Oʻzbekiston Respublikasi Prezidentining “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida” 2021-yil 3-dekabrdagi PQ-31-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha davlat siyosatining ustuvor yoʻnalishlari toʻgʻrisida” 2021-yil 3-dekabrdagi PF-29-son Farmoniga muvofiq Oʻzbekiston Respublikasi Iqtisodiy taraqqiyot va kambagʻallikni qisqartirish vazirligining Hokim yordamchilari faoliyatini qoʻllab-quvvatlash jamgʻarmasi (keyingi oʻrinlarda — Jamgʻarma) tashkil etilganligi maʼlumot uchun qabul qilinsin.

2. Belgilansinki:

a) Quyidagilar Jamgʻarma mablagʻlarini shakllantirish manbalari hisoblanadi:

Oʻzbekiston Respublikasi Prezidentining farmon va qarorlari, Oʻzbekiston Respublikasi Hukumatining qarorlari bilan ajratiladigan mablagʻlar;

xorijiy (xalqaro) moliya institutlari va boshqa xorijiy tashkilotlarning texnik koʻmak mablagʻlari va grantlari;

jismoniy va yuridik shaxslarning homiylik xayriyalari;

vaqtincha boʻsh mablagʻlarni tijorat banklarining depozitlariga joylashtirishdan olingan daromadlar;

qonunchilik hujjatlarida taqiqlanmagan boshqa manbalar;

b) Quyidagilar Jamgʻarma mablagʻlaridan moliyalashtiriladigan asosiy yoʻnalishlar hisoblanadi:

hokim yordamchilari ish haqining avvalgi ish joyi boʻyicha oʻrtacha oylik ish haqi miqdoridan kam boʻlgan qismini kompensatsiya qilish;

boshqa hududlardan kelib ishlayotgan hokim yordamchilari va respublika vakillari uchun turar joy ijarasi xarajatlari uchun kompensatsiya toʻlash;

ish faoliyatida yaxshi natijalarga erishgan hokim yordamchilari va respublika vakillarini har oyda mukofotlash;

oʻz shaxsiy avtomobilidan foydalanayotgan respublika vakillarining transport xarajatlarini kompensatsiya qilish;

respublika vakillarining bir oyda bir marta doimiy yashash joyiga temir yoʻl transportida borib kelishi uchun kompensatsiya toʻlash;

yil yakuni boʻyicha oʻziga biriktirilgan hududda yuqori natijalarga erishgan respublika vakillariga va hokim yordamchilariga ipoteka krediti asosida uy-joy xarid qilish uchun subsidiya toʻlash;

“Yangi Oʻzbekiston islohotchisi” koʻkrak nishoni va uning guvohnomasini tayyorlash hamda mukofotlanganlarni taqdirlash va moddiy ragʻbatlantirish bilan bogʻliq xarajatlar;

hokim yordamchilari, respublika vakillari va ularning faoliyatini samarali tashkil etishga jalb qilingan boshqa shaxslarni tayyorlash, qayta tayyorlash, va ularning malakasini oshirish dasturlarini amalga oshirish, seminarlar va boshqa tadbirlarni, shu jumladan, xorijiy mamlakatlarda tashkil qilish;

hokim yordamchilari faoliyatini samarali tashkil etishga kompyuterlar, planshetlar, multimedia va tarmoq qurilmalari hamda dasturiy taʼminotlarni xarid qilish;

ekspert guruhi faoliyatini tashkil etish, ekspert guruhi tarkibiga kiritilgan mutaxassislarga haq toʻlash;

Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining va Jamgʻarma kuzatuv kengashining tegishli qarorlarida belgilangan boshqa vazifalarni amalga oshirish.

3. Quyidagilar:

Hokim yordamchilari faoliyatini qoʻllab-quvvatlash jamgʻarmasi kuzatuv kengashining (keyingi oʻrinda — Kuzatuv kengashi) tarkibi 1-ilovaga muvofiq;

Hokim yordamchilari faoliyatini qoʻllab-quvvatlash jamgʻarmasi toʻgʻrisidagi nizom 2-ilovaga muvofiq tasdiqlansin.

