxona qoʻmitasi bilan birgalikda ikki oy muddatda Samarqand turistik markazi hududida chet ellik shaxslar uchun boj olinmaydigan savdo doʻkonlarini tashkil etishni taʼminlasin.

9. Turizm va madaniy meros vazirligi Madaniyat vazirligi, Moliya vazirligi va Samarqand viloyati hokimligi bilan birgalikda ikki oy muddatda Samarqand turistik markazi hududida muzeylar, galereyalar, madaniy-tomosha hamda madaniy-maʼrifiy tashkilotlar hamda turistlarni jalb qiladigan boshqa koʻngilochar va sport maskanlarini tashkil etish yuzasidan Oʻzbekiston Respublikasi Prezident Administratsiyasiga taklif kiritsin.

10. Transport vazirligi:

a) 2023-yil 1-sentabrga qadar tadbirkorlik subyektlari va investorlarni jalb qilgan holda shaharlararo va xalqaro yoʻnalishlarda avtobus (mikroavtobus) qatnovlarini axborot texnologiyalari orqali yoʻlga qoʻyishga qaratilgan tizimni yaratsin. Bunda, shaharlararo va xalqaro yoʻnalishlarda avtobus (mikroavtobus) qatnovlari tizimida:

chiptalarni “Uzbus” platformasida xarid qilish tartibi;

aholining xavfsizligini taʼminlash hamda mavjud shaharlararo va xalqaro yoʻnalishlar boʻyicha avtobuslarning oʻz vaqtida harakatlanayotganini monitoring qilish maqsadida avtobuslarga GPS qurilmalarini oʻrnatish hamda monitoring qilish boʻyicha yagona platformani yaratish nazarda tutilsin;

b) “Uzbekistan airways” AJ bilan birgalikda 2023-yil 1-yanvarga qadar yuridik shaxslar tomonidan shaxsiy kabinet orqali guruh yoʻl hujjatlarini rasmiylashtirish hamda mobil ilovalar orqali chiptalar mavjudligini kuzatish va onlayn bron qilish imkoniyatini nazarda tutgan holda aviachiptalar onlayn savdosi hajmini oshirish choralarini koʻrsin;

v) “Uzbekistan Airports” AJ va xususiy sherik bilan birgalikda Aeroportda aviatashuvchilar uchun muqobil joylashtirish tizimini joriy qilish choralarini koʻrsin;

g) Turizm va madaniy meros vazirligi hamda Tashqi ishlar vazirligi bilan birgalikda bir oy muddatda ziyorat turizmini rivojlantirish va turistlar sonini maqsadli koʻrsatkichlarda belgilangan miqdorlarga yetkazish uchun Indoneziya, Malayziya, Yaponiya, Bangladesh mamlakatlaridan kelayotgan turistlarni jalb etish maqsadida xorijiy va uchinchi davlat aviakompaniyalari tomonidan xalqaro aeroportlarda joriy etilgan “Ochiq osmon” rejimi doirasida aviaparvozlarni amalga oshirishni nazarda tutuvchi qaror loyihasini ishlab chiqib, Vazirlar Mahkamasiga kiritsin.

11. Turizm va madaniy meros vazirligi:

Vazirlar Mahkamasi huzuridagi Din ishlari boʻyicha qoʻmita, Transport vazirligi va Tashqi ishlar vazirligi bilan birgalikda ziyorat turizmi dasturi boʻyicha xorijiy aviakompaniyalarni keng jalb qilish;

“Uzbekistan Airports” AJ va xususiy sherik bilan birgalikda 2023-yil 1-fevralga qadar Aeroportda turizm axborot markazini tashkil qilish choralarini koʻrsin.

12. Investitsiyalar va tashqi savdo vazirligi huzuridagi Tarif va notarif tartibga solish kengashi (J. Xodjayev) ikki hafta muddatda import qilinadigan alkogol mahsulotlari uchun belgilangan bojxona toʻlovlari stavkalarini qayta koʻrib chiqib, taklif kiritsin.

13. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga ilovaga muvofiq oʻzgartirish va qoʻshimchalar kiritilsin.

14. Turizm va madaniy meros vazirligi Transport vazirligi hamda manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

15. Mazkur qarorning ijrosini samarali tashkil qilishga masʼul va shaxsiy javobgar etib transport vaziri I.R. Mahkamov, turizm va madaniy meros vaziri oʻrinbosari B. Ibragimov hamda Samarqand viloyati hokimi E.O. Turdimov belgilansin.

Qaror ijrosini muhokama qilib borish, masʼul tashkilotlar faoliyatini muvofiqlashtirish va nazorat qilish Bosh vazir oʻrinbosarlari A.J. Ramatov va A.A. Abduxakimov zimmasiga yuklansin.

Amalga oshirilayotgan chora-tadbirlar natijadorligi yuzasidan 2023-yil 31-dekabrga qadar har chorakda Oʻzbekiston Respublikasi Prezidentiga axborot berib borilsin.

1. Oʻzbekiston Respublikasi Prezidentining 2022-yil 27-yanvardagi PQ-104-son qarori bilan tasdiqlangan Mehmonxona (joylashtirish), savdo, umumiy ovqatlanish, koʻngilochar, turoperator va turagent xizmatlarini koʻrsatayotgan tadbirkorlik subyektlari uchun maxsus soliq rejimi joriy etiladigan tuman va shaharlar roʻyxati quyidagi mazmundagi 18¹ — 18³ pozitsiyalar bilan toʻldirilsin:

2. Vazirlar Mahkamasining 2021-yil 2-noyabrdagi “Alkogol va tamaki mahsulotlarini aksiz markalari bilan markirovkalash boʻyicha qoʻshimcha chora-tadbirlar toʻgʻrisida”gi 665-son qarorida:

1-banddagi “2022-yil 1-noyabrga” soʻzlari “2023-yil 1-oktabrga” soʻzlari bilan almashtirilsin;

3-band toʻrtinchi xatboshisidagi “2022-yil 1-oktabrga” soʻzlari “2023-yil 1-sentabrga” soʻzlari bilan almashtirilsin.

3. Vazirlar Mahkamasining 2022-yil 2-avgustdagi 424-son qarori bilan tasdiqlangan Oʻzbekiston Respublikasi hududida xizmat safarlari toʻgʻrisidagi nizomning 18-bandida:

birinchi xatboshi quyidagi tahrirda bayon etilsin:

“18. Mehmonxona xarajatlarining bir kunlik qoplash miqdori (xalqaro miqyosdagi tadbirlar davrida Samarqand, Buxoro, Xiva, Qoʻqon, Shahrisabz shaharlari va Boʻstonliq tumanidagi mehmonxonalar xarajatlari bundan mustasno)”;

quyidagi mazmundagi oltinchi xatboshi bilan toʻldirilsin:

“Xalqaro miqyosdagi tadbirlar davrida Samarqand, Buxoro, Xiva, Qoʻqon, Shahrisabz shaharlari va Boʻstonliq tumanidagi mehmonxonalar xarajatlarining mazkur bandning ikkinchi — toʻrtinchi xatboshilarida nazarda tutilgan bir kunlik qoplash miqdoridan oshgan qismi tashkilotning budjetdan tashqari mablagʻlari hisobidan qoplab beriladi”.