4. Belgilab qoʻyilsinki:

Jamgʻarma Iqtisodiy taraqqiyot va kambagʻallikni qisqartirish vazirligida yuridik shaxs tashkil etmagan holda shakllantiriladi, Jamgʻarma uchun Moliya vazirligining Gʻaznachiligida shaxsiy gʻazna hisobvaragʻi ochiladi;

Iqtisodiy taraqqiyot va kambagʻallikni qisqartirish vazirligi huzuridagi Mahallabay ishlash va tadbirkorlikni rivojlantirish agentligi Jamgʻarmaning ijrochi organi hisoblanadi.

5. Iqtisodiy taraqqiyot va kambagʻallikni qisqartirish vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.

1. Mazkur Nizom Oʻzbekiston Respublikasi Iqtisodiy taraqqiyot va kambagʻallikni qisqartirish vazirligining Hokim yordamchilari faoliyatini qoʻllab-quvvatlash jamgʻarmasi (keyingi oʻrinlarda — Jamgʻarma) faoliyatini tashkil etish, shuningdek, uning mablagʻlarini shakllantirish va ushbu mablagʻlardan foydalanishi tartibini belgilaydi.

2. Jamgʻarma Oʻzbekiston Respublikasi Iqtisodiy taraqqiyot va kambagʻallikni qisqartirish vazirligida yuridik shaxs tashkil etmagan holda shakllantiriladi, Jamgʻarma uchun Moliya vazirligining Gʻaznachiligida shaxsiy gʻazna hisobvaragʻi ochiladi.

3. Ushbu Nizomda quyidagi tushunchalardan foydalaniladi:

Kuzatuv kengashi — Jamgʻarma faoliyatini boshqaradigan Hokim yordamchilari faoliyatini qoʻllab-quvvatlash jamgʻarmasi kuzatuv kengashi;

respublika vakili — hokim yordamchilari faoliyatini samarali tashkil etish maqsadida iqtisodiyot va investitsiya komplekslariga kiruvchi vazirliklar, idoralar, tijorat banklarining har bir tuman va shaharga biriktirilgan masʼul xodimlari;

hokim yordamchisi — har bir shaharcha, qishloq, ovulda, shuningdek, shaharlar, shaharchalar, qishloqlar hamda ovullardagi har bir mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman (shahar) hokimi yordamchisi lavozimiga tayinlangan shaxs;

kompensatsiya — boshqa hududlardan kelib ishlayotgan hokim yordamchilariga va respublika vakillariga turar joy ijarasi, avvalgi ish joyi boʻyicha oʻrtacha oylik ish haqi miqdoridan kam boʻlgan taqdirda yetishmagan qismi, oʻz shaxsiy avtomobilidan foydalanayotgan respublika vakillarining transport xarajatlari, shuningdek, bir oyda bir marta doimiy yashash joyiga temir yoʻl transportida borib kelishi uchun Jamgʻarma hisobidan qoplab beriladigan toʻlov;

subsidiya — oʻziga biriktirilgan hududda yuqori natijalarga erishgan respublika vakillariga va hokim yordamchilariga ipoteka krediti asosida uy-joy xarid qilish uchun Jamgʻarma hisobidan qoplab beriladigan toʻlov.

4. Jamgʻarma Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlariga, boshqa qonunchilik hujjatlariga, Jamgʻarma Kuzatuv kengashi qarorlariga muvofiq hokim yordamchilari faoliyatini samarali tashkil etish boʻyicha nazarda tutilgan tadbirlarni moliyalashtirish maqsadida faoliyat yuritadi.

5. Jamgʻarma faoliyati Kuzatuv kengashi tomonidan boshqariladi. Kuzatuv kengashining aʼzolari oʻz faoliyatini jamoatchilik asosida amalga oshiradi.

6. Kuzatuv kengashi:

Jamgʻarma faoliyatining asosiy yoʻnalishlarini belgilaydi;

har yili Jamgʻarma daromadlari va xarajatlari balansining prognoz koʻrsatkichlarini koʻrib chiqadi va tasdiqlaydi;

Jamgʻarma daromadlarining shakllanishini va mablagʻlardan maqsadli foydalanilishini taʼminlash boʻyicha uning faoliyatini yuzasidan nazorat qiladi;

Jamgʻarma daromadlari va xarajatlari smetasini, zarur hollarda, tasdiqlangan smetalarga kiritiladigan tegishli oʻzgartirishlarni tasdiqlaydi;

qonunchilik hujjatlariga muvofiq boshqa vakolatlarni amalga oshiradi.

7. Kuzatuv kengashi Jamgʻarmaga yuklangan vazifalarning ijrosini tashkil qilish, tegishli loyihalarni ishlab chiqish, amaliyotga tatbiq etish va zarur tavsiyalar tayyorlanishini taʼminlash maqsadida davlat organlari, xoʻjalik birlashmalari, nodavlat notijorat tashkilotlar va fuqarolik jamiyatining boshqa institutlari vakillari, shuningdek, fuqarolardan iborat tarkibda ekspert guruhi tashkil qilishi mumkin.

8. Kuzatuv kengashi majlislari zaruratga koʻra oʻtkaziladi.

9. Kuzatuv kengashi majlisini kengash raisi, u boʻlmagan taqdirda esa — kengash raisining oʻrinbosari boshqaradi.

10. Kuzatuv kengashi majlisi unda Kuzatuv kengashi aʼzolarining kamida uchdan ikki qismi ishtirok etgan taqdirda vakolatli hisoblanadi.

Kuzatuv kengashining qarori kengash aʼzolarining oddiy koʻpchilik ovozi bilan qabul qilinadi va Kuzatuv kengashi raisi tomonidan imzolanadi.

Ovozlar teng boʻlganda, Kuzatuv kengashi raisining ovozi hal qiluvchi ovoz hisoblanadi.

11. Kuzatuv kengashi qarorlari Kuzatuv kengashi majlisining bayonnomalari bilan rasmiylashtiriladi. Kengash majlisining bayonnomasi Kuzatuv kengashi raisi tomonidan tasdiqlanadi.

12. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi Mahallabay ishlash va tadbirkorlikni rivojlantirish agentligi (keyingi oʻrinlarda — Agentlik) Jamgʻarmaning ijrochi organi hisoblanadi.

13. Agentlik:

Jamgʻarma daromadlari va xarajatlari smetasini tayyorlaydi va tasdiqlash uchun Jamgʻarma Kuzatuv kengashiga taqdim etadi;

Jamgʻarma tushumlarini koʻpaytirish va uning mablagʻlaridan samarali foydalanish boʻyicha takliflar tayyorlaydi;

Jamgʻarma mablagʻlaridan foydalanish boʻyicha hisobotlarni Kuzatuv kengashiga taqdim etadi;

Jamgʻarmadan mablagʻ ajratishga oid murojaatlarni umumlashtiradi va Kuzatuv kengashiga koʻrib chiqish uchun materiallar tayyorlaydi;

Kuzatuv kengashi qarorlari toʻliq va oʻz vaqtida ijro etilishini taʼminlaydi.

Agentlik qonunchilik hujjatlariga muvofiq boshqa vakolatlarni amalga oshirishi, shuningdek, boshqa huquqlarga va majburiyatlarga ham ega boʻlishi mumkin.

14. Iqtisodiy taraqqiyot va kambagʻallikni qisqartirish vazirligi:

Jamgʻarma uchun Oʻzbekiston Respublikasi Gʻaznachiligida shaxsiy gʻazna hisobvaragʻini ochadi va yuritadi, belgilangan tartibda ushbu hisobvaraq boʻyicha tegishli operatsiyalarni amalga oshiradi;

Jamgʻarmaning xarajatlarini amalga oshiradi, daromadlari va xarajatlari hisobini yuritadi, shuningdek, ular boʻyicha choraklik va yillik hisobotlarni shakllantiradi;

Jamgʻarmaga ajratilgan mablagʻlardan maqsadli foydalanilishini tahlil qiladi va monitoring olib boradi;

Kuzatuv kengashi roziligi bilan boʻsh mablagʻlarni belgilangan tartibda Oʻzbekiston Respublikasining tijorat banklarida milliy valyutada depozitlarga joylashtiradi.

15. Jamgʻarma mablagʻlaridan foydalanish toʻgʻrisidagi hisobot har chorakda Kuzatuv kengashi tomonidan koʻrib chiqiladi va Iqtisodiy taraqqiyot va kambagʻallikni qisqartirish vazirligi tomonidan Moliya vazirligiga taqdim etiladi.

16. Quyidagilar Jamgʻarma mablagʻlarini shakllantirish manbalari hisoblanadi:

Oʻzbekiston Respublikasi Prezidentining farmon va qarorlari, Oʻzbekiston Respublikasi Hukumatining qarorlari bilan ajratiladigan mablagʻlar;

xorijiy (xalqaro) moliya institutlari va boshqa xorijiy tashkilotlarning texnik koʻmak mablagʻlari va grantlari;

jismoniy va yuridik shaxslarning homiylik xayriyalari;

vaqtincha boʻsh mablagʻlarni tijorat banklarining depozitlariga joylashtirishdan olingan daromadlar;

qonunchilik hujjatlarida taqiqlanmagan boshqa manbalar.

17. Jamgʻarmaga uning daromadlari boʻyicha tushadigan mablagʻlar Moliya vazirligi Gʻaznachiligining shaxsiy gʻazna hisobvaragʻiga oʻtkaziladi.

18. Jamgʻarmaga mablagʻlar tushishining toʻliqligi Jamgʻarma Kuzatuv kengashi tomonidan nazorat qilinadi.

19. Quyidagilar Jamgʻarma mablagʻlaridan moliyalashtiriladigan asosiy yoʻnalishlar hisoblanadi:

hokim yordamchilari ish haqining avvalgi ish joyi boʻyicha oʻrtacha oylik ish haqi miqdoridan kam boʻlgan qismini kompensatsiya qilish;

boshqa hududlardan kelib ishlayotgan hokim yordamchilari va respublika vakillari uchun turar joy ijarasi xarajatlari uchun kompensatsiya toʻlash;

ish faoliyatida yaxshi natijalarga erishgan hokim yordamchilari va respublika vakillarini har oyda mukofotlash;

oʻz shaxsiy avtomobilidan foydalanayotgan respublika vakillarining transport xarajatlarini kompensatsiya qilish;

respublika vakillarining bir oyda bir marta doimiy yashash joyiga temir yoʻl transportida borib kelishi uchun kompensatsiya toʻlash;

yil yakuni boʻyicha oʻziga biriktirilgan hududda yuqori natijalarga erishgan respublika vakillariga va hokim yordamchilariga ipoteka krediti asosida uy-joy xarid qilish uchun subsidiya toʻlash;

“Yangi Oʻzbekiston islohotchisi” koʻkrak nishoni va uning guvohnomasini tayyorlash hamda mukofotlanganlarni taqdirlash va moddiy ragʻbatlantirish bilan bogʻliq xarajatlar;

hokim yordamchilari, respublika vakillari va ularning faoliyatini samarali tashkil etishga jalb qilingan boshqa shaxslarni tayyorlash, qayta tayyorlash, va ularning malakasini oshirish dasturlarini amalga oshirish, seminarlar va boshqa tadbirlarni, shu jumladan, xorijiy mamlakatlarda tashkil qilish;

hokim yordamchilari faoliyatini samarali tashkil etishga kompyuterlar, planshetlar, multimedia va tarmoq qurilmalari hamda dasturiy taʼminotlarni xarid qilish;

ekspert guruhi faoliyatini tashkil etish, ekspert guruhi tarkibiga kiritilgan mutaxassislar uchun haq toʻlash;

Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining va Jamgʻarma Kuzatuv kengashining tegishli qarorlarida belgilangan boshqa vazifalarni amalga oshirish.

20. Kuzatuv kengashining qarori asosida respublika vakillarining doimiy yashash joyiga (Qoraqalpogʻiston Respublikasi, Xorazm va Surxondaryo viloyatlari) temir yoʻl transportidan boshqa transport vositalaridan (samolyot va shaharlararo avtobus) foydalangan holda borib kelishi uchun Jamgʻarma hisobidan kompensatsiya toʻlanishi mumkin.

21. Jamgʻarmaning daromadlar va xarajatlar smetasi Kuzatuv kengashi tomonidan tasdiqlanadi hamda Moliya vazirligiga roʻyxatdan oʻtkazish uchun taqdim etiladi.

22. Jamgʻarma xarajatlari Agentlikning soʻrovnomalari asosida moliyalashtiriladi.

23. Agentlik Jamgʻarmaga ajratilgan mablagʻlardan foydalanilishi va keyingi hisobot davrida kutilayotgan xarajatlar toʻgʻrisidagi maʼlumotlarni Kuzatuv kengashining navbatdagi yigʻilishiga koʻrib chiqish uchun kiritadi.

24. Jamgʻarmadan mablagʻlar tasdiqlangan daromadlar va xarajatlar smetasi asosida Jamgʻarmaning shaxsiy gʻazna hisobvaraqlaridan ajratiladi.

25. Jamgʻarmaning joriy yilda foydalanilmagan mablagʻlari budjetga olib qoʻyilmaydi va ulardan keyingi davrda foydalaniladi.

26. Jamgʻarma mablagʻlari hisobidan xarajatlar quyidagi miqdorda moliyalashtiriladi:

a) hokim yordamchilari ish haqining avvalgi ish joyi boʻyicha oʻrtacha oylik ish haqi miqdoridan kam boʻlgan qismini kompensatsiya qilish xarajatlari har oy yakuni bilan amalga oshiriladi.

Bunda oʻrtacha oylik ish haqi miqdori Vazirlar Mahkamasining 1997-yil 11-martdagi 133-son qarori bilan tasdiqlangan Oʻrtacha oylik ish haqini hisoblab chiqarish tartibiga asosan hisoblab chiqiladi. Oylik ish haqi oʻrtasidagi farqni kompensatsiya qilish mexanizmi Kuzatuv kengashi tomonidan tasdiqlanadi;

b) boshqa hududlardan kelib ishlayotgan hokim yordamchilari va respublika vakillari uchun bazaviy hisoblash miqdorining ikki baravari miqdorida turar joy ijarasi xarajatlari uchun kompensatsiya toʻlanadi. Uy-joylarni ijaraga olganlik (ijarada turganlik) uchun har oylik pul kompensatsiyasini toʻlash tartibi Kuzatuv kengashi tomonidan tasdiqlanadi;

v) hokim yordamchilari faoliyatini samarali tashkil etish va baholab borish imkonini beruvchi “Onlayn mahalla” elektron platformasiga qarab quyidagi miqdorlarda oylik mukofot puli toʻlanadi:

qoniqarli deb topilganda — oylik ish haqining 15 foizi miqdorida;

yaxshi deb topilganda — oylik ish haqining 30 foizi miqdorida;

aʼlo deb topilganda — oylik ish haqining 50 foizi miqdorida;

g) Agentlik tomonidan ish faoliyatida yaxshi natijaga erishgan respublika vakillariga mehnatga haq toʻlashning eng kam miqdorining 4 baravarigacha miqdorda oylik mukofot puli toʻlab beriladi. Respublika vakillariga mukofot puli toʻlash boʻyicha takliflar ularning mehnat faoliyati natijadorligiga qarab Oʻzbekiston Respublikasi Prezidentining “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida” 2021-yil 3-dekabrdagi PQ-31-son qarori bilan tashkil etilgan Hokim yordamchilari faoliyatini tashkil etish boʻyicha respublika komissiyasi tomonidan kiritiladi;

d) respublika vakillarining oʻz shaxsiy avtomobilidan foydalanayotganligi uchun har chorakda bir marta har oy uchun benzinda harakatlanadigan avtotransport vositalari uchun 2 150 ming soʻmgacha, tabiiy gazda harakatlanadigan avtotransport vositalari uchun 1 350 ming soʻmgacha kompensatsiya toʻlovlari amalga oshiriladi.

Bunda respublika vakillari tomonidan hisobot choragi davomida 3 500 kilometr masofa toʻliq bosib oʻtilganda, kompensatsiya toʻlovlari yuqorida koʻrsatilgan miqdorlarda toʻliq beriladi. Agarda hisobot davrida avtotransport vositasida yoʻl bosish miqdori 3500 kilometrdan kam boʻlgan taqdirda, kompensatsiya miqdori bosilgan masofaga mutanosib miqdorda toʻlanadi.

Respublika vakillarining oʻz shaxsiy avtomobilidan foydalanilganligi uchun kompensatsiya toʻlovlarini amalga oshirish mexanizmi Kuzatuv kengashi tomonidan tasdiqlanadi;

e) respublika vakillarining bir oyda bir marotaba doimiy yashash joyiga temir yoʻl transportida (ushbu Nizomning 20-bandida koʻrsatilgan holatlarda) borib kelishi uchun kompensatsiya xarajatlari transport vositalarida harakatlanganligini tasdiqlovchi hujjat (chipta) taqdim qilingan taqdirda, “ekonom” tarifi boʻyicha xarajatlarning 100 foizi, “biznes” tarifi boʻyicha xarajatlarning 70 foizi (samolyotda uchish bundan mustasno) toʻlab beriladi.

Kompensatsiya toʻlovlari har chorakda bir marta hisobot davridan oldingi chorak uchun amalga oshiriladi;

yo) yil yakuni boʻyicha oʻziga biriktirilgan hududda yuqori natijalarga erishgan respublika vakillariga va hokim yordamchilariga ipoteka krediti asosida uy-joy xarid qilish uchun uy-joy qiymatining 50 foizigacha (biroq 150 million soʻmdan oshmagan miqdorda) subsidiya toʻlash xarajatlari amalga oshiriladi.

Ipoteka krediti asosida uy-joy xarid qilish uchun subsidiya ajratish tartibi Kuzatuv kengashi tomonidan tasdiqlanadi;

j) “Yangi Oʻzbekiston islohotchisi” koʻkrak nishoni bilan taqdirlanganlarga bazaviy hisoblash miqdorining besh baravari miqdorida bir yoʻla toʻlanadigan pul mukofoti beriladi;

z) zaruratga koʻra ekspert guruhi tarkibiga kiritilgan mutaxassislarga haq toʻlash tartibi va miqdori Kuzatuv kengashi tomonidan belgilanadi.

Respublika vakillariga ushbu bandda nazarda tutilgan toʻlovlardan tashqari asosiy ish joyi boʻyicha ish beruvchilar tomonidan xarajatlarini qoplash uchun qoʻshimcha toʻlovlar va ragʻbatlantirish amalga oshirilishi mumkin.

27. Oʻzbekiston Respublikasi Moliya vazirligi huzuridagi Davlat moliyaviy nazorati inspeksiyasi Jamgʻarma mablagʻlaridan maqsadli foydalanilishini nazorat qiladi.

28. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